אונטערשייד צווישן ווערסיעס פון "אייוועלט"

פון המכלול
קפיצה לניווט קפיצה לחיפוש
וויזועלוויקיטעקסט
שורה 133: שורה 133:
{{רעפערענצן}}
{{רעפערענצן}}
[[HE:אייוועלט]]
[[HE:אייוועלט]]
[[קאַטעגאָריע:אידישע וועבזייטלעך]]

רעוויזיע פון 05:13, 28 מאי 2024

אידישע וועלט
Ivelt logo.png
סוג פארום
תקופת הפעילות 2006–הווה (בערך 18 יאָרן)
מייסדים 'קרעמער', 'ארענדאר'
מנכ"ל יחזקאל שטיין ('וויכטיג מאכער')
שפות תכנות PHP
https://www.ivelt.com/

אידישע וועלט (גערופן אייוועלט; ivelt.com) איז א חסידי'שע פארום וועבזייטל אויף אידיש וואו היימישע אידן פארברענגען אויף אן ערליכן שטייגער, און צו יעדע צייט טרעפן א גוט ווארט, מיטהאלטן נייעס און אנטוויקלונגען פון ארום די וועלט, ליינען א שטיקל היסטאריע, הנאה האבן פון א זאפטיגע ארטיקל, און געפינען עצות און הילף אויף פילע הינזיכטן פון לעבן[1].

היסטאריע

אנהויב פונעם 21'סטער יארהונדערט זענען אמעריקאנער חסיד'ישע יונגעלייט געווען היבש אקטיוו אויפ'ן היידפארק פארומס וועבזייטל, בעיקר איבער די חסידישע פאליטיק, וואס זענען געווען באזירט אויף לשון הרע און מחלוקות. א באנוצער (ניק) גערופן "קרעמער" האט דעריבער, אין יאר 2005, געעפנט א סוב-פארום אין היידפארק אוועקגעשטעלט אויף פארברענגען און שמועסן געשמאק, אן קיין צוטריט פאר מחלוקת און אנדערע אומגעוואונטשענע זאכן[2].

אין יאר 2006 איז די "היימישע קרעטשמע" אריבער צו אן אייגענעם וועבזייטל. דער אדמין פונעם סייט האט זיך גערופן מיט'ן ניק נאמען "arender"[3]. ער האט באזירט דעם סייט אויף די בחינם'דיגע phpBB סאפטוועיר, און געעפנט אן אייגענעם דאמעין heimishekretchme.com.

א יאר שפעטער איז דער סייט איבערגעפרישט געווארן, איר נאמען איז געטוישט געווארן אויף "אידישע וועלט" און עס איז אריבערגעפירט געווארן צום דאמעין yiddishworld.com. אין יענע צייט האט מען צוגעלייגט נאך טיילן צום וועבזייטל, אויסער דעם פארום, עס האט פארמאגט נייעס און בילדער אפטיילונגען, און א וויקי. מיט די צייט האט מען צוגעלייגט א פארקירצטער דאמעין ivelt.com, וואס האט שפעטער איבערגענומען אלע אנדערע דאמעינס.

אום יולי 21, 2008 האט דער וועבזייטל געקראכט צוליב א ביז-היינט אומבאקאנטער אורזאך, און דער גאנצער סערווער איז חרוב געגאנגען. מען האט באוויזן צוריקצוברענגען א גרויס חלק דערפון[4], און יענעם דעצעמבער האט מען אריבערגעפירט דעם סייט צו א נייעם איבערגעפרישטן פלאטפארמע[5], וועלכע איז געבליבן בלויז מיט'ן פארום אפטיילונג, און עס איז איינגעפירט געווארן פארשידענע מאסנאמען אז ס'זאל נישט נאכאמאל פאסירן.

אום זונטאג תרומה תשפ"ג, איז דער סייט אריבער א גרעסערער אפדעיט[6] צו דעם לעצטן ווערסיע פון phpBB, און צוגעלייגט א צאל פונקציעס, צווישן דעם א לייק קנעפל זיך צו באדאנקען פאר קאמענטארן וואס מען גלייכט[7]. עטליכע חדשים שפעטער - אין צוזאמענהאנג מיט'ן "מהפיכה-רעוואלוציע קאמפיין" פאר די צדק ארגאניזאציע, האט מען אריינגעלייגט נאך פארשידענע פונקציעס צו מאכן באקוועמער דעם סייט[8].

איבערזוכט

באנוצער

צו קענען שרייבן אויף אייוועלט ברויכט מען זיין רעגיסטרירט. ביים זיך איינשרייבן דארף מען אויסוועלן א ניק-נאמען וויאזוי מען גייט גערופן ווערן, און ענטפערן א זיכערהייט פראגע, דאן דארף מען ווערן אנגענומען דורך איינער פון די מנהלים פונעם סייט.

די באנוצער אויף אייוועלט ווערן באטיטלט מיט א ראנג וואס ערשיינט אויף זייער פראפיל, די ראנג איז באשטימט לויט די צאל תגובות וואס זיי האבן געשריבן, צוערשט ווערט מען גערופן אנשי שלומינו, דערנאך שר העשר, שר החמישים, שר מאה אא"וו[9]. פארהאן א פירונג צו קאנגראטולירן די וואס גייען ארויף א ראנג[10], ווי אויך וועלן געוויסע שרייבן אן ארטיקל וכדומה לרגל דעם ראנג העכערונג[11].

די הנהלה קען אויך שענקען פאר איינעם אן אייגנארטיגן טיטל אלס הכרת הטוב פאר זיין באשטייערונג צום סייט. צ.ב. "קנאפער ידען" איז באטיטלט אלס "שר החסד", און די אקטיווע נייעס ברענגער זענען באטיטלט אלס קארעספאנדאנטן. ווען די באנוצער האלטן אז עמיצער פארדינט א ספעציעלן טיטל, וועלן זיי פירן א קאמפיין דערויף.

מזמן לזמן וועט פארקומען וואלן אויסצווועלן איינע פון די באנוצער אלס "ראש הקהל". דער ראה"ק פארמאגט נישט קיין שום ספעציעלע רעכטן, עס איז בלויז פאר אינטערהאלטונגס צוועקן[12]. די געוועזענע ראשי קהילה בלייבן באטיטלט אלס "מ. [=מלפנים] ראש הקהל". באזונדער קומט פאר בעפאר חודש אדר וואלן אויפצונעמען א פורים רב. דער פ"ר וועט באקומען דעם טיטל אויף זיין פראפיל, און א ספעציעלע קאליר אויף זיין ניק, און וועט געווענליך צושטעלן פרייליכע ארטיקלען דורכאויס דעם פרייליכן חודש.

אינהאלט

אייוועלט איז אייגעטיילט אין א צאל אפטיילונגען, פאר פארשידענע סארט נושאים. עס ווערט געפירט אן אנגייענדיגער קאמפיין דורכ'ן ניק "ציגאנער", גערופן די אינפראסטרוקטור קאמפיין, געצילט צו מסדר זיין און אוועקשטעלן די פארומס און אשכולות פאר די באקוועמליכקייט פון די באנוצער[13].

אין די "נייעס אפטיילונג", ווערט געלופטערט אויף א רעגלמעסיגן פארנעם אלע אידישע און וועלטליכע נייעס, און נייעס פון די לאקאלע אידישע געגנטער[14]. צו באקומען רשות כתיבה אין די נייעס פארומס דארף מען זיך איינשרייבן אין א דעזיגנירטע נייעס גרופע און זיך האלטן צו א צאל תנאים, אריינגערעכנט נישט שרייבן קיין קאמענטארן אין אן אשכול וואס איז דעזיגנירט בלויז פאר נייעס, און נישט שרייבן אויף אן אומסענסיטיוון אופן וואס קען שטערן פאר די ליינער[15].

אייוועלט פארמאגט גאר א שנעלערע ראטע פון ברענגען קראנטע נייעס. א גרויס טייל פון די פאפולאריטעט פון אייוועלט איז צו פארדאנקען די פארגעשריטענע נייעס קוואל. ביי די קריג פון רוסלאנד און אוקריינע וואס איז שטארק נאכגעפאלגט געווארן, האט די אוקריינע קריג אשכול גענאסן פון גאר א שטארקע נאכפאלגערשאפט פאר א לענגערע תקופה.

עס זענען פארהאן אומצאליגע ארטיקלען וואס אייוועלט באנוצער האבן געשריבן און ארויפגעשטעלט אויפ'ן סייט. די ארטיקלען ווערן פובליצירט בדרך כלל אין די "היימישע קרעטשמע" פארום, סיידן אויב די נושא געהערט צו אן אנדער פארום און דער שרייבער באשליסט עס אהינצושטעלן. די גאר געלונגענע ארטיקלען ווערן געלינקט צום פארום "היימישע זשורנאל".

במשך די יארן זענען שוין ארויסגעקומען עטליכע אויסגאבעס, צאמגענומען פון די אייוועלט ארטיקלען (זע ווייטער).

באזונדער ווערט די סייט באנוצט צו פארברענגען און שמועסן צווישן זיך, און דורכטון אקטועלע נושאים. אינעם "דעת הקהל" פארום קען מען אויסשמועסן און דעבאטירן אלע אקטועלע איינגעלעגנהייטן. די פארום "היימישע פארברענגען" איז מיוחד פאר מער פנימי סארט שמועסערייען, די אשכולות פון דארט קומען נישט ארויף ווען איינער זוכט פאר "אקטיווע אשכולות". און אין די "נייעס קאך לעפל" קומען פאר די דעבאטעס איבער פאליטישע נייעס און אקטיוויטעטן.

אין די תורה אפטיילונגען טוט מען דורך פארשידענע תורה'דיגע נושאים. באזונדער איז פארהאן פארומס פאר היסטאריקער און חוקרי הדורות.

די נייע סידיס און בעלי מנגנים ווערן אויסגעשמועסט אין די "היכל הנגינה" אפטיילונג, באזונדער איז פארהאן א סוב-פארום "שירי קודש" אדורכצוטון פארצייטישע חסידישע ניגונים און זייערע מקורות[16]. אין די "אינטערהאלטונגס" פארום שרייבט מען איבער פלעיס און ענטערטעימענטס. אויך ווערט דארט ארויפגעשטעלט רעגלמעסיג אינטערעסאנטע קליפס, וואס זענען כשר און אויסגעהאלטן, אן קיין בילדער פון נשים און אומאויסגעהאלטענע רייד, דאס ווערט ספעציעל גע'כשר'ט און ארויפגעשטעלט פאר די וואס האבן נישט קיין צוטריט צו יו-טוב און אנדערע אלגעמיינע לופטערינג פלאטפארמעס[17].

א ריזן צאל אשכולות זענען מיוחד פאר הילף אין פארשידענע איינגעלעגנהייטן, אנגעהויבן פון געזונטהייט און תורת הנפש, ביז טעכנאלאגיע און פראגראמינג. פארהאן פארומס פאר עקספערטן אין זייערע פאכן זיך אדורכצושמועסן און ארויסהעלפן איינער דעם צווייטן. ס'איז דא א פארום פאר גראפיקער, פאר שפראך מבינים, און נאך פיל.

שפראך

אלע שמועסן און אפהאנדלונגען אויף אייוועלט ווערן געשריבן אויף דער אידישער שפראך. מען וועט אבער אפט מאל נוצן מער א ברייטערע און לופטיגערע שפראך (קרעטשמעריש), עס ווערט גענוצט אפט סלענג ווערטער און סארקאזם. אנדערש ווי פיזישע אויסגאבעס וואס זענען געווענליך מער פארמאל.

במשך די יארן האט זיך אנטוויקלט געוויסע אייגנארטיגע ווערטער אדער קאודס וואס זענען בלויז פארשטענדליך פאר די אייוועלט באנוצער, און זענען נישט באנוצט אין די אלגעמיינע אידישע שפראך. צום ביישפיל: צ"ק - איז אקראנים פאר "צום קעפל", ווען א שמועס פארפארט פונעם קעפל פונעם אשכול, און שרייבט עפעס וואס באציעט זיך צום קעפל, און נישט צום פריערדיגן שמועס. זיראנץ - א צאמשטעל פון "זערא טאלעראנץ". דער באגריף איז געשאפן געווארן דורכ'ן מנהל יאנאש, און ווערט באנוצט צו באצייכענען אן אשכול וואס ווערט שטרענגער אינפארסירט ווי אין אלגעמיין. מחישי - א מעסעזש וואס מען באקומען פונעם אחראי, ווען עפעס וואס מ'האט געשריבן ווערט פארמעקט. צאמשטעל פון "מחיקה אישי". אמר"ש - אקראנים פאר 'אז מען רעדט שוין', אהאנגז"א - א פאפולערע אשכול מיט'ן קעפל "איך האב אייך נאר געוואלט זאגן אז:"[18]. און אזוי ווייטער.

עס איז פארהאן א ספעציעלער אשכול אויף אייוועלט, וואו מען קען אנפרעגן איבער די באדייט פון די פארשידנארטיגע קאודס[19].

פראיעקטן

מורשת חכמי אמעריקא

איינע פון די מי מנוחות אויסגאבעס

אין די ערשטע יארן פון אייוועלט איז געווען אקטיוו אן אינציאטיוו אויסצופארשן און נאכצוגיין די אידישע היסטאריע פון אמעריקא בכלליות, ובפרטיות צו אידענטיפיצירן און טרעפן אינפארמאציע איבער רבנים ואנשי השם וועלכע האבן געלעבט און געווירקט על אדמת אמעריקא מקדמת דנא, און זייער עקזיסטענץ איז פארגעסן געווארן ביים ווידעראויפבלי פון אמעריקאנער אידנטום נאכ'ן צווייטן וועלט קריג[20]. די פראיעקט האט אריינגענומען פיל פארש ארבעט און ריסורטש, וואס איז אנגעפירט געווארן דורכ'ן באנוצער "בן בוזי", און די חברים "מיללער", "פארשלאפן" און נאך. דערפון האט זיך עווענטועל געשאפן אן אומאפיציעלער ארגאנעזאציע פון פארשער און שרייבער וועגן דער געשיכטע, און שפעטער קונה שם געווען אלס "מורשת חכמי אמעריקא"[21]. א ריזן צאל קברים און פארגעסענע אנשי שם זענען אויפגעדעקט געווארן, און פארצייכנט געווארן בכבודם הראוי דורך די אינציאטיוון פון די מורשת[22].

די געפינסן זענען פארצייכנט געווארן אין א גליון ארויסגעגעבן דורכ'ן מורשת, און ארויפגעשטעלט געווארן אויף זייער בלאג[23]. און די אויפגעדעקטע קברים זענען פובליצירט געווארן אין די "קברים" וועבזייטל[24].

הוצאות ספרים ד'אייוועלט

דער מפעל הוצאת ספרים פון אייוועלט, ווערט אנגעפירט דורכ'ן מיטגליד יידישע קהלות, דאס איז א פראיעקט אפצודרוקן אלטע כתבי יד, וואס זענען אוועילעבל אין אנליין ביבליאטעקן. עס ארבעט מיט א געמיינזאמע סיסטעם ווי יעדער נעמט א בלאט און מען איז דאס מפענח, דערנאך שטעלט מען דאס צוזאם און מען פובליצירט דאס אין א PDF פארמאט[25].

אין בלויז א קורצע צייט האט מען אויפגעזעצט און מסדר געווען דעם ספר "בנין שלמה - על התורה ואגדות הש"ס". און דערנאך האט מען געארבעט אויפ'ן ספר "בתי נפש - על התורה" וואס איז געליגן באהאלטן איבער צוויי הונדערט יאר, דער ספר איז געווארן אפגעדרוקט, קודם אין א וועכנטליכען גליון פארמאט און עווענטועל אלס א ספר השלם באופן נאה ויאה[26]. "אין אסאך אנדערע פארום'ס פון תלמידי חכמים און געלונגענע שרייבערס האב איך שוין געזען וואו מ'רעדט מיט קנאה אויף דאס וואס מיר האבן דא מצליח געווען צו טוהן. איך מיין אז דערווייל איז דאס אן אויפטוה וואס קיין שום אנדערע ציבור אדער אנליין פארום האט נאכנישט באוויזן!" - יידישע קהילות[27].

אויסגאבעס און ביכער

במשך די יארן זענען אויסגעפירט געווארן עטליכע פראיעקטן צאמצונעמען געקליבענע אינהאלטסרייכע ארטיקלען געשריבן און פובליצירט דורך אייוועלט באנוצער, און דאס רעדאגירן און אויסשטעלן אין א געהעריגן אויסגאבע פארמאט מיט פראפעסיענעלע גראפיקס[28].

זומער פון יאר תשע"ג זענען ערשינען עטליכע אויסגאבעס פון די "מי מנוחות" סעריע, געשריבן געווארן און ארויסגעגעבן געווארן דורך אייוועלט שרייבער. די ארטיקלען זענען געווען פרישגעשריבן דירעקט פאר'ן אויסגאבע, און נאכנישט געווען פובליצירט בעפאר[29]. טייל פון די שרייבער האבן שפעטער געפאוסט די ארטיקלען אויף אייוועלט צו באקומען קאמענטארן דערויף. מי מנוחות האט נאכגעפאלגט מיט עטליכע נומערן אין ליכט פון פארשידענע געלעגנהייטן במשך די נאכפאלגנדע יארן. די לעצטע און צענטע אויסגאבע איז ערשינען אויף שבת נחמו שנת תשע"ו.

די שרייבער אויסגאבע

אין יאר תשע"ז האט די לאמטערנע רעדאקציע פלאנירט ארויסצוגעבן רעגלמעסיג א אויסגאבע פון ארטיקלען וואס זענען שוין געווען פובליצירט בעפאר אויף אייוועלט[30]. עס זענען למעשה ערשינען בלויז צוויי נומערן דערפון.

סוף יאר תשפ"א איז געגרינדעט געווארן די שרייבער אויסגאבע, וואס האט צאמגענומען די ארטיקלען און לענגערע תגובות פון יענע צייט, עס רעדאגירט און אויסגעשטעלט דורך אן אוועקגעשטעלטן סיסטעם, און איז ערשינען אויף א PDF פארמאט. דאס פרעזענטירן די ארטיקלען האט געגעבן א שטופ פאר די שרייבער, און האט געברענגט צו אן אויפשטייג פון העכערע קאליבער ארטיקלען. די שרייבער אויסגאבע איז ערשינען רעגלמעסיג אויף א וועכנטליכן פארנעם במשך א לענגערע תקופה, און איז אויך פארקויפט געווארן אין א געדרוקטן פארמאט אויף די עמעזאן פלאטפארמע[31]. בכדי עס צו געבן מער א פארמאלע אויסזען, האט מען פארביטן די ניק-נעמען פון די שרייבער אויף פארמאלע פען-נעמען, און ארויסגענומען די זאצן וואס רעדן פון אייוועלט איינגעלענגהייטן. בסך הכל זענען ערשינען 49 אויסגאבעס פון די שרייבער סעריע[32].

ווי אויך זענען ערשינען עטליכע ביכער פון נאוועל געשיכטעס וואס זענען פובליצירט געווארן אויף אייוועלט אין א פארזעצונג[33]. און נאך א צאל אינדעווידועלע אויסגאבעס צו פארשידענע געלענהייטן.

אייוועלט סידי פראדוקשאן

נאך א אייוועלט פראיעקט איז דאס נעמען סינגלס און טרעקס וואס קומען ארויס און ווערן פארשפרייט אומזינסט, און צאמשטעלן דערפון א גאנצער אלבום, מיט א קאווער און א ביכל, צו קענען הערן אין שטוב אדער אין קאר[34]. עס זענען שוין ארויסגעקומען פארשידענע קאלעקציעס פון זינגערס אדער צו געלעגנהייטן[35].

צדקה וחסד

אלס פארום וווי אזויפיל חסידישע אידן געפונען זיך צוזאמען, וועט אוודאי נישט ווערן אויסגעלאזט די געלעגנהייט פון טון צדקה וחסד מיט אידישע קינדער, פארשידענע צדקה קאמפיינס זענען שוין סוקסעספול געווארן דורכגעפירט, קלענער און גרעסערע.

אין יאר ה'תשפ"א האט אייוועלט אין א סוקסעספולע קאמפיין באוויזן צו שאפן איבער $300,000, פאר א זכות פאר איינער פון די מיטגלידער המצפה לישועה. די "תחיית המתים" קאמפיין איז פאררופן געווארן דורכ'ן סייט אדמין "וויכטיג מאכער"[36], און איז געבראכן געווארן אין א "כינוס הניקים" פאררופן אויף שבעה עשר בתמוז נאכמיטאג[37], מיט די באטייליגונג פונעם רעקארד-ברעכנדער ציפער פון 751 באנוצער[38]. דורכאויס דעם קאמפיין איז געשאפן געווארן בס"ה $301,459 דורך 201 תורמים[39] און 57 טיעמס[40].

ביי צדק'ס קאמפיין "מהפיכה לדורות" צו פינאנצירן א געזעץ פארשלאג וואס אנשפרעכט צו בעניפיטירן די מצפים לישועה אויף זש"ק, האט דער סייט אדמין "וויכטיג מאכער" גענומען א גאול פון $100,000, און האט איינגעשפאנט אלע אייוועלט באנוצער צו נעמען א טייל אין דעם קאמפיין. לאור דעם האט ער פארשפראכן א רעוואלוציע אינעם סייט, מיט א פרישע אפדעיטס פון א נייע פיטשער פאר יעדע 100 אלפים וואס קומט אריין אויף זיין פעידזש.

פארמעסטן

במשך די יארן זענען פארגעקומען א רייע פארמעסטן צווישן די באנוצער. די באקאנטע לאגא פון אייוועלט, איז דעזיינט געווארן דורך א באנוצער "אינטעליגענט" ביים אייוועלט-לאגא פארמעסט[41]. אויך זענען פארקומען פארמעסטן איבער גראפיקס, שרייבעריי, און פאעזיע, וואו די באנוצער האבן ארויסגעוויזן זייערע טאלאנטן און פעאיגקייטן[42].

תקנות און צענזור

די אידישע וועלט פארומס פארמאגט א רייע תקנות און רעגולאציעס, און עס ווערט געפירט מיט א שטרענגע צענזור, כדי דאס פלאץ זאל זיין אויסגעהאלטן על פי תורה און גלייכצייטיג באקוועם פאר אלע מיטגלידער. די תקנות זענען מחייב אלע באניצער פונעם סייט, און אויף א פארלעצונג קען מען ווערן אויסגעשפארט[1].

די תקנות נעמען אריין אז מען זאל נישט שרייבן איבער פריוואטע מענטשן, נישט אריינגיין אין שמועסן וואס גרעניצן זיך מיט לשה"ר און הלבנת פנים, נישט לייגן קיין בילדער פון פרויען, און אומאויסגעהאלטענע לינקס. די תקנות ווערן אינפארסירט דורך די מנהלים און אחראים אויפ'ן סייט, וואס פארמאגן די מעגליכקייט צו פארריכטן און פארמעקן תגובות, און אויסשפארן באנוצער.

איין קאנטראווערסיאלע תקנה איז אז אזויווי די פארוואלטער פון דעם פלאץ געהערן צו סאטמאר, דארף אלעס וואס ווערט געשריבן זיין אויסגעהאלטן לויט די שיטה פון הרה"ק מ'סאטמאר זי"ע. ס'איז נישט ערלויבט צו שרייבן ציונות, שרייבן אויף העברעאיש, און באריכטן פאליטישע נייעס פון מדינת ישראל[1]. גאר א שטארקע דגוש ווערט געלייגט זיך צו האלטן נוטראל און נישט זיך מישן אינערהאלב די מחלוקת פון חסידות'ן, ובפרט די סאטמארע פאליטיק. טראצדעם זענען כסדר פארהאן קעגנזייטיגע באשולדיגונגען אז די הנהלה איז גענויגט מער צו איין זייט.

קריטיק און קאנקורענץ

כאטש ס'איז דא וואס וועלן קאטעגאריזירן אייוועלט אלס סאציעלע מידיע[43], טוט דאס נישט זיין קיין אפהאלט פון זיך צו באנוצן דערמיט, וויבאלד עס פארמאגט נישט די פילע פראבלעמען פון די אלגעמיינע מידיע, זינט עס פארמאגט א שטרענגע צענזור סיסטעם, וואס לאזט נישט לופטערן סיי וועלכע חומר וואס איז נישט פאסיג פאר א חרדי'שער איד.

געוויסע פאפולערע פיגורן טוען צומאל אויפברענגען אומצופרידנהייט, אז פארשלייערט הונטער א ניק קען סיי ווער אראפרייסן און קריטיקן אן נעמען די מינימום פאראנטווארטליכקייט דערויף.

טייל באנוצער רעדן זיך צומאל אפ אויף די שטרענגע צענזור אינפארסירונג, און עס קומט פאר כסדר'דיגע דעבאטעס מיט די מנהלים איבער דעם[44]. אבער מערסטנס באנוצער זענען איינשטימיג אז עס מוז זיין א געוויסער צענזור צו האלטן דעם סייט אין די ראמען.

אין יאר תשע"ב האבן א צאל אקטיווע באנוצער פון אייוועלט, זייענדיג אויפגעברויזט אויף די שטרענגע צענזור, אפגעלאזט דעם סייט, און זענען אריבער צו אן אייגענעם פארום מיט'ן נאמען קאווע שטיבל. א פיל ווייניגער אקטיווער סייט, וואו עס איז ערלויבט צו לייגן בילדער פון נשים, און שרייבן ליבעראלע און אפיקורס'ישע געדאנקען, רוב היימישע פילטערס לאזן נישט קיין צוטריט דערצו.

אין יאר 2023 האבן עטליכע באנוצער וואס באלאנגען צו חסידי מהר"א מ'סאטמאר געהאלטן אז די הנהלה פירט זיך נישט יושר'דיג מיט זיי, און האבן געגרינדעט א נייעם פארום אידטיש, וואס איז ווייניגער שטרענג מיט צענזורירן די שמועסן ארום חסידות און פאליטיק[45]. דער משומר פילטער וואס באלאנגט צו מהרי"י, טוט נישט ערלויבן צוטריט דערצו[46], דערפאר איז דער סייט געווענליך מער גענויגט צו צד מהר"א.

גילוי

גאר א הארבע פארלעצונג איז די נושא פון גילוי. אזויווי רוב באנוצער באהאלטן זייער אידענטיטעט און שרייבן אונטער א שלייער פון א ניק, און זענען נישט מסכים ארויסקומען עפנטליך ווער זיי זענען, איז גאר שטרענג אינפארסירט די רעכט פון די שרייבער צו בלייבן אין געהיים. אויב איינער פובליצירט פריוואטע דעטאלן פון א צווייטער באנוצער, אדער פרובירט צו דערגרינטעווען א צווייטנ'ס אידענטיטעט ווערט זיין אקאונט אויסגעשפארט פאר אייביג[47].

טראץ די אלגעמיינע אטמאספערע צו שרייבן בלויז מיט א ניק-נאמען, זענען פארהאן א קליינע צאל באנוצער וואס זענען יא גרייט ארויפצוקומען מיט זייער אמת'ע אידענטיטעט, א שטייגער ווי אליעזר קרויס פון קול מבשר, הרב יואל קליין, ארי גרינפעלד פון גרינטאטש טעק. פירמע, און נאך.

פאפולאריטעט

אייוועלט האט זיך ארויסגעשטעלט צו זיין דער מערסט פאפולערער פארום זייטל ביים אידיש-רעדנדער חרדי'שן עולם. כהיום זענען פארהאן נאנט צו 15,000 איינגעשריבענע באנוצער אויף אייוועלט. שוין געשריבן געווארן איבער 4 מיליאן תגובות אין נאנט צו 60,000 אשכולות[48]. נישט אלע תגובות זענען אבער וויזועל פארן פובליקום, זינט עס זענען פארהאן א צאל פארומס וואס זענען פריוואטע פארומס און זענען נישט אפן פאר אלגעמיינע באנוצער, ווי אויך רעכנט די ציפער אויך אריין די פארמעקטע תגובות.

די מערסטע צאל באנוצער אויף איינמאל איז געווען אום מאנטאג אקטאבער 9, 2023 2:54 pm, ווען עס איז געווען 1399 באנוצער אויפ'ן סייט, דאס איז געווען באלד נאך די שוידעליכע כאמאס אטאקע אויף ארץ ישראל, וואס האט געצויגן די אינטערעסע פון אלע אידן איבער די וועלט. (דאס איז אויסער וואס איז איינמאל געווען 2432 באנוצער אויפאמאל, אין רעזולטאט פון אן אטאקע נאכ'ן ארויסשטעלן א געליעקטע נייעס פון רוסלאנד[49]). די גרויסער פאפולערקייט פון אייוועלט ברענגט אז געוויסע פירמעס און עסקנים זאלן שפירן פאר וויכטיג ארויפצוקומען אויף אייוועלט צו פארטרעטן זייערע אינטערעסן און זיך אויסקלארן מיט'ן עולם. עטליכע רעדנער פון קול מבשר פירן זיך אויסצודעבאטירן זייערע רעדעס אויף אייוועלט[50]. דער באקאנטער זינגער ליפא שמעלצער איז ארויפגעקומען אדרעסירן זיין נייעם אלבום און די קאמענטארן דערויף[51].

טראצדעם, ווערט די עקזיטענץ פונעם סייט געהאלטן אין געוויסן מאס פנימי. מען וועט נישט רעדן דערפון אין פובליק, און אפיציעלע אויסגאבעס וועלן זיך צוריקהאלטן דאס צו דערמאנען אין זייערע בלעטער. ווען א בעל דרשן אדער רעדנער דערמאנט ברבים דעם נאמען אייוועלט אדער א ניק-נאמען פון איינע פון די באנוצער, ווערט דערפון א סענזאציע.

דרויסנדע לינקס

רעפערענצן

  1. ↑ 1.0 1.1 1.2 תקנות, אויף אייוועלט
  2. ↑ קרעמער (ניק) ,"אינטערוויא מיט'ן מייסד הקרעטשמע "קרעמער"", ארטיקל אויף אייוועלט
  3. ↑ arender (ניק) ,"ברוכים הבאים", דאנערשטאג יוני 22, 2006 10:37 pm, ארטיקל אויף אייוועלט
  4. ↑ arender (ניק) ,"מיר זענען צוריק אפען + סך הכל", מוצ"ש אוגוסט 07, 2010 9:22 pm, ארטיקל אויף אייוועלט; "וואס איז געווען, וואס גייט אי"ה זיין + וויכטיגע אינפארמאציע", מיטוואך יולי 28, 2010 11:26 am, אשכול אויף אייוועלט.
  5. ↑ arender (ניק) ,"אלעס איבער דאס איבערבוי פונעם סייט.", זונטאג דעצעמבער 12, 2010 11:19 pm, ארטיקל אויף אייוועלט
  6. ↑ arender (ניק) ,"וועבזייטל אפדעיט זונטאג תרומה תשפ"ג באריכט", זונטאג פעברואר 19, 2023 11:10 am, ארטיקל אויף אייוועלט
  7. ↑ אידישע וועלט (ניק) ,"ברוכים הבאים - סך הכל פונעם אפדעיט", זונטאג פעברואר 19, 2023 1:02 pm, ארטיקל אויף אייוועלט
  8. ↑ מהפיכה קאמפיין, מהפיכה קאמפיין - נאטיצן ביכל, אויף אייוועלט, ‏מיטוואך מאי 17, 2023 2:13 pm
  9. ↑ אפט געפרעגטע פראגעס, אויף אייוועלט
  10. ↑ "מזל טוב פאר אונזערע מערסטע שרייבערס", אשכול אויף אייוועלט
  11. ↑ ארחיקה נדד (ניק) ,"99999 סינדראם!", ארטיקל אויף אייוועלט
  12. ↑ קרעטשמער (ניק) ,"~~שטאטוטן איבער די ראש הקהל וואלן (ריווייזט)~~", ארטיקל אויף אייוועלט
  13. ↑ ציגאנער (ניק) ,"קרעטשמע אינפראסטראקטור פראיעקט; אפדעיטס און קאמענטארן", זוטאג דעצעמבער 11, 2022 10:48 am, ארטיקל אויף אייוועלט
  14. ↑ נייעס, אויף אייוועלט
  15. ↑ וויכטיג מאכער (ניק) ,"צו קענען שרייבן אין די נייעס פארום ליינט די אשכול!", דאנערשטאג אקטאבער 19, 2023 11:24 am, ארטיקל אויף אייוועלט
  16. ↑ סטאוו יא פיטא (ניק) ,"ברוכים הבאים - קבעו שיר ורננים", מיטוואך נאוועמבער 24, 2021 12:38 am, ארטיקל אויף אייוועלט
  17. ↑ "אינטערעסאנטע קליפס", אשכול אויף אייוועלט
  18. ↑ "איך האב אייך נאר געוואלט זאגן אז:", אשכול אויף אייוועלט
  19. ↑ "אייוועלט קאודס...", אשכול אויף אייוועלט
  20. ↑ פלטיאל, אינטערוויא מיללער חלק ב - מורשת חכמי אמעריקא, אויף אייוועלט, ‏דינסטאג דעצעמבער 01, 2015 4:29 pm
  21. ↑ בן בוזי, די פעולות פון מורשת חכמי אמעריקא; אנקעטע, אויף אייוועלט, ‏מאנטאג יולי 06, 2015 12:40 pm
  22. ↑ ידיעות שונות, מפתח: היסטאריע פון אידישקייט אין אמעריקא, אויף אייוועלט, ‏פרייטאג מאי 25, 2018 12:56 am
  23. ↑ מורשת חכמי אמעריקא
  24. ↑ קברי צדיקים באמעריקא, אויף kevarim.com
  25. ↑ יידישע קהילות, אונזער ספרים שאפע, אויף אייוועלט, ‏דאנערשטאג אפריל 23, 2015 2:01 pm
  26. ↑ קרעטשמער, ברוכים הבאים צום נייעם פארום, ‏פרייטאג אפריל 17, 2015 1:56 pm
  27. ↑ יידישע קהילות
  28. ↑ רעים, מפתח אייוועלט אויסגאבעס, אויף אייוועלט, הערליכע אויסגאבעס ארויסגעגעבען בחינם דורך טאלאנטפולע שרייבער פון די אידישע וועלט, ‏דינסטאג נאוועמבער 16, 2021 7:29 pm
  29. ↑ געלעגער, אייוועלט זומער אויסגאבע..., אויף אייוועלט, ‏מוצ"ש יוני 08, 2013 11:35 pm
  30. ↑ לאמטערנע, לאמטערנע - א שטראל אין די אידישע וועלט, אויף אייוועלט, ‏דאנערשטאג פעברואר 23, 2017 12:59 pm
  31. ↑ שרייבער מאגאזין, אויף עמעזאן
  32. ↑ איינס, שרייבער אויסגאבע - נאטיפיקאציע אשכול, אויף אייוועלט, ‏פרייטאג אוגוסט 13, 2021 10:10 am
  33. ↑ רעים, אייוועלט לייבערי, אויף אייוועלט, מפתח פון ביכער געשריבען און ארויסגעגעבען דורך אייוועלט, ‏דאנערשטאג נאוועמבער 18, 2021 3:45 pm
  34. ↑ נאר מיט שמחה, אייוועלט פרעזענטירט נייע סידי'ס - הערות והגהות!!, אויף אייוועלט, ‏מאנטאג אקטאבער 19, 2020 3:24 pm
  35. ↑ רעים, מפתח סידי ארויסגעגעבען דורך אייוועלט, אויף אייוועלט, ‏דאנערשטאג נאוועמבער 25, 2021 4:48 pm
  36. ↑ וויכטיג מאכער, ברוכים הבאים צו תחיית המתים ביי די 24!!!, אויף אייוועלט, ‏זונטאג יוני 27, 2021 2:15 pm
  37. ↑ וויכטיג מאכער, הכונו ל'מעמד אדיר איום אסיפת הניקס לטוהר המחנה!!!, אויף אייוועלט, ‏מיטוואך יוני 23, 2021 10:55 am
  38. ↑ אלעקסיי דער דריטער, מערסטע צאל וואס זענען אמאל געווען אריינגעסיינט:, אויף אייוועלט, ‏זונטאג יוני 27, 2021 2:39 pm
  39. ↑ אידישע וועלט, התודה והברכה, אויף אייוועלט, ‏מאנטאג יולי 12, 2021 8:47 pm
  40. ↑ ivelt, אויף טשערידי
  41. ↑ אינטעליגענט, iVelt לאגא פארמעסט, אויף אייוועלט, ‏מיטוואך אוגוסט 17, 2011 4:16 pm
  42. ↑ רעים, מפתח אייוועלט פארמעסטען, אויף אייוועלט, ‏מיטוואך נאוועמבער 17, 2021 7:32 pm
  43. ↑ הלבלר בקולמסו, קען אייוועלט פאררעכנט ווערן אלס סאשעל מידיע???, אויף אייוועלט, ‏מיטוואך אקטאבער 06, 2021 12:10 am
  44. ↑ אפענע שמועס איבער די צענזור פון אייוועלט, אויף אייוועלט
  45. ↑ אידטיש - צייט פאר התבוננות, אויף אידטיש
  46. ↑ אלעס ארום פילטערינג פירמעס אנבאלאנגט אידטיש, אויף אידטיש
  47. ↑ סאכדעס, ארור מכה רעהו בסתר, אויף אייוועלט, ‏מיטוואך יאנואר 07, 2009 12:13 am
  48. ↑ סטאטיסטיק, אויף אייוועלט
  49. ↑ קנאפער ידען, מערסטע צאל וואס זענען אמאל געווען אריינגעסיינט:, אויף אייוועלט, ‏פרייטאג פעברואר 25, 2022 4:26 pm
  50. ↑ אליעזר קרויס, אין אשכול אקטועלע אנאליזן מיט הרב אליעזר קרויס-קול מבשר, אויף אייוועלט. משה שפיצער, אין אשכול ידיעות און פליאות מיט ר' משה שפיטצער, אויף אייוועלט.
  51. ↑ ליפא שמעלצר, ערשטמאליגע אפנהארציגע בריוו, ליפא שמעלצר צו אייוועלט, אויף אייוועלט, ‏מיטוואך מארטש 02, 2022 5:19 am
גענומען פון "https://yi.hamichlol.org.il/w/index.php?title=אייוועלט&oldid=319714"