רוי:ירושלימער אלמאנאך
ירושלימער אַלמאַנאַך איז אַ צייטשריפט פאַר ליטעראַטור, קולטור, שפּראַך און פאָרשונג, וועלכע ערשיינט אין ירושלים זינט 1973. די צייטשריפט איז געגרינדעט געוואָרן דורכן דיכטער יוסף קערלער און היינט-צו-טאָג ווערט זי רעדאַגירט דורך זיין זון, דעם פאָרשער, דיכטער, לינגוויסט און רעדאַקטאָר פּראָפ' דוב-בער קערלער.
לכתחילה איז דער אַלמאַנאַך געווען אַן אָרגאַן פון אַ גרופּע ייִדישע דיכטער און שרייבער, וועלכע האָבן געוואוינט אין ירושלים. אין המשך האָבן אָנגעהויבן פאַרעפנטליכן אין אים זייערע ווערק שרייבער, דיכטער און פאָרשער פון אַנדערע שטעט פון מדינת ישראל, ווי אויך פון אויסלאַנד - פאראייניגטע שטאַטן, אויסטראַליע, אייראָפּע. צווישן די שריפטשטעלער, וואָס האָבן זיך געדרוקט אינעם אַלמאַנאַך, זענען געווען: לייב אליצקי, רחל בוימוואָל, חיים מאַלטינסקי, חנא שמערוק, דב סדן, אברהם סוצקעווער, מרדכי צאַנין און אַ סך אַנדערע. נישט געקוקט אויף אַ שוואַכער עקאָנאָמישער באַזע, האָט זיך איינגעגעבן אַרויסלאָזן ביז יעצט 29 בענדער (דער לעצטער באַנד – אין 2012). צווישן די מיטרעדאַקטאָרן, וועלכע האָבן געאַרבעט צוזאַמען מיט יוסף קערלער, זענען געווען דוד ספרד (1973 - 1982), אפרים שעדלעצקי (1982 – 1992) און דב-בער קערלער (1993 – 1998).
יוסף קערלער האָט רעדאַגירט די צייטשריפט כמעט ביז דעם לעצטן יאָר פון זיין לעבן. נאָך זיין טויט איז דער רעדאַקטאָר פונעם "ירושלימער אַלמאַנאַך" געוואָרן זיין זון דב-בער קערלער.
דרויסנדע לינקס
- וועב-זייטל פונעם "ירושלימער אַלמאַנאַך"
- פארמאסקירטע אנטלייאונג: יידישע לעקסישע השפּעה אויף עברית", פון גלעד צוקערמאן, ירושלימער אַלמאַנאַך נ' 28 (2008).
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!