רוי:בעלזא (חסידות)
בעלזא איז א חסידות געגרינדעט דורך הרב רבי שלום רוקח אין דער שטאט בעלזא אין מזרח גאליציע, אמאל פוילן, היינט אוקראינע. דער הויף ציילט צענדליגער בתי מדרש און חינוך אין אסאך אידישע קהילות אויף דער וועלט.
געשיכטע
הרב שלום
הרב שלום, וואס ווערט גערופן דער ערשטער בעלזער רב איז געווען באקאנט אלס וועלט'ס בארימטער בעל מופת צו וועמען צענדליגער טויזנטער אידן און נישט אידן האבן געשטראמט אויף ישועות און רפואות. צו ווערן אויסגעהאלפן און אויסגעהיילט. ביי א סאך תלמידים פון דעם חוזה פון לובלין, רבי יעקב יצחק הורוויץ, איז ער געווען אנגענומען אלס דער ממשיך דרכו. ער האט אויפגעבויט אין זיינער צייט די שענסטע שול אין גאליציע. ער איז נפטר געווארן כ"ז אלול ה'תרט"ו, און ליגט אין שטאט בעלזא.
הרב יהושע
הרב יהושע, דער מיטעלער בעלזער רב, נאך אים האט איבער גענומען דאס רבנות פון דעם שטעטל בעלזא זיין יונגסטער זון הרב יהושע רוקח, באקאנט אלס דער גרויסער לוחם קעגן דער רעפארם באוועגונג און משכילים. ער האט געגרינדעט אן ארטאדאקסישע באוועגונג אין גאליציע באקאנט אלס 'מחזיקי הדת'. אויך האט ער געגרינדעט דעם ערשטן ארטאדאקסישן צייטשריפט אונטערן נאמען 'קול מחזיקי הדת'. ער איז נפטר געווארן כ"ג שבט תרנ"ד אין וויען, עסטרייך נאך א געפאהרפולער אפאראציע וואס ער איז אריבער, און ליגט אין בעלזא.
הרב ישכר דוב
נאך הרב יהושע איז דאס רבנות פון בעלזא אריבער צו זיין צווייטן זון הרב ישכר דוב רוקח, אנגערופן דער פריערדיגער בעלזער רב. באקאנט אלס חכם הרזים און א געוואלדיגער קלוגער מענטש. אויך זיין גאונות און גדלות בתורה האט באקומען א נאמען און צעשפרייט געווארן איבער גאנץ אייראפע ווי אויך ארץ ישראל און אמעריקע. ביי דער ערשטער וועלט'ס קריג האט ער אויסגעוואנדערט אויף אונגארן ווי ער האט זיך אויפגעהאלטן און מונקאטש און אין ראצפערט. זייענדיג און מונקאטש האט אויסגעבראכן די באקאנטע מחלוקה צווישן מונקאטש און בעלזא, הויפטזעכטליך צוליב דער קפידא פון דעם ארטיגן שטאט'ס רב רבי חיים אלעזר שפירא באקאנט אלס מחבר פון ספר 'מנחת אלעזר'. ער איז נפטר געווארן כ"ב מרחשון תרפ"ז, און ליגט אין בעלזא.
הרב אהרן
נאך הרב ישכר דוב איז געקרוינט געווארן זיין עלטסטער זון רבי אהרן רוקח אלס רב פון דער שטאט בעלזא. באקאנט אלס זעלטענער פרוש און קדוש וטהור, עס איז געפאלען א שרעקליכע פחד דקדושה אויף יעדער וואס האט נאר געקוקט אויף זיין הייליגער געזיכט, אלע צדיקים פון זיין דור האבן זיך מכניע געווען פאר אים, ער איז אנגענומען אלס דער ריכטיגער 'צדיק הדור' פון זיינער צייט ביי אלע חסידישע און אפילו טייל ליטווישע קרייזן אן אויסנאם.
נאך דער חורבן אייראפע האט רבי אהרן רוקח זצ"ל, וועלכער איז געווען באקאנט אלס א מלאך אלוקים מיט זיין הייליגער פירונג, צוריק אויפגעבויט די קהילה אין ארץ-ישראל און אין חוץ-לארץ. ער איז נפטר געווארן פלוצלינג מוצאי שבת עקב כ"א אב תשי"ז אין ירושלים עיר הקודש, זיין פטירה האט אויפגעשוידערט דעם גאנצן ארטדאקסישן יודענטום איבער דער גארער וועלט. ער ליגט אין הר המנוחות אין גבעת שאול, ירושלים.
הרב ישכר דוב (היינטיגער רבי)
ניין יאר נאך זיין פטירה האט מען אויפגענומען זיין פלומעניק הרב ישכר דוב רוקח, די הכתרה איז פארגעקומען נאך דעם וואס ער האט חתונה געהאט מיט דער טאכטער פון דעם וויזשניצער רבי'ן משה יהושע האגער אין אדר ה'תשכ"ו, נאך איידער ער איז געווארן אכצן יאר אלט.
אונטער זיין הנהגה האט דאס חסידות געבליעט. די הויפטקווארטיר געפינט זיך אין קרית בעלזא, ירושלים, וואו מ'האט געבויט דעם בעלזער בית מדרש אין א ריזיגער געביידע, אויפן סטיל פונעם בית מדרש אין דער שטאט בעלז. לעבן דעם בית מדרש געפינט זיך דעם רבי'נס הויז, און אין דער ארומיגן געגנט וואוינען בערך טויזנט בעלזער חסידים.
דער רבי לייגט אריין א ספעציעלע ארבעט אין חינוך, וואו ער מאכט חידושים אין נייע איינפירונגען, ווי צום ביישפיל דעם באניץ פון פסיכאלאגן און סאציאלע באדינונגען אין זיינע מוסדות, און אויך אין קירוב רחוקים. ער האט אויפגעשטעלט די ארגאניזאציעס "תורה ואמונה" "צהר" אין "הידברות", וועלכע זענען באקאנט און דעם עולם התשובה אין ארץ ישראל. אויך האט דער רבי סטימולירט ר' מיילעך פירער אויפצושטעלן די עזרה למרפא ארגאניזאציע.
אין ארץ ישראל האט בעלזא שטיבלעך אין בני ברק, אשדוד, בית שמש, תל אביב, קרית גת, נוף הגליל און חיפה; אין חו"ל אין בארא פארק, מאנסי, וויליאמסבורג, סטעטן איילענד, לעיקוואד, מאנטרעאל, אנטווערפן, לאנדאן, מאנטשעסטער, ציריך, ווין, מעלבארן און סאא פאולא.
א קליינט צאל פון די חסידים האבן זיך נישט געוואלט אונטערווארפן אונטערן נייעם רבי'ן און האלטן זיך נאך בעלזער חסידים פון רבי אהרן רוקח זצ"ל. זיי האבן אנגענומען אלס יהושע רוקח, אדמו"ר פון מאכניווקא.
בעלזער ישיבות
דאס בעלזער חסידות האט זעקס ישיבה גדולות אין ארץ ישראל:
- די אלטע ישיבה אין אגריפס גאס אין ירושלים, געגרינדעט אין תש"י. היינט איז דער ראש ישיבה הרב אהרן רובינפעלד.
- די בעלזער ישיבה אין בני ברק, דער ראש ישיבה איז הרב חיים צבי שפירא.
- די בעלזער ישיבה אין חיפה דער ראש ישיבה איז הרב בערל רעכניצער.
- די בעלזער ישיבה אין אשדוד דער ראש ישיבה איז הרב מאיר ראזענגארטען.
- די בעלזער ישיבה "ישמח לב" אין אשדוד דער ראש ישיבה איז הרב שלמה לווינגער.
- די בעלזער ישיבה אין בית שמש דער ראש ישיבה איז הרב שלמה בינעטה.
אין יאר תשס"ו האט מען אויפגעשטעלט א ישיבה פאר עלטערע בחורים וואס האבן שוין געלערנט דריי יאר אין ישיבה גדולה. די ישיבה איז געווען אין ירושלים אין דעם בנין פון קאלעוו אין שיכון חב"ד, ווי אויך אין הר חוצבים, און געפינט זיך היינט אין גבעת שאול, ירושלים, אינעווייניג פון דער באקאנטער דיסקין געביידע
אין אלול פון יאר תשע"ג האט מען אויפגעשטעלט די ישיבה קדושת אהרן וואס געפינט זוך אינעם גרויסן בעלזער בית המדרש אין ירושלים.
בעלז האט ישיבה קטנות אין ירושלים, בית חלקיה, טעלז סטאן, קוממיות, בני ברק, אשדוד, בית שמש, לאנדאן, מאנטשעסטער, אנטווערפן, מאנטרעאל, בארא פארק און מאנסי.
אנזיכטיקע חסידים
פריערדיגע:
- הרב דוד מנחם מאניש באב"ד - טארנאפאלער רב, מחבר פון שו"ת "חבצלת השרון".
- הרב יהושע מענדל עהרנבערג - אב"ד אין תל אביב, באוואוסטער פוסק.
- רבי יוסף גרינוואלד - רב פון פאפא און מנהיג פון פאפער חסידות אין ברוקלין.
- הרב יעקב יצחק ניימאן - רב אין פאפא; נאכן חורבן אייראפע רב פון דער בעלזער קהילה אין מאנטרעאל
- חיים מאיר יחיאל שפירא - נאראלער רב; נאכן חורבן אייראפע נאראלער רבי אין בני ברק
היינטיגע:
- הרב פנחס פרידמאן - ראש הכוללים דחסידי בעלזא אין ארץ ישראל
- הרב יעקב גרינוואלד - חבר הבית דין פון קהל מחזיקי הדת בארץ ישראל
- הרב מאיר דוב רעכניצער מחותן פון די בעלזער רבי, אין ראש ישבה פון בעלזער ישבה אין חיפה
- הרב שמאי קהת הכהן גראס, בארימטער פוסק, מחבר ספר "שבט הקהתי"
- הרב אברהם דירנפעלד - חבר הבית דין פון קהל מחזיקי הדת, רב פון בעלזא קהילה אין תל אביב אין בית שמש, ראש רשת כוללי עיון דחסידי בעלזא
- אלימלך פירער, מעדיצינישער עסקן אין ישראל
- ישראל אייכלער דעפוטאט אין כנסת
וועבלינק
| וויקימעדיע פונדאציע פּראיעקטן |
|---|
 בילדער און מידיע אויף וויקימעדיע קאמאנס: בעלזא (חסידות) |
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!