רוי:רבי אברהם ישעיהו קארעליץ
| געבורט | י"א חשון ה'תרל"ט |
|---|---|
| טויט | ט"ו חשון ה'תשי"ד (אלט: 74) |
רבי אברהם ישעיהו קארעליץ (י"א חשון ה'תרל"ט, 1878, קאסעוו - ט"ו חשון ה'תשי"ד, 1953, בני ברק), איז געווען איינער פון די פירער פון אידנטום אין ארץ ישראל, און דער מחבר פון די ספרים חזון איש.
ביאגראפיע
רבי אברהם ישעיהו איז געבוירן געווארן י"א חשון תרל"ט אינעם שטעטל קאסעוו, ליטע, (דעמאלסט אין גראדנער גובערניע, רוסלענדישע אימפעריע, היינט אין בריסקער גובערניע, בעלארוס) צו זיין פאטער, הרב שמריהו יוסף קארעליץ, קאסעווער רב, און זיין מוטער, ראשא לאה, א טאכטער פון הרב קאצנעלבויגן, רב פון קאסעוו און דערנאך פון קאברין.
ביי דער ערשטער וועלט־מלחמה האט ער געוואוינט אין סטויפץ, וואו ער האט געדינט ווי שטאטס־רב ווען דער ארטיקער רב, הרב יואל סאראצקין, איז געווארן פארטריבן פונעם שטעטל. נאך עטליכע יאר איז דער חזון איש אריבער צו מינסק.
אין 1920 האט די משפחה קארעליץ זיך באזעצט אין דער שטאט ווילנע, וואו ער איז געווארן נאנט צום שטאט'ס רב, הרב רבי חיים עוזר גראדזענסקי.
ארץ ישראל
אום ט"ז תמוז תרצ"ג (1933) איז ער ארויף קיין ארץ ישראל, נאכדעם וואס הרב רבי חיים עוזר גראדזענסקי האט געבעטן משה פרוש פון אגודת ישראל צו באקומען סערטיפיקאטן פארן חזו"א און זיין ווייב כדי זיי זאלן קענען וואוינען אין ארץ ישראל[1]. לויט רפאל האלפערן האט דער חזון איש זיך איינגעשפארט אז מען זאל נישט באקומען דעם סערטיפיקאט דורכן הויפטראבינאט נאר דורך אגודת ישראל[2].
ווען ער איז אנגעקומען אין לאנד איז ער געבליבן עטליכע טעג ביי הרב דוד פאטאש, ביז ער האט געדונגען א שטוב אין גאולה גאס אין תל אביב. עטליכע וואכן נאך תשעה באב האט ער געדונגען א דירה אין דער נייער קהילה וואס האט זיך אנטוויקלט אין בני ברק, וואס איז שפעטער געווארן, אין א גרויסער מאס צוליב אים, א פעסטונג פון חרדישן אידנטום אין ישראל.
זומער תרצ"ד (1934) האט דער חזו"א געוואוינט א לענגערע תקופה אין צפת פאר זיין געזונט; במשך דער תקופה האט ער געלערנט בעיקר אינעם בית מדרש פון רבי יוסף קארו אין דער אלטשטאט.
דעצעמבער 1936 איז דער חזון איש געווארן געפערלעך קראנק. מען האט דאס מודיע געווען אומעטום אין דער אידישער וועלט, און מ'האט גערופן דעם עולם צו דאווענען פאר אים[3].
אין תש"א איז נפטר געווארן ראשא לאה קארעליץ, דעם חזון איש'ס מוטער, אין ירושלים, און מען האט זי קובר געווען דארט.
פון זיינע תלמידים
- רבי אברהם גענאכאווסקי
- רבי חיים ברים
- רבי גדליה נאדל (תרפ"ג–תשס"ד)
- רבי גרשון עדלשטיין
- רבי דוב יפה
- רבי דוב לאנדא
- הרב דוד מיכאל שמידל, פירער פון אתרא קדישא
- רבי חיים קאניעווסקי (זיין נעפע)
- רבי חיים שאול גריינימאן (זיין נעפע)
- רבי יעקב ישראל קאניעווסקי, דער "סטייפעלר"
- רבי מאיר גריינימאן (זיין נעפע)
- רבי מיכל יהודה ליפקאוויטש
- רבי נסים קארעליץ (זיין נעפע)
- רבי נתן שולמאן, ראש ישיבה פון סלאבאדקע
- רבי קלמן כהנא
- רבי שריה דעבליצקי
רעפערענצן
- ↑ דער קארעספאנדענץ איז געדרוקט אין ספר גנזים ושו"ת חזון איש חלק ב' פון עמוד ק"ט
- ↑ רפאל האלפערן, במחיצת החזון איש, עמ' 51
- ↑ הרב אברהם ישעיהו קארעליץ געפעהרליך קראנק, אונזער עקספרעס, 24.12.1936. ביי דער היסטארישער יידישער פרעסע.
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!