רבי מאיר ראזנבוים (פרעמישלאן)
 | |||||
| געבורט | י"ט אדר א' ה'תשי"ט (יארגאנג: 65) | ||||
|---|---|---|---|---|---|
| וואוין אָרט | רחובות, בני ברק | ||||
| טעטיגקייט אָרט | קרית הרצוג | ||||
| רבי'ס |
זיין זיידע, רבי חיים מרדכי ראזנבוים פון נאדווארנא זיין פאטער, רבי דוד משה פון קרעטשניף זיין זיידע, רבי משה מרדכי בידערמאן פון לעלוב רבי אברהם חיים ראטה פון שומרי אמונים | ||||
| ספרים | "טללי אורות", "באר לחי" און נאך | ||||
| ווייב | מרת חיה האראנטשיק | ||||
| דינאסטיע | פרעמישלאן | ||||
| טאטע | רבי דוד משה ראזנבוים | ||||
| מאמע | מרת אסתר רחל ראזנבוים | ||||
| קינדער | עלף (פינף זין און זעקס טעכטער) | ||||
| |||||
רבי מאיר ראזנבוים (געבוירן י"ט אדר א' ה'תשי"ט, פעברואר 27, 1959) איז דער היינטיגער פרעמישלאנער רבי פון בני ברק.
ביאגראפיע
רבי מאיר איז געבוירן אין דער שטאט רחובות, אלס דער פערטער זון פון זיין פאטער רבי דוד משה, דער פריערדיגער קרעטשניפער רבי פון רחובות, און זיין מוטער אסתר רחל, טאכטער פון רבי חיים מרדכי ראזנבוים, דער נאדווארנער רבי. ער איז גערופן געווארן מאיר נאך זיין פעטער רבי מאיר ראזנבוים פון סאטמאר, ברודער פון רבי דוד משה[1]. אלס זיבן יעריג קינד האט אים זיין פאטער געזאגט אז אלע מאיר'לעך אין די משפחה האבן געקענט ליינען קוויטלעך, און ער וועט אויך קענען[2]. ווען ער איז געווען צען-און-א-האלב יאר אלט, איז זיין פאטער נפטר געווארן, און געציילטע יארן שפעטער איז זיין מאמע אומגעקומען אין אן אויטאמאביל עקסידענט. ער איז אויפגעוואקסן, צוזאמען מיט זיינע אנדערע געשוויסטער, אין שטוב פון זיין עלטערן ברודער רבי מנחם אליעזר זאב, דער היינטיגער קרעטשניפער רבי און דער ממלא-מקום פון זיין פאטער. שפעטער איז ער אריבערגעגאנגען וואוינען ביי זיין זיידן, דער נאדווארנער רבי. אין זיין יוגנט האט ער באקומען היתר הוראה פון גדולי ישראל[2].
אין יאר תשל"ח האט ער געהייראט זיין רביצין מרת חיה, טאכטער פון רבי חיים אליעזר האראנטשיק פון וויען, עסטרייך, וועלכער איז געווען אן איידעם ביי דעם לעלובער רבי'ן, רבי משה מרדכי. א קורצער צייט נאך זיין חתונה איז זיין זיידע רבי חיים מרדכי אוועק, און ער האט זיך דאן צוגעבונדן צו זיין ווייב'ס זיידע רבי משה מרדכי, און אים שטארק געשעצט. נאך אלס אינגערמאן האט אים דער לעלובער רבי אנגעוויזן אז ער זאל אנפאנגען נעמען קוויטלעך[2]. אין יענער תקופה האט ער אנגעהויבן דינען אלס רב פון קרעטשניפער חסידים אין בני-ברק, און גלייכצייטיג אויך אלס א מגיד-שיעור אין דער קרעטשניפער ישיבה אין רחובות.
אין יאר תשמ"ז, נאך דער פטירה פונעם לעלובער רבי'ן, איז ער געקרוינט געווארן אלס רבי, און האט אנגעהויבן אויפשטעלן זיין הויף אין "קרית הערצאג" געגנט אין בני-ברק. אלס רעספעקט פאר זיינע עלטערע ברידער, האט ער באשלאסן נישט צו נוצן דעם נאמען "קרעטשניף", נאר אנשטאט דעם האט ער גערופן זיין הויף "פרעמישלאן", נאך רבי מאיר הגדול פון פרעמישלאן (זיידע פון רבי מאיר'ל פרעמישלאנער), פון וועמען ער איז אן אייניקל בן אחר בן.
זיינע מוסדות געפונען זיך אין "קרית פרעמישלאן" געגנט אין קרית הערצאג, בני ברק, וואס איז געגרינדעט געווארן אין שבט תשנ"ד[2]. היינט-צוטאגס זענען דארט פארהאן אלערליי מוסדות התורה והחינוך, אריינגערעכנט א ישיבה "שערי דוד" אויפ'ן נאמען פון זיין פאטער, און א חסד ארגאניזאציע "קרן אור למשפחה" וועלכע שטעלט צו עסנווארג פאר נויטבאדערפטיגע משפחות.
ער האט קאמפאזירט ניגונים וואס טייל פון זיי זענען פארעפנטליכט געווארן. דער פרעמישלאנער כאר גיבט ארויס א חלק פון זיינע ניגונים. אין חנוכה[3] און אין אנדערע געלעגנהייטן שפילט דער רבי אויף א פידל לויט דעם פארצייטישן שטייגער פון די נאדווארנא און פרעמישלאנער הויפן. ער איז אויך באקאנט אלס אן אנגענעמער בעל תפילה, און אין אלע שבתים און ימים טובים טוט ער דאווענען פאר'ן עמוד און ליינען אין די תורה[2].
צווישן זיינע אנהענגערס, זענען אריינגערעכנט אויך נישט-חרד'ישע אידן, ווי אביגדור ליבערמאן[4]. פילצאליגע מענטשן קומען זיך דורכרעדן מיט אים וועגן פארשידענע ענינים און באקומען ברכות אויף רפואות און ישועות[2].
פון זיינע תורות זענען געדרוקט געווארן די ספרים 'טללי אורות' (אויף זמירות שבת, הגדה של פסח, און די חומשים בראשית און שמות), 'דברי אלקים חיים', און 'באר לחי' (אויפ'ן סדר פון יאר פון תשע"ב און ווייטער).
קינדער
- מרת רחל עטיל, ווייב פון רבי יואל הכהן קאהן, זון פון רבי משה, דער תולדות אהרן ראש ישיבה, זון פון רבי אברהם יצחק קאהן, דער פריערדיגער תולדות אהרן רבי.
- מרת שרה, ווייב פון רבי משה הלל שטערן, זון פון רבי יהושע מנחם שטערן, רב פון רחמיסטריווקער חסידים אין בני ברק, זון פון ביליצער רב און איידעם פון רבי ישראל מרדכי טווערסקי, דער פריערדיגער רחמיסטריווקער רבי פון ארץ ישראל.
- רבי דוד, דינט אלס "רב הצעיר". האט געהייראט מרת מרגלית, טאכטער פון רבי מענדיל האגער, דער רבי פון מרכז חסידי וויזשניץ; אין יאר תש"פ האבן זיי זיך גע'גט. אייר תשפ"ב איז ער געווארן א חתן מיט זיין קוזינע, טאכטער פון זיין פעטער רבי שלום מאיר טווערסקי, פאלטישאנער רבי, און איידעם פון רבי דוד משה ראזנבוים, דער פריערדיגער קרעטשניפער רבי.
- מרת מאטיל פייגא, ווייב פון רבי חיים יצחק קאפף, זון פון רבי יעקב אשר קאפף, דער לעלוב-באראנאוויטשער רבי. מגיד שיעור אין ישיבת "שערי דוד".
- רבי משה מרדכי, איידעם פון רבי אליהו עזריאל בידערמאן, לעלובער רבי פון בני ברק. ראש ישיבת "שערי דוד" אינעם שטעטל.
- מרת נחמה שפרה, ווייב פון רבי יחיאל נתן זייבאלד, זון פון רבי יהושע זייבאלד גאב"ד אלדשטאט. געווען א מגיד שיעור אין ישיבת "שערי דוד".
- רבי זאב אהרן לייב, איידעם ביי רבי דוד שלמה ראזנבוים, זון פון קרעטשניפער רבי פון ירושלים. ראש כולל "בית לוי" אינעם שטעטל.
- רבי שמעון יעקב יצחק, האט געהייראט מרת חוה חיה, טאכטער פון רבי יעקב פרענקל, דער באטאשאנער רבי. מיטגליד פון הנהלת הקהילה.
- רבי חיים אליעזר, איידעם פון רבי יעקב מנחם ראבינאוויטש, דער ביאלער רבי פון בני ברק. דינט אלס משגיח פון ישיבת "שערי דוד" פרימישלאן.
- מרת אסתר ביילא, ווייב פון רבי ברוך ערנסטער, זון פון רבי יעקב שמשון, זון פון רבי מנחם, דער וויזשניצער ראש ישיבה.
- מרת מלכה חנה רייצא, ווייב פון רבי ישעיה יואל, זון פון רבי יחיאל אשר זעליג פאנעט, קארלסבורגער רבי פון מאנטרעאל.
דרויסנדיגע לינקס
- "קול פרמישלאן", יוטוב קאנאל
- פרמישלאן טעג, אויף בחדרי חרדים
- פרמישלאן טעג, אויף JDN
- פרמישלאן טעג, אויף בחצרות
- חסידות פרימישלאן, אויף jdn.news
רעפערענצן
- ↑ הרבי מהיכל הברכות, משפחה, כ"ח כסלו ה'תש"פ
- ↑ 2.0 2.1 2.2 2.3 2.4 2.5 מאיר הלחמי, תולדות החסידות בארץ ישראל א, האדמו"ר רבי מאיר רוזנבוים שליט"א מפרימישלאן (באגרעניצט צו באַצאָלטע אַבאָנענטן)
- ↑ משה ויסברג · צילום: שוקי לרר, צפו: הרבי מפרמישלאן מנגן בכינור, אויף בחדרי חרדים, כ"ח כסלו תשע"ו
- ↑ שרי רוט, ליברמן בפרמישלאן: "בלי התפילות הכל היה אחרת", אויף בחדרי חרדים, ה' כסלו תשע"ד