רוי:רבי אברהם יהושע העשיל (אפטא)

רבי אברהם יהושע העשיל פון אפטא

דער ציון פון אפטער רב
געבורט	1748 ה'תק"ח דזימיגראד
פטירה	מערץ 24 1825 (אלט: 77 בערך) ה' ניסן ה'תקפ"ה מעזעביזש
כינוי	אפטער רב
מקום קבורה	מעזעביזש
וואוין אָרט	דזימיגראד, קאלבאסאוו, אפטא, יאסי, מעזעביזש
טעטיגקייט אָרט	קאלבאסאוו, אפטא, יאסי, מעזעביזש
רבי'ס	זלאטשוב'ער מגיד, רבי אלימלך פון ליזענסק
ספרים	"אוהב ישראל", "תורת אמת"
טאטע	רבי שמואל רב פון ניישטאט, פון די גרויסע רבנים אין פוילן
מאמע	מרת רחל מרגלית
ערשטער אדמו"ר פון אפטא יוסף משה העשיל יצחק מאיר העשיל ←

רבי אברהם יהושע העשיל פון אפטא (ווערט אויך אנגערופן אפטער רב; דער אוהב ישראל, אויפן נאמען פון זיין ספר); (ה'תק"ח – ה' ניסן ה'תקפ"ה) איז געווען א רבי, דער ערשטער אינעם אפטא-מעזשיבוזשער דינאסטיע.

ביאגראפיע

נוסח פון זיין מציבה
פ”נ הרב אדמו”ר אוהב ישראל מ”ה אברהם יהושע העשיל מק’ אפטא בהרב החסיד ועניו שלשלת היוחסין מ’ שמואל ז”ל. נפ’ ה’ ניסן תקפ”ה. לעת זקנותו תקע אהלו של תורה פ”ק מעזבוז ולו דומי’ תהילה ובמקום גדולתו שם ענותנותו, אשר יצוה את בניו שלא לכתוב על מצבתו שבחות. תנצב”ה.

רבי אברהם יהושע העשיל איז געבוירן אין יאָר ה'תק"ח צו רבי שמואל, איידעם פון רבי יעקב פון טאָרטשין (–י"ט סיון ה'תקמ"ה), וועלכער האט געשטאמט פון רבי העשיל פון קראקא, ט"ז, מהר"ם פון לובלין, מהר"ם פאדוואה און נאך גרויסע פערזענליכקייטן. זיין פאטער הרב שמואל, וועלכער האט געדינט אלס רב פון ניישטאט, איז געווען איינער פון די חשוב'סטע רבנים פון פוילן, און האט אויך געשטאמט פון בארימטע רבנישע משפחות.

אין זיין יוגנט האט ער שוין ארויסגעוויזן גרויסע פעאיגקייטן, און איז געווארן באקאנט אלס א גרויסער למדן. ער האט דאן משיג געווען הויכע מדרגות, ווי אז זיינע גלידער, די גראז פון פעלד, און די טריט פון א מענטש האבן אים געזאגט עתידות. ער האט אבער געבעטן פון הימל אז מ'זאל דאס אוועקנעמען פון אים.

ער האט אנגעהויבן זיין קאריערע אלס רב פון דער שטעטל קאָלבאסאָוו אין פּוילן אום ה'תקמ"ח וואו ער האט אסאך געליטן^{[אויסקלארונג פארלאנגט]}. נאך זייענדיג אין קאלבאסאוו האבן אים רבי לוי יצחק פון בארדיטשוב און רבי משה לייב סאסובער געצויגן צו רבי אלימלך פון ליזענסק, פון וועם ער איז געווארן פון די גרעסטע תלמידים.

אום ה'תק"ס האָט ער מסכים געווען צו ווערן באַשטימט אלס רב אין אפטא, פוילן. אום ה'תקס"ח איז ער פאררופן געווארן דורך דער חסידישער באנקיר יחיאל דניאל צו דינען אלס רב אין יאסי, מאלדאווע וואו ער האט אויך צוגעזאגט צו צושטעלן א הויז אין וואס ער וועט קענען אויפנעמען די וואס וועלן קומען לערנען מיט אים. אוועק פארנדיג פון אפטא האט ער זיי צוגעזאגט ער וועט זיך שטענדיג רופן אפטער רב. אויך אין יאסי האט ער עס נישט געהאט לייכט, און אין יאר ה'תקע"ג, נאך וואס אין קהילה אין יאסי איז געווארן מחלוקת, האט ער געמוזט אנטלויפן און איז אריבער קיין מעזשיבוזש אין פאדאליע (אוקראינע) וואו עס זענען געווען אסאך חסידים נעבן אים. ער האט ווייטער געהאלטן קאנטאקטן מיט די חסידישע קהילות פון מאלדאווע, און איז צומאל אויך גערופן געווארן צו לייזן הלכה'דיגע פראגעס.

אין זיינע לעצטע יארן איז ער געווען דער זקן האדמו"רים אין זיין דור, און זיין מיינונג איז געווען פאררעכנט ביי אלע חסידים. זיין מערסטאויסגעצייכנט שטריך איז געווען זיין ליבשאפט צו אידן^{[מקור פארלאנגט]}.

ער האט זיך געשטעלט קעגן עטליכע דרוקן פון אנדערע חסידישע הויפן ווי פאלגנד: ער האט נישט מסכים געווען מיט די באוועגונג פון רבי צבי הירש פון זידיטשוב און איז געווען קעגן זיין איניציאטיוו איבערצודרוקן און ווידער פארשפרייטן דעם ספר הזוהר. אזוי אויך האט ער זיך קעגן געשטעלט און אפילו געשאלטן די וואס האבן געוואלט דרוקן דעם ספר המשלים פון רבי נחמן מברסלב, זאגנדיג: "הייתכן אז סודות התורה זאלן געדרוקט ווערן אין א שפראך פון קינדער און ווייבער".

ער איז אוועק ה' ניסן ה'תקפ"ה, און איז באערדיגט געווארן אין מעזעביזש נעבן דעם בעל שם טוב אינעם זעלבן אוהל. ער האט באפוילן אז מען זאל נישט שרייבן קיין שום שבחים אויף זיין מציבה. די חסידישע לעגענדע זאָגט, אַז מלאכים האָבן געטראָגן זיין קערפער און באערדיגט אין בית החיים אין טבריה וואו עס איז געשטעלט געווארן אַ סימבאָלישן שטיין לכבוד אים. א בית מדרש איז געגרינדעט געווארן אין יאסי אויף זיין נאמען.

פאמיליע

• רבי יצחק מאיר פון זינקאוו, אוועק א' אדר ה'תרט"ו אין עלטער פון 79 יאר, האט געהאט איין זוהן:
  • רבי משולם זוסיא פון זינקאוו, אוועק ג' אלול ה'תרכ"ד אין עלטער פון 52 יאר
  • זיין איידעם הרב שמואל אשכנזי, שווער פון רבי יהושע רוקח פון בעלזא
• רבי יוסף משה פון מעזעביזש
  • זיין איידעם רבי מנחם מנדל פון סאטאנאוו, אייניקל פון רבי יוסף פון יאמפאלא. אוועק ט"ו חשון ה'תרט"ז אין עלטער פון 75 יאר
• הרבנית יוכבד, בזיווג ראשון פרוי פון הרב קלמן טירער א זון פונעם באר מים חיים, און בזיווג שני, פרוי פון רבי דן פון ראדוויל, זוהן פון רבי יצחק פון ראדוויל, זוהן פון רבי יחיאל מיכל פון זלאטשאוו, זיי האבן געהאט צוויי טעכטער און דריי זוהן:
  • זיין זוהן רבי לוי (משה יהודה) פון ראדוויל
  • זיין זוהן רבי אברהם מאיר פון ביאלוברזיג, אוועק אום ה'תרי"ב, איידעם פון רבי איציק'ל ווארקער
  • זיין זוהן רבי שמואל יחיאל פון בוטושאן, געווען ממלא מקום פון זיין טאט'ן
  • זיין טאכטער הרבנית בלומה רייזל פרוי פון רבי שלום יוסף פרידמאן, עלסטער זוהן פון רבי ישראל פון רוזשין
  • זיין טאכטער פרוי פון רבי יצחק טווערסקי פון סקווירא
• הרבנית דינה, פרוי פון רבי ישראל פון ליטשניץ
  • זיין זוהן רבי יוסף פון טיברוב
    • זיין איידעם רבי משה צבי פון סטאנאוויטש
      • זיין איידעם רבי מנחם נחום פון לויעוו, זוהן פון רבי אהרן פון טשערנאביל
• הרבנית רחל, פרוי פון רבי מרדכי אורנשטיין
  • זיין זוהן רבי יעקב יואל, איידעם פון רבי משה אליקים בריעה האפשטיין פון קאזניץ
    • זיין זוהן רבי ישראל
      • זיין זוהן רבי אברהם יהושע העשיל פון מאגלאניצע

באקאנטע תלמידים

• רבי ישכר בער פון ראדאשיץ
• רבי אשר ישעיה רובין
• רבי שמואל פון קאמינקא
• רבי חיים מאיר יחיאל שפירא דער שרף פון מאגלניצא
• רבי משה צבי פון סאווראן
• רבי צבי אלימלך שפירא
• רבי משה טייטלבוים (ישמח משה)
• רבי יצחק אייזיק ספרין
• רבי פנחס פון דינאוויטץ, בעל שפתי צדיקים

זיינע ספרים

• תורת אמת, לבוב, תרי"א – לקוטים על התורה
• אוהב ישראל, זשיטאמיר, תרכ"ג – אנטהאלט מערסטנס מאמרים פון ספר תורת אמת, אין צוגאב צו פיל חדושים אויף נביאים וכתובים און הגדה של פסח
• אגרות האוהב ישראל, בהוצאת מכון שפתי צדיקים, ירושלים תש"ס

ביבליאגראפיע

• "רבי אברהם יהושע העשיל ה'אוהב ישראל' מאפטא - ה' ניסן תקפ"ה", אשכול אויף אייוועלט
• יצחק אלפסי, הרב מאפטא בעל אוהב ישראל, "תולדותיו, קורות חייו, אמרותיו, בניו וצאצאיו", מכון שפתי צדיקים, ירושלים תשמ"א
• רבי שלום חיים פרוש, "רבי אברהם יהושע העשיל מאפטא", בתוך: אור יקרות, חלק שני עמ' פג-קב, ירושלים תשנ"ח.
• אנציקלופדיה לחכמי גליציה, מאיר וונדר.
• רבי אברהם יהושע העשיל (אפטא), אין "אנציקלופדיה יהודית" אויף "דעת"
• ישראל מרדכי טייטלבוים, שלשלת היוחסין, סדר היחוס של רבי אברהם יהושע העשיל מאפטא
• תולדות בהוצאת מכון שפתי צדיקים, ירושלים, תשע"ו

דרויסנדיגע לינקס

אוהב ישראל, אויף שיתופתא

רעפערענצן

פריערדיגער: -

אדמו"רי אפטא-זשינקאוו

קומענדיגער: רבי יצחק מאיר העשל