רוי:יעווגעני קיסין
יעווגעני קיסין (געב. דעם 10טן אָקטאָבער 1971) — פיאַניסט, איינער פון די גרויסע מוזיקער היינט צו טאָג.
לעבנסגעשיכטע
יעווגעני קיסין איז געבוירן געוואָרן אין מאָסקווע, רוסלאַנד, אין אַ ייִדישער משפּחה. זיין עלטער־עלטער זיידע פונעם טאטנס צד (מרדכי אַגראַנאַט) איז געווען א רב. צו 11 חדשים האָט דער קליינער יעווגעני אָנגעהויבן זינגען די טעמע פון באַכ'ס פוגע,[1] און צו 2 יאָר — געשפּילט שוין פיאַנע. ביי די 6 יאָר איז ער געוואָרן אַ תּלמיד אין דער מאָסקווער מוזיק־שול אויף גנעסינס נאָמען, וואוּ ער האָט זיך געלערנט ביי אַנאַ קאַנטאָר, זיין ערשטע און איינציקע פּיאַנע־לערערין.
אין דער עלטער פון 10 יאָר האָט קיסין צום ערשטן מאָל געשפּילט מיט אַ סימפאָנישן אָרקעסטער, אויסגעפילט מאָצאַרטס קאָנצערט נומ‘ 20. מיט אַ יאָר שפּעטער גיט ער זיין ערשטן סאָלאָ־קאָנצערט. אינעם יאָר 1984 טרעט ער אויף אינעם "גרויסן זאַל פון דער מאָסקווער קאָנסערוואַטאָריע", וואוּ ער שפּילט דעם 1טן און 2טן פּיאַנע–קאָנצערטן פון פרעדעריק שאָפּען.
אין 1985 פאָרט קיסין צום ערשטן מאָל אַרויס מיט קאָנצערטן קיין אויסלאַנד; אין 1987 דעביוטירט ער אין מערב־אייראָפּע אויפן בערלינער פעסטיוואַל. אין 1988 שפּילט ער טשייקאָווסקיס פּיאַנע־קאָנצערט נומ‘ 1, באַגלייט פונעם בערלינער פילהאַרמאָנישן אָרקעסטער, בראָש מיטן באַרימטן דיריגענט הערבערט פאָן קאַראַיאַן.
אין סעפּטעמבער 1990 פאָרט קיסין אַרויס מיט קאָנצערטן אין צפון־אַמעריקע, וואוּ ער שפּילט שאָפּענס פּיאַנע־קאָנצערטן נומ‘ 1 און 2, באַגלייט פונעם ניו־יאָרקער פילהאַרמאָנישן אָרקעסטער, דיריגענט זובין מעטאַ; אין א וואָך אַרום שפּילט ער א סאָלאָ–קאָנצערט אין קאַרנעגי־האָל. אין פעברואַר 1992 באַטייליקט זיך יעווגעני קיסין אין דער פייערליכער צערעמאָניע פון Grammy Awards אין ניו־יאָרק, וואָס ווערט געוויזן אין דער טעלעוויזיע פאַר אַן עולם פון בערך אַ מיליאַרד זעקס הונדערט מיליאָן מענטשן. אין אויגוסט 1997 שפּילט ער א סאָלאָ־קאָנצערט אויפן פעסטיוואַל Proms אינעם לאָנדאָנער אַלבערט־האָל — דער ערשטער "קלאַוויראַבענד פאַר מער ווי 100 יאָר, זינט דער פעסטיוואַל עקזיסטירט.
קיסין פאָרט כּסדר אַרום מיט סאָלאָ־קאָנצערטן איבער אייראָפּע, אַמעריקע און אַזיע, צונויפנעמענדיק פול־געפּאַקטע זאַלן; ער שפּילט מיט די בעסטע אָרקעסטערס, אָנגעפירט מיט אַזעלכע בארימטע מייסטער דיריגענטן ווי קלאַודיאָ אַבאַדאָ, וולאַדימיר אַשכּנזי, דניאל באַרנבוים, וואַלערי גערגיִעוו, קאַרלאָ מאַריאַ דזשוליני, סיר קאָלין דעוויס, דזשעימס ליוויין, לאָרין מאַאַזעל, ריקאַרדאָ מוטי, סעידזשי אָזאַוואַ, מייסטער טשעלאָיסט מסטיסלאַוו ראָסטראָפּאָוויטש, יעווגעני סוועטלאַנאָוו, יורי טעמירקאַנאָוו, דזשאָרדזש שאָלטי און מאַריס יאַנסאָנס; אין קאַמער־אַנסאַמבל מיט קיסינען האָבן געשפּילט: מאַרטאַ אַרגעריך, יורי באַשמעט, דזשאָשואַ בעל, נאַטאַליאַ גוטמאַן, טאָמאַס קוואַסטהאָף, גידאָן קרעמער, אַלעקסאַנדער קניאַזעוו, דזשעימס ליוויין, מישאַ מייסקי, יצחק סטערן, יצחק פּערלמאַן, לעאָנידאַס קאַוואַקאָס וכּדומה. די אָנגעזעענע מוזיקער פון אונזער צייט, ווי אויך די צוהערער איבער דער גאָרער וועלט ווייזן אָן, אַז קיסינס קונסט איז זייער פּאָעטיש און טיף, ראָמאַנטיש־באַגייסטערט און דערהויבן; די מוזיק־קריטיקער האַלטן אים פאַר אַ נאָכפאָלגער פון אַרטור רובינשטיין און וולאַדימיר האָראָוויץ.
פּרעמיעס און באַלוינונגען
יעווגעני קיסין האָט זיך קיין מאָל נישט באַטייליקט אין קאָנקורסן, ער איז אָבער באַלוינט געוואָרן מיט אַ צאָל פּרעמיעס, אַריינגערעכנט:
- פּרעמיע פון דער מוזיק אַקאַדעמיע Cigiana "דער בעסטער פּיאַניסט פון יאָר, (איטאַליע, 1991)
- פּרעמיע פונעם זשורנאַל (Musical America 1994)
- ערן־פּרעמיע "טריִומף‟ (רוסלאַנד, 1997)
- פּרעמיע אויף שאָסטאַקאָוויטשס נאָמען (רוסלאַנד, 2003)
- פּרעמיע אויף קאַראַיאַנס נאָמען (דייטשלאַנד, 2005)
- Grammy Awards אין דער קאַטעגאָריע פון "די בעסטע סאָלאָ־אויספירונג אויף אַ מוזיקאַלישן אינסטרומענט‟, פאַר אויספילן די ווערק פון סקריאַבין, מעטנער און סטראַווינסקי (פאראייניגטע שטאַטן פון אַמעריקע, 2006)
- פּרעמיע אויפן נאָמען פון בענעדעטי מיקעלאַנדזשעלי (איטאַליע, 2007)
- אין מאי 2001 איז קיסינען צוגעטיילט געוואָרן דער ערן־טיטל — דאָקטאָר פון מוזיק ביי דער מאַנהעטן־מוזיק־שול; אין יוני 2005 — ערן־מיטגליד פון דער קיניגליכער מוזיק־אַקאַדעמיע (לאָנדאָן).
קיסין טרעט אויך אויף מיט פּאָעטישע אָוונטן אויף אידיש און רוסיש.
רעפערענצן
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!