רוי:רבי מנחם אליעזר זאב ראזנבוים

רבי מנחם אליעזר ראזנבוים, קרעטשניפער רבי

רבי מנחם אליעזר זאב ראזנבוים (געבוירן כ"ד ניסן ה'תש"ט), איז דער היינטיגער קרעטשניפער רבי אין רחובות.

לעבנס געשיכטע

רבי מנחם אליעזר זאב איז געבוירן געווארן אין רחובות אין יאר ה'תש"ט צו זיין פאטער רבי דוד משה ראזנבוים, דער פריערדיגער קרעטשניפער רבי פון רחובות און צו זיין מוטער מרת אסתר רחל, טאכטער פון רבי חיים מרדכי ראזנבוים, דער נאדווארנער רבי. ער איז אויכעט א צווילינג ברודער פונעם קרעטשניפער-קרית גת'ער רבי ישראל ניסן ראזנבוים.

אלס בחור האט ער געלערנט אין זיין פאטער'ס ישיבה. ה' אדר א' ה'תשכ"ז האט ער געהייראט מרת לאה רחל, טאכטער פון רבי יואל בעער, דער ראצפערטער רבי פון סאו פאולא, בראזיל. נאך זיין חתונה האט ער זיך אריבערגעצויגן אין בראזיל צו וואוינען נאענט צו זיין שווער. נאך אומגעפער א יאר וואס ער האט געוואוינט דארט און געלערנט אין דעם ארטיגן כולל, האט ער זיך צוריקגעקערט קיין ארץ ישראל, און ווען איז ער צוריקגעקומען, האט אים זיין פאטער געבעטן אז ער זאל זיין אנוועזנד אין דעם "פראווען צימער" ווען ער נעמט אויף מענטשן און קוויטלעך כדי ער זאל זיך אויסלערנען די "סודות ההנהגה".

ט"ו תמוז ה'תשכ"ט, נאכדעם וואס זיין פאטער איז געווען אין ראמעניע אויף קברי צדיקים און נפטר געווארן, האט מען אים אויפגענומען אלס זיין ממשיך, און עמטליך, איז ער באקרוינט געווארן שוין ביי דער לוויה, אבער פאקטיש האט ער נישט געפירט קיין רעביסטווע, און בלויז עטליכע מאנאטן שפעטער אין יאר ה'תש"ל, ביי דער פורים סעודה, האט ער מקבל געווען אויף זיך אנצופירן דעם חסידות.

דער חסידות אונטער זיין פירערשאפט און אויפזיכט ציילט אפ היינטיגן טאג אומגעפער 600 משפחות (250 וואוינען אין "קרית קרעטשניף" רחובות, און אין דער דערנעבנדיגער נייעם געגנט "פסגת קרעטשניף" וואס מען האט לעצטנס אויפגעבויט, וואוינען 80 משפחות). אנדערע פיליאלען פון דעם הויף זענען פאראן אין בני ברק, ירושלים, אלעד, ביתר עילית און מודיעין עילית. די מוסדות פונעם הויף זענען ווי פאלגנד: ישיבה גדולה און ישיבה קטנה וואו עס לערנען 150 בחורים, תלמוד תורה "בני משה", מיידל שולע, סעמינאר, קינדערגארטן, כולל, בית מדרש, שטיבלעך און מקווה. דער הויף פארמאגט אויכעט חסד ארגאניזאציעס, דער מערקווערדיגער איז "לשבוע מטובך" וואס טיילט טאג טעגליך עסנווארג פאר קראנקע מענטשן אין דעם "קאפלאן" שפיטאל אין רחובות.

דער רבי האט קיינמאל נישט באזוכט אין דעם כותל וויבאלד זיין פאטער פלעגט זיך אויכעט פירן אזוי זייט דער באפרייאונג פונעם כותל דורך די ציונים.

קינדער

• רבי דוד משה, דינט אלס רב פון "קרית קרעטשניף" אין רחובות. ער האט געהייראט מרת צירל, טאכטער פון רבי ישראל אליעזר אדלער, דער דזשיקאווער רבי פון בית שמש.
• רבי איתמר, דינט אלס רב פון דער קרעטשניפער קהילה אין בני ברק. ער האט געהייראט מרת געלא מלכה, טאכטער פון רבי נפתלי ראובן קארנרייך, דער קאסובער רבי פון בית שמש, און איידעם פון הרה"ק רבי אליעזר האגער, דער פריערדיגער סערעט-וויזשניצער רבי.
• רבי חיים מרדכי, דער ראש ישיבה אין רחובות. ער האט געהייראט זיין שוועסטער קינד, מרת מלכה שרה, טאכטער פון זיין פעטער רבי ישראל ניסן ראזנבוים, דער קרעטשניפער-קרית גת'ער רבי.
• רבי יקותיאל יהודה, רב פון דער קרעטשניפער קהילה אין מודיעין עילית בראכפעלד. ער איז א איידעם פון רבי אליעזר כהנא, פון ספינקא ירושלים.
• מרת מלכה, בזיוו"ש ווייב פון רבי פנחס חיים יוסף שנעעבאלג, דער ווערעצקי רבי.
• מרת הינדא, ווייב רבי יוסף מאיר הורוויץ, ספינקער רבי פון וויליאמסבורג.
• מרת אסתר, ווייב פון רבי ברוך האגער, זון פון רבי ישראל אליעזר, רב פון סערעט-וויזשניצער קהילה אין ירושלים.
• מרת שרה מרים, ווייב פון רבי אביש ווייס, זון פונעם ספינקער רבי פון בני ברק.
• מרת פערל, ווייב פון רבי יששכר בעריש קאהן, זון פון רבי שמואל יעקב קאהן, דער תולדות אברהם יצחק רבי.

רעפערענצן

דער בלאט קומט פון יידיש-וויקיפעדיע.
אריגינעלער בלאט • ערלויבעניש cc-by-sa 3.0.

דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!