משה מארגארעטן
 | |
| מארגערעטן ביי דער ווייסע הויז חנוכה מסיבה, מיט פרעזידענט דאנאלד טראמפ | |
| מדינה | פאראייניגטע שטאטן |
|---|---|
| וואוינארט | וויליאמסבורג |
| פעילות בולטת | פדיון שבויים |
| באקאנט צוליב | פארמישט אין באפרייען שלום מרדכי רובאשקין |
משה שלמה מאַרגאַרעטן איז אַן אַמעריקאַנער חסידישער עסקן, אקטיוו פאר פדיון שבויים, באקאנט אלס פירער פון דער קאמפיין צו פארקירצן די טורמע פאר ווייסע קאָלנער עבירות (טורמע רעפארם פירסט סטעפ אקט (ענ')), און אלס איינער פון די פירנדע אקטיוויסטן פאר דער באפרייאונג פון אידישע געפאנגענע שלום מרדכי רובאשקין, מרדכי יצחק סאמעט, און שלום ווייס.
ביאגראפיע
משה איז געבוירן אין 1981 אין שיכון סקווירא אין ניו יארק. ער האָט געלערנט אין די סקווערע מוסדות אין שיכון. ווען ער איז געווען 14 יאָר איז זיין משפּחה אַריבער אַ צייט קיין ארץ ישׂראל, און משה האָט געלערנט אין דער טשערנאָבילער ישיבה אין בני ברק. אין 2001 האָט ער זיך אומגעקערט קיין אַמעריקע. פריער האָט ער געלערנט אין דער גערער ישיבה אין בארא פארק.
ער האָט געהייראַט א טאכטער פון יעקב יוסף ניישלאס, משב"ק פון רבי יעקב יחזקיה גרינוואלד, דער פּאָפּער רבי, און וואוינט זינט דאן אין וויליאמסבורג.
אין 2021 איז מאַרגאַרעטן געוואָרן באַרימט נאָכדעם ווי ער און דער אָרגאַניזאַציע 'צדק' האָבן געאַרבעט צו ראַטעווען אַפגאַנע בירגער וועלכע האָבן געהאָלפן די אמעריקאנער קרעפטן אין אפגאניסטאן, און זענען געבליבן פון הינטער נאך די פאראייניגטע שטאטן האבן זיך ארויסגעצויגן פון דארט.[1][2]
פדיון שבויים
מאַרגאַרעטן האָט געגרינדעט די אָרגאַניזאַציע 'צדק' וועלכע באשעפטיגט זיך מיט פדיון שבויים. די אָרגאַניזאַציע העלפט אידן וועלכע האָבן זיך פארטשעפעט מיט די אויטאריטעטן אין די פאראייניגטע שטאטן ווי אויך די וואס זיצן אין טורמע. צווישן אַנדערן, האָט מאַרגאַרעטן צוזאַמען מיט אַנדערע אָרגאַניזאַציעס באַהאַנדלט די באַפרייאונג פון די אַרעסטאַנטן שלום מרדכי רובאשקין, מרדכי יצחק סאַמעט און שלום ווייס.