המכלול
פאנטשער-מעלדונג פון א געמיינזאַמער זאַפאַס: גרײַז בײַם באשאפֿן דאס קליינבילד: מ'קען נישט שפייכלערן פארקלענערונג צום ציל | |
| סוג | וויקי-באזירטע ענציקלאפעדיע צוגעפאסט פאר'ן חרדישן ציבור |
|---|---|
| תקופת הפעילות | כ' טבת ה'תשע"ה – הווה (10 יאָרן) |
| מייסדים | הרב יוסף קאמינער |
| בעלות | מכון חכמת התורה |
| הרשמה | מען דארף זיך איינשרייבן צו קענען רעדאגירן |
|
www yi | |
המכלול איז א געמיינזאמע, פרומע, ווירטואלער ענציקלאפעדיע אין צוויי שפראכן, וואס ארבעט מיט די מעדיעוויקי פראגראם. אין קעגנזאץ צו אנדערע וויקיפעדיע וועבזייטלעך וואס ווערן אנגעפירט און אויפגעהאלטן דורך די וויקימידיע פאנד, ווערט די המכלול וועבזייטל אנגעפירט דורך מכון חכמת התורה וואס איז געגרינדעט געווארן פאר'ן צוועק פון אויפשטעלן און זיך אפגעבן מיטן וועבזייטל, און די קאסטן דערפון ווערן באצאלט נאר דורכ'ן מכון, באזירט אויף נדבות פון קערפערשאפטן און פריוואטע מענטשן.
גרינדונג
אין 2014 האט הרב יוסף קאמינער געגרינדעט מכון חכמת התורה כדי צו שאפן דעם המכלול וועבזייטל. המכלול איז אויפגעשטעלט געווארן אין יאר תשע"ה, מיט'ן ציל צו זיין אן אלטערנאטיווע אדרעס פארן חרדי'שן עולם וואס האלט זיך אפ פון ניצן וויקיפעדיע צוליב די פילע פראבלעמען דערפון. דער ציל פון די גרינדער איז צוצושטעלן פארן ציבור וויקיפעדישע אינהאלט פון א פרומען שטאנדפונקט, סיי דורכ'ן נאכקאפירן אינהאלט פון וויקיפעדיע און עס צופאסן צום פרומען מהלך, ווי עס ווערט געזען אין די אויגן פון מכון חכמת התורה, און סיי דורך שאפן נייע ארטיקלען, בעיקר אין די געביט פון תורה, אידישקייט און ענדליכס. די גרינדער פון המכלול צייכענען אן אז "המכלול איז א פראיעקט צו שאפן די גרעסטע אידישע ענציקלאפעדיע אין היסטאריע, וואס ענטהאלט ארטיקלען איבער אלע תורה'דיגע מושגים, אין הלכה און אין אגדה, און איבער אלע מושגים אין אידישקייט און אין תולדות עם ישראל, און אין די מענטשהייט'ס ידיעה וואס עקזיסטירט אין אלע סעקולארע געביטן, אויף א ריינע שפראך און לויט די אידישע השקפה".
המכלול אויף אידיש
לויט די בקשה פון אידיש-רעדנדע באניצער, איז אום ראש חודש כסלו ה'תשפ"ג געגרינדעט געווארן דער אידישער המכלול, מיט'ן ציל צו שאפן אן ערליכן ענציקלאפעדיע לויט'ן וויקי-פארמאט אויפ'ן היימישן מאמע לשון. אנדערש ווי דער העברעאישער המכלול, וועלכע באזירט זיך בעיקר אויפ'ן העברעאישן וויקיפעדיע און פאסט עס צו צום באנוץ פון ערליכע אידן, איז דער אידישער המכלול א פראיעקט צו שאפן אן ענציקלאפעדיע פונדאסניי, וויבאלד דער יידישער וויקיפעדיע קומט נישט נאך דאס מינדעסטע פון וואס פאדערט זיך פון אן ענציקלאפעדיע.
טראצדעם, אבער, איז באשלאסן געווארן אויך אריבערצוברענגען די ארטיקלען וועלכע געפונען זיך אויפ'ן יידישן וויקיפעדיע, מיט'ן ציל אז המכלול זאל שוין גלייך פארמאגן יעדע נוצליכע ידיעה וואס געפונט זיך דארט, אויך איידער די ארטיקלען ווערן געשריבן לויט המכלול סטאנדארטן. די בלעטער זענען אריינגעשטעלט געווארן אינעם "רוי" געביט, און דער פראצעס פון זיי באקוקן און רייניגן איז אין שוואונג.
געבוי פון וועבזייטל
אזוי ווי וויקיפעדיע, וואס איז די פראיעקט פון וואס המכלול איז אינספערירט און נעמט די טעכנישע באזע און אלגעמיינע אויסשטעל, טוט אויך המכלול זיך פארלאזן אויפן געדאנק פון די חכמה פון די מאסן און לאזט אלע באזוכער זיך באטייליגן ביים רעדאגירן. אנדערש ווי וויקיפעדיע, איז די אינהאלט פון המכלול נישט פריי, און די רעכטן אויף די אינהאלט וואס די רעדאגירער ביישטייערן זענען רעזערווירט פאר'ן מכון, אויסער אינהאלט וואס שטאמט אריגינעל פון וויקיפעדיע וואס איז צוגעשטעלט אונטער די אריגינעלע וויקיפעדיע לייסענס. אנדערש ווי וויקיפעדיע, וואו לויט די פארשריפטן פון די וויקימידיע דארף געגעבן ווערן פולע זעלבסטשטענדיגקייט פאר די באזוכער פונעם זייטל, אין אנפירן די זייטל און ביים פאסן באשלוסן בנוגע די אינהאלט, איז די פרייהייט פון רעדאגירן אין המכלול באגרעניצט צו "געווענליכע" אינהאלט וואס זענען נישט פארבינדן צו שאלות אין אידישקייט. דאס פאסן באשלוסן איבער דער סארט אינהאלט, איז אין די הענט פון א ספעציעלע שטאב מטעם המכון, און עס ווערט געטון אונטער די אנווייזונגען פון א רוחנית'דיגע וועד.
יעצט, שבת כ' כסלו ה'תשפ"ה, איז פארהאן אין אידישן המכלול 13,069 ארטיקלען וועלכע זענען געווארן געשריבן, רעדאגירט, אדער אימפארטירט, דורך א חלק פון די 189 איינגעשריבענע באניצער. 395 פון זיי זענען ארטיקלען געשאפן אין המכלול וועלכע זענען מלכתחילה געשריבן געווארן דורך די ארטיגע שרייבער. (12,247 פון די איבריגע זענען די אויבנדערמאנטע וויקיפעדיע בלעטער, פון וועלכע 28 דארפן נאך באקוקט ווערן. לויט'ן ציל וועלן זיי אלע ענדגילטיג ערזעצט ווערן מיט ארטיקלען געשריבן אין המכלול). חוץ פון דעם זענען פארהאן 21583 בלעטער וועלכע זענען נישט קיינע ארטיקלען. אלעס צוזאמען זענען שוין אויסגעפירט געווארן ארום 319,287[1] רעדאגירונגען פון ווען עס איז אויפגעשטעלט געווארן. אויך זענען ארויפגעשטעלט געווארן ארום 78 פיילס.
דער טיפקייט מעסטער, וואס קען דינען פאר א ביילייפיגע שאצונג צום קוואליטעט פון ארטיקלען[2] (דעם צאל פון רעדאגירונגען אין זייטל צעטיילט מיט'ן צאל פון ארטיקלען), צייגט לכאורה אז דער קוואליטעט פון ארטיקלען אויף המכלול איז היבש נידריג און שטייט ביי בלויז ארום 24.4. אין פארגלייך, שטייט דער טיפקייט מעסטער אויף די יידישע וויקיפעדיע נאנט צו 46. אבער דער מעסטער איז דערווייל נישט ריכטיג פאר אזא זייטל ווי 'המכלול', בעיקר ווייל רוב פון די ארטיקלען ווערן דערווייל נישט קיין סאך געטוישט, און זיי ערשיינען אין המכלול כמעט גענוי ווי זיי זענען געווען אין די יידישע וויקיפעדיע. אויב מאכט זיך א גוטער ארטיקל פון וויקיפעדיע, וואס איז אימפארטירט געווארן נאך וואס עס איז שוין דורכגעגאנגען 100 רעדאגירונגען, און מען האט נאך צוגעלייגט נאך פארבעסערונגען אין המכלול, וועט עס נישט זיין העכער אויפ'ן מעסטער ווי דער זעלבער ארטיקל אויף וויקיפעדיע נאר אסאך נידריגער, וויבאלד דער צאל פון אריגינעלע רעדאגירונגען ווערט נישט אריינגערעכנט.
מיילשטיינער
| דאטום | מיילשטיין | נאמען פון ארטיקל |
|---|---|---|
| ז' שבט ה'תשפ"ג | ערשטע אבן הפינה ארטיקל | פיר תקופות |
| י"ב אדר ה'תשפ"ג | פופציג ארטיקלען | 50 (נומער) |
| י"ט ניסן ה'תשפ"ג | הונדערט ארטיקלען | רבי אהרן הגדול פון קארלין |
| כ"ב אלול ה'תשפ"ג | צען אבן הפינה ארטיקלען | חודש |
| ז' תשרי ה'תשפ"ד | 250 ארטיקלען | פרשת האזינו |
קאסטן
דעם עול פון אויסצאלן די אויסגאבן פון די המכלול וועבזייטלעך, וואס רעכנט אריין די קאסטן פון אויפהאלטן די סערווערס און פון פראגראמירן דעם פלאטפארמע, האבן גענומען אויף זיך מכון חכמת התורה און הרב יוסף קמינר, אנגעהויבן פון טאג וואס המכלול איז אויפגעשטעלט געווארן.
ווי אנגענומען אין אנדערע וויקי וועבזייטלעך, האלט זיך המכלול צוריק פון שטעלן רעקלאמעס וועלכע וועלן זיין א שטער צום אביעקטיוון ענציקלאפעדישן שטעלונג, און איז דעריבער געצווינגען אונטערצונעמען פון צייט צו צייט קאמפיינען אויפצוטרייבן געלט דורך די שטיצע פון מאסן.
דער לעצטער קאמפיין האט זיך באזירט אויף א שותפות אינעם המכלול פראיעקט, און אויף באקאנט מאכן דעם פאקט אז המכלול האט נישט קיין אנדערע קוואל פון געלט חוץ פון די פארשידענע ביישטייערונגען.
זעט אויך
דרויסנדיגע לינקס
- התשובה החרדית לוויקיפדיה, באתר מקור ראשון, מאי 2018
- ערוץ היוטיוב של מכון חכמת התורה
- "השגרירות הבריטית מחוייבת להצלחת תעשיית ההיי-טק החרדית", אויף JDN, דעצעמבער 19, 2017 (העברעאיש)
- יעקב אבוביץ, הויקיפדיה החרדית: 'המכלול' חצה את רף ה-200 אלף ערכים, אויף JDN, יולי 15, 2019 (העברעאיש)
- מרים סלומון, מייסד 'המכלול' בראיון מרתק: "קול פנימי זעק בתוכי: 'לא, אתה לא נשבר! נשמות ישראל זקוקות לאור האמונה'" באתר הידברות, ב' אלול תשע"ט
- אחרי סינון אלפי ערכים: ב'מכלול' יוצאים במרתון יצירת תוכן חדש, אויף JDN, נאוועמבער 13, 2018 (העברעאיש)
- ראיון בעיתון משפחה עם הרב קמינר
- מויילס ועד קמינר:רעיון השיתופיות שעבר גיור - במוסף של עיתון כל ישראל
- יוסף קמינר, יוזם הויקיפדיה החרדית, המכלול: מתוך 54 המשפיעים של אתר ביזנעס לשנת 2018
- יעקב אבוביץ, 'יתגדל ויתקדש': "חצי מיליון נכנסים למכלול ואומרים קדיש", אויף JDN, נאוועמבער 5, 2020 (העברעאיש)
רעפערענצן
- ↑ אנדערש ווי וויקיפעדיע, ווערן נישט אריינגערעכנט די רעדאגירונגען אין די דפי זרימה
- ↑ הסבר איבער'ן טיפקייט מעסטער.
באמערקונג: דער ארטיקל דערמאנט מכון חכמת התורה אדער איינער פון זיינע פראיעקטן. המכלול ווערט געשטיצט דורך מכון חכמת התורה.