רבי יעקב כ"ץ פאפרש

רבי יעקב פּאָפּרשׂ (נפטר ה'ת"ק) איז געווען א דייטשער רב און פוסק, דער מחבר פונעם ספר "שב יעקב". ער איז געווען דער רב פון קאבלענץ, טריר, און פראנקפורט, און האט געפירט א גרויסע ישיבה.

ביאגראפיע

רבי יעקב איז געבוירן געווארן אין פראג צו זיין פאטער רבי בנימין הכהן פאפרשׂ. ער האט געלערנט תורה ביי זיין פאטער און אין פארשידענע ישיבות.

ער איז שפעטער געווארן אויפגענומען אלס רב אין שטאט קאבלענץ און שפעטער אין טריר, אין דער ריינלאנד געגנט. אין יאר תע"ח האט ער אפגעזאגט א פארשלאג צו ווערן רב אין האלבערשטאט, אבער האט יא אנגענומען דעם רבנות פון פראנקפורט, וואו ער האט אויפגעשטעלט א גרויסע ישיבה.

צווישן זיינע תלמידים זענען געווען רבי יעקב בערלין, רבי יוסף שטיינהארט, און רבי יוסף וואסערטרילינג. ער האט געפירט א קארעספאנדענץ מיט די גדולי הדור פון זיין תקופה איבער הלכה'דיגע און אנדערע דאן-אקטועלע פראגעס.

רבי יעקב איז געווען צווישן די רבנים וועלכע האבן ארויפגעלייגט א חרם אויף רבי משה חיים לוצאטו (רמח"ל) אין יאר תפ"ה, צוליב וואס ער האט אויסגעלערנט קבלה, און אויך צוליב א חשד אז ער האלט מיט די שבתי צבי'שע דאקטרינע. נאכ'ן זיין געצוואונגען צו פארלאזן איטאליע איז דער רמח"ל אנגעקומען קיין פראנקפורט, וואו ער איז געשטעלט געווארן פאר'ן בית דין פון רבי יעקב. נאך לאנגע דיסקוסיעס איז ער פארפליכטעט געווארן צו צוזאגן נאכאמאל אז ער וועט נישט אויסלערנען קבלה און נישט זיך באשעפטיגן מיטן דאס לערנען ביז ער ווערט פערציג יאר אלט.

רבי יעקב איז נפטר געווארן אין פראנקפורט אין יאר ת"ק.

ספרים

רבי יעקב האט פארפאסט דעם ספר "שב יעקב" (פראנקפורט, תק"א-תק"ב), א צוויי-חלקימ'דיגער ספר שאלות ותשובות. א צאל פון זיינע חידושי תורה זענען אריינגענומען געווארן אינעם ספר "מנחת כהן" (פיורדא, תק"א) פון רבי שבתי בן משה.