ירד
| געבורט | ת"ס |
|---|---|
| פטירה | א'תכ"ב (אלט: 962 בערך) |
| גיל פטירה | 962 |
| קינדער | חנוך |
| בתנ"ך | בראשית ה, טו–כ; דברי הימים א' א, ב |
יֶרֶד איז געווען דער זעקסטער דור פון אדם הראשון, א זון פון מהללאל און דער פאטער פון חנוך.
ירד איז געבוירן 460 יאר נאכן באשאף פון אדם הראשון, אין יאר ת"ס לאדם[א], ווען זיין פאטער איז אלט געווען 65 יאר[1]. ער איז גערופן געווארן מיט דעם נאמען, ווייל אין זיינע צייטן זענען אראפגעקומען די מלאכים צו לערנען מיט מענטשן[2], אדער ווייל אין זיין דור זענען מענטשן געפאלן צו די נידריגסטע מדרגה[3].
לויט ספר היובלים האט ער חתונה געהאט מיט זיין שוועסטערקינד, וועלכע האט געהייסן בכה בת רצוצאל[2].
ווען ער איז אלט געווען 162 יאר האט ער געבוירן זיין זון חנוך[4]. אין די נאכפאלגנדע יארן האט ער געהאט נאך זון און טעכטער.
ירד האט געלעבט 962 יאר[5] (ביז צום יאר א'תכ"ב לאדם[א]), דער צווייט-לענגסטער פון אלע מענטשן דערמאנט אין תנ"ך.
לויט א טראדיציע פון שומרונים, האט ירד געגרינדעט די שטאט "שלם רבתא" (היינטיגע סאלים, נעבן שכם)[6].
נאטיצן
- ↑ 1.0 1.1 דאס הייסט, לויט'ן ציילונג באניצט אין סדר הדורות און אין אנדערע ספרים אויף אידישע כראנאלאגיע, וועלכע הייבן אן פון טאג ווען אדם הראשון איז באשאפן געווארן, אין צווייטן יאר לבריאת העולם (דער ערשטער יאר לבריאת העולם, גערופן "שנת תוהו", האט אנטהאלטן בלויז פינף טעג). לויט די רעכענונג וואס איז היינט אנגענומען (אין וועלכע דער יעצטיגער יאר איז ה'תשפ"ה), וואס הייבט זיך אן פון ערשטן טאג צום בריאת העולם, דארף מען צולייגן איין יאר צום חשבון.
אויב די יארן אין די תורה רעכענען זיך ווען זיי זענען געענדיגט, און נישט ווען זיי הייבן זיך אן, דארף מען צולייגן נאך א יאר צום חשבון. איבער דעם ספק, זעט: רבי אברהם ישעיהו קארעליץ, חזון איש, אורח חיים, סימן ק"מ, ס"ק ג'.
רעפערענצן
| אדם ביז נח | |
|---|---|
|