רוי:דאנאלד טראמפ

דאנאלד טראמפ
Donald John Trump

טראמפ אין 2017
געבורט	יוני 14, 1946 (יארגאנג: 78) קווינס, ניו יארק, פאראייניגטע שטאטן
פולער נאמען	דאנאלד דזשאן טראמפ
מדינה	פאראייניגטע שטאטן
באשעפטיגונג	פאליטיקאנט, ביזנעסמאן, מידיע פערזענליכקייט
פארטיי	רעפובליקאנער (1987–1999, 2009–2011, 2012–איצט) פריערע פארטייען: דעמאקראט (ביז 1987, 2001–2009) אינדעפענדענט (2011–2012) רעפארם פארטיי (1999–2001)
פאטער פרעד טראמפ מוטער מארי טראמפ
ווייב	איוואנא טראמפ (1977–1990) מארלא מעיפלס (1993–1999) מעלאניע טראמפ (2005–איצט)
אפיציעלע וועבזייטל פרעזידענטליכע ביבליאטעק ווייסע הויז ארכיוון
45'טער פרעזידענט פון די פאראייניגטע שטאטן 2017–2021 וויצע מייק פענס → באראק אבאמא דזשאו ביידן ←
אונטערשריפט

דאנאלד טראמפ (ענגליש: Donald John Trump; געבוירן יוני 14, 1946, ניו יארק, ניו יארק) איז דער 45סטער פרעזידענט פון די פאראייניגטע שטאטן (2017-21) און דער נאמיני אין די פ.ש. פרעזידענטליכע וואלן פון 2024. אין די 2016 פרעזידענט וואלן איז ער אויסגעקליבן געווארן אלס דער רעפובליקאנער קאנדידאט און האט באזיגט זיין דעמאקראטישער קעגנער, הילערי קלינטאן.

אום מאי 30, 2024 איז טראמפ געווארן דער ערשטער געוועזענער פרעזידענט צו ווערן פאראורטיילט אין א פארברעכן ווען א ניו יארק שטאַט דזשורי האט אים פאראורטיילט אויף 34 פעלאני פארברעכנס פון פעלשן ביזנעס רעקארדס אין פארבינדונג מיט א האש-מאני צאלונג אין 2016 צו א פילם-שטערנקע וועלכע האט גע'טענה'ט אז זי האט געהאט אן עסק מיט טראמפ אין 2006.

טראמפ איז שפעטער אנגעקלאגט געווארן אויף צענדליגע אנדערע פעדעראלע און שטאַט באשולדיגונגען אין פעלער בשייכות צו זיינע באמיאונגען צו איבערדרייען ביידען'ס זיג אין די 2020 פרעזידענטליכע וואלן און זיין באזייטיגונג פון פילע קלאסיפירטע דאקומענטן פון די ווייסע הויז אין זיין לעצטן טאג אין אמט. טראמפ איז אויך געפונען געווארן פאראנטווארטליך אין א גרויסע ציווילע קלאגע באשולדיגנדיג ביזנעס שווינדל אין ניו יארק שטאַט און צוויי ציווילע קלאגעס וועלכע האבן אים באשולדיגט אין אביוזן און באשמוצן דעם שרייבער E. Jean Carroll. מיט'ן אנהויב פון זיין פּראצעס אין די ביזנעס-רעקארדס פאל אום אפריל 15, 2024 איז טראמפ געווארן דער ערשטער געוועזענער פרעזידענט צו שטיין פאר פראצעס אויף קרימינאלע קלאגעס.

טראמפ איז דער דריטער פרעזידענט אין די פ.ש. היסטאריע (נאך ענדרו זשאנסאן אין 1868 און ביל קלינטאן אין 1998) צו ווערן אימפּיטשד דורך די פ.ש. הויז פון רעפרעזענטאטן און דער אייציגסטער פרעזידענט צו ווערן אימפּיטשד צוויי מאל –איין מאל (אין 2019) פאר אביוזן מאכט און אבסטראקשען פון קאנגרעס אין פארבינדונג מיט'ן אוקראינער סקאנדאל און איין מאל (אין 2021) פאר "אינסייטמענט אוו אינסארעקשאן" אין פארבינדונג מיט די יאנואר 6 אטאקע אויף די פ.ש. קאפיטאל דורך א היציגע כאפּטע פון טראמפ שטיצער. ביידע טראמפ אימפּיטשמענטס האבן זיך געענדיגט אין זיין ריינוואשונג דורך דעם פ.ש. סענאט. טראמפ איז געלאפן פאר ווידערוויילונג אין 2020 אבער האט פארלוירן צו געוועזענער וויצע פּרעזידענט דזשאו ביידען דורך אן עלעקטארעל קאלעדזש אפשטימונג פון 306 צו 232.

נאך די מידטוירם וואלן פון 2022 האט טראמפ דערקלערט זיין פלאן צו לויפן פאר א צווייטע טערמין, און אין פּריימערי וואלן אין אנהויב 2024 האט ער אנגעזאמלט גענוג דעלעגאטן צו געוואונען זיין פּארטיי'ס נאמינאציע, טראץ די פעסטע פארשריט פון די לעגאלע קעיסעס קעגן אים. כאטש וואס עטליכע רעפובליקאנער פארטיי פירער האבן געזארגט אז א קרימינאלע פראצעס קען ערנסט אפשוואכן טראמפ'ס אפרוף צו מעסיגע רעפובליקאנע און אומאפהענגיגע וויילער, האבן אנדערע גענומען די האפענונגפולע מיינונג אז טראמפ וועט נוצן זיינע געריכט ערשיינונגען צו צעמענטירן זיין שטיצע דורכ'ן זיך אהערשטעלן אלס א פאליטישער מארטיר–דער קרבן פון דעמאקראטיש-געפירטע "וויטש האנטס", "האוקסעס", און "סקעמס", ווי ער כאראקטעריזירט אפט די פילע לעגאלע אויספארשונגען וואס האבן אים באַטראָפן.

טראמפּ איז אויך אַ ריעל עסטעיט דעוועלאָפּער און ביזנעסמאן וואָס האט פארמאגט, פארוואלטעט אָדער געלייסענסט זיין נאָמען צו האָטעלס, קאַסינאָס, גאָלף קאָרסעס, רעזאָרטן און רעזידענטשל פּראפּערטיס אין די ניו יארק סיטי געגנט און אַרום די וועלט. זינט די 1980ער האט טראַמפּ פארלייעט זיין נאָמען צו מערערע ריטעיל פירנעמען - אַריינגערעכנט געברענדטע ליניעס פון קליידונג, קעלניש-וואסער, עסנוואַרג און מעבל. אין די פריע 21טער יאָרהונדערט האט זיין פּריוואַטער קאַנגלאַמעראַט, די "טראמפּ ארגאניזאציע", אריינגערעכנט עטליכע 500 פירמעס פארמישט אין אַ ברייטע קייט פון געשעפטן, אַריינגערעכנט האָטעלן און רעזאָרטן, רעזידענטשל פראפערטיס, סחורה, און פאַרוויילונג און טעלעוויזיע.

גלייך ביים אריינגיין אין אמט, האט טראמפ זיך געאיילט אונטערצושרייבן א סעריע פון ​​עקזעקוטיווע באפעלן, אריינגערעכנט דעם פארארדענונג וואס האט פארבאטן אימיגראציע פון ​​בירגער פון עטליכע לענדער מיט א מוסלעמענער מערהייט, אנרופנדיג זיי "טעראר-פריינטליכע" לענדער. אנדערע באפעלן זיינע האבן אראפגענומען רעגולאציעס פון ביזנעסער און ענווייראמענטאלע שוץ, און גלייכצייטיג האט ער פאראויסגעשטופט מאַסיווע שטייער שניטן. אין אויסערן פאליסי האט ער פאראויסגעשטופט א פאליסי וואס ער האט כאראקטעריזירט אלס "אמעריקע ערשט": ער האט זיך צוריקגעצויגן פון פארהאנדלונגען אין די טראנס-פּאַסיפיק שותפות און די פאריזער אפמאך וועגן קלימאטן טויש, ארויפגעלייגט אימפארט שטייער (טאריפס) וואס האט ארויסגערופן א האנדל קריג מיט כינע, און צוריקגעצויגן אמעריקאנער כוחות פון די ציווילע מלחמה אין סיריע. זיין שטעלונג צו מדינת ישראל איז געווען גאָר פאזיטיוו, אריינגערעכנט ווען ער האט אנערקענט ירושלים אלס מדינת ישראל'ס הויפטשטאט און מדינת ישראל'ס בעלות אויף די גולן בערג, פאראויס־געשטיפט די עברעהעם שלום אפמאך מיטן ציל צו נארמאליזירן די ​​באציאונגען צווישן מדינת ישראל און עטליכע אראבישע לענדער, און גענומען א שטארקע ליניע קעגן איראן, צווישן אנדערע ווען ער האט זיך צוריקגעצויגן פונעם נוקלעארן אפמאך מיט איראן און ווען ער האט באפוילן דאס עלימינירן א צאל עליטע מיטגלידער פון איראן'ס רעוואלוציאנערע גווארדיע.

דאנאלד טראמפ איז פאפולער ביים ארטאדאקסישן אידנטום, און זיין טאכטער איוואנקא האט זיך מגייר געווען און געהייראט א איד דזשערעד קושנער.

יוגנט און ביזנעס קאריערע

פרעד טראמפ, טאטע פון דאנאלד טראמפ

יוגנט

טראמפּ איז געבוירן אין ניו יארק אין אַ משפּחה פון דייטשע סקאטישע אפּשטאם, אַ מיטגליד פון דער אמעריקאנער פּרעסביטעריען קירכע. זיין זיידע, פרידריך טראמפּ, איז געבוירן אין קאלשטאדט אין די קעניגרייך פון בייערן (שפּעטער צוזאמגעשמאלצן מיט די דייטשער אימפעריע), האט אימיגרירט צו די פאַראייניגטע שטאַטן אין 1885, און האט אמעריקאניזירט זיין ערשטער נאמען צו פרעדריק ווען ער האט באקומען אמעריקאנער בירגערשאַפט אין 1892. אין די צייט פון די גאלד געלויף אין 1897, האט פרעדריק געבויט דריי רעסטוראנען מיט אַ האטעל אויף די וועג פון די גאלד מינעס וואָס איז געווען אין קלאנדיקע אין קאנאדע, אזוי האט ער געמאכט זיין ערשטער פארמעגן. דערנאך האָט ער זיך צוריקגעקערט צו זיין היימשטאט אין 1902, דארט האט ער חתונה געהאט מיט זיין פרוי, עליזאבעט. זיי האבן זיך אריבערגעצויגן קיין ניו יארק סיטי אום אויגוסט פונעם זעלבן יאר. צוליב זיין פרוי'ס בענקשאפט צו איר היימלאנד, האָט די משפּחה זיך אומגעקערט צו זייער געבורטסארט. ווען זיי זענען אנקגעקומען, האבן די דייטשע אויטאריטעטן באשלאסן אז פרעדריק האט עמיגרירט צו די פאראייניגטע שטאטן כדי זיך ארויסצודרייען פון באצאלן שטייערן און פון מיליטער דינסט אין דער דייטשער ארמיי, און אז ער האט פארלעצט א געזעץ וואס פארבאט אימיגראציע קיין צפון אמעריקע. אין רעזולטאט איז זיין דייטשע בירגערשאפט אפגערופן געווארן. ער האט פרובירט צו אפּעלירן דעם באשלוס אן ערפאלג, און אין 1905 האט ער אן קיין אויסוואל זיך געדארפט צוריקקערן צו די פאַראייניגטע שטאטן.

דאנאלד'ס פאטער, פרעד טראמפּ, איז געבוירן אקטאבער 11, 1905 אין קווינס. ווען ער איז געווען 15 יאר אלט, איז ער, אין די פיסטריט פון זיינע עלטערן, אריין אין די ריעל עסטעיט ביזנעס, און צוזאמען מיט זיין מוטער געגרינדעט די ארגאניזאציע "עליזאבעט טראמפ ענד סאן". ווען פרעד איז געווען 22 יאר אלט איז די ארגאניזאציע געווארן א פירמע. אין די 1920ער יארן, האט ער געבויט דירות אין קווינס, וועלכע זענען פארקויפט געווארן מיט א ביליגערע פרייז פון די מארקעט פרייז אין יענער צייט. אין די צווייטע וועלט קריג האט פרעד געבויט באראקן פאר די מיליטער, און נאך דער מלחמה האט ער פארברייטערט זיינע אפעראציעס און ער האט געבויט הייזער פאר די פאמיליעס פון מלחמה וועטעראנען. אין די פריע 1930ער יארן האט פרעד באגעגנט מערי מעקלעאד, וואס האט אימיגרירט מיט איר סקאטישע משפּחה פון די פאראייניגטע קעניגרייך. ער האט חתונה געהאט מיט איר אין יאנואר 1936 אין א צערעמאניע וואס איז געפייערט געווארן אין אַ פּרעסביטעריאנישע קירכע.

די פּארל האָט געוואוינט אין די דזשאמעיקא קוואַרטל אין די קווינס בארא, ניו יארק. דעם 5טן אפריל 1937 האבן זיי געבוירן זייער ערשטע טאכטער, מאריאנא טראמפ, און דערנאך זייער זון פרעדריק דזשוניער (1938–1981), עליזאבעט (געבוירן 1942), דאנאלד (געבוירן 1946), און ראבערט (1948–2020). דער עלטסטער ברודער, פרעד טראמפ דזשוניער, איז אַריין אין די פאמיליע ביזנעס, און האט זיך פארפּלאנטערט מיט זייער טאַטן און איז געגאנגען זיך לערנען צו ווערן אַ פּילאָט פאר ליפטליניעס. ער איז געשטאָרבן פון האַרץ פראבלעמען נאכן זיין צוגעבינדן צום ביטערן טראפ אין 1981 אין עלטער פון 43; דאנאלד טראמפּ שרייבט צו דער פאקט אז ער פארמיידט זיך פון אַלקאָהאָל און רייכערן צו זיין ברודער'ס גורל. טראמפ'ס יונגערע ברודער, ראבערט, איז אויך אריין אין די פאמיליע ביזנעס און איז געווארן א מענעדזשער. ראבערט טראמפ איז געשטאָרבן אין אויגוסט 2020. די טראמפּ שוועסטער זענען נישט געשטיפּט געווארן צו אַריינגיין אין די פאמיליע פירמע דורך זייער פאטער, וואס איז געשטארבן אין 1999. מאריאַנא טראמפּ האט געדינט אלס אַ ריכטער אין די פעדעראלע אפּעליר געריכט און די קאָלאָמביע דיסטריקט, דעקנדיג דעלעווער, ניו דזשערזי און פּענסילוואַניע; א שטעלע צו וועלכער פרעזידענט ביל קלינטאן האט איר אפוינטעד. עליזאַבעט טראמפּ האט געארבעט אלס אַן אדמיניסטראטיווע געהילף אין א באַנק.

טראמפ אין די מיליטירישע אקעדעמיע אין ניו יארק,1964

דאנאלד טראמפּ איז געבוירן געווארן יוני 14, 1946 צו פרעד און מערי טראמפּ אין קווינס. אלס קינד האט זיך דער טאטע אפט מיטגעטיילט מיט אים אין זיינע ביזנעס באשלוסן און אים אפילו געלאזט העלפן די ארבעטער ביי די בוי ארבעט פון די געביידעס. אין זיין יוגנט האט ער געוואלט אויסוואקסן אַ פאכמאנישער בעיסבאל שפּילער. ביי די 13 יאָר, צוליב פּראבלעמען מיט דיסציפלין וואס ער האט געהאט, האָט זיין טאטע באַשלאסן אים צו איינשרייבן אין דער מיליטערישע אקאדעמיע אין ניו יארק, וואו ער האט שטודירט 5 יאָר. ער איז דאָרטן אויפגענומען געוואָרן אלס א ​​קאפּיטאן פון אַ קליינע גרופע סאלדאטן און אלס טרעינינג אפיציר פון אַ באטאליאן, און האָט מארשירט אין שפיץ פון אַ מיליטערישער פּאראדע אין מאַנהעטן צום אפּצייכענונג פון קאָלומבוס טאג דעם אקטאבער 12, 1963. זייענדיג אין קאלעדזש איז ער געווען פארמישט אין די פראיעקטן פון זיין פאטער'ס ריעל עסטעיט פירמע, ער איז געווען געשטעלט מיט'ן ווידער־עפענען אן אפארטמענט קאמפלעקס אין סינסינאטי, אהייא, וואָס זיין פאטער האט געקויפט אין 1962. אין 1972 האט טראמפּ פארקויפט דעם קאָמפּלעקס פאַר 6.75 מיליאָן דאלער.

אין אויגוסט 1964 האָט ער אָנגעהויבן שטודירן אין דער פאָרדהעם אוניווערסיטעט אין ניו יאָרק. אין זיין דריטער יאָר איז ער געגאנגען לערנען עקאָנאָמיקס אין די וואַרטאָן שולע אין די אוניווערסיטעט פון פענסיוועילניע, שטודיעס פון וואס ער האט גראדואירט אין 1968. אין 1966 ווען ער האט נאך געהאלטן אינדערמיט פון זיינע שטודיעס האט ער באקומען אַן איינלאדענונג צו זיך אנשליסן אין די אמעריקאנער ארמיי אין ראם פון א דרעפט ווי מען האט זיך געדארפט רעקרוטירן בשעת די וויעטנאם מלחמה, אבער ער האט באקומען א פטור צוליב זיינע שטודיעס און מעדצינישע סיבות. אין יולי 1968 האט א לאקאלע רעקרוטינג באָרד אים כאראקטעריזירט אלס פּאסיג צו מיליטערישע דינסט. אין אקטאבער 1968, איז ער געווארן קאראקטיריזירט 1-Y: מעדיצינישע צושטאנד אפזאג, און אין 1972, איז ער געווען רעכאראקטעריזירט אלס 4-F צוליב ביינער פראבלעמען אין זיין פוס, וואָס האט אים דיסקוואַליפיצירט פון מיליטערישער דינסט פאר אייביג.

פּריוואט לעבן און משפּחה

אין 1977, האט טראמפּ געהייראט איוואנא זעלניקאָווא ווינקלמאַיר, אַ טשעכיש מויד, מיט וועמען ער האט דריי קינדער - דאָנאַלד דזשוניער, איוואַנקא און עריק - איידער די פּאָר זעבן זיך צעשיידט אין 1992. זייער פארהייראט לעבן, ווי אויך טראמפּ'ס ביזנעס אנגעלעגנהייטן, זענען כסדר געלופטערט געווארן אין די טאַבלויד פּרעסע אין ניו יארק סיטי אין די 1980ער. טראמפ האט געהייראט מיט'ן אמעריקאנער אקטריסע מארלא מעיפּלס וועלכע האט געבוירן טראמפ'ס פערטע קינד, טיפעני, אין 1993. זייער הייראט האט זיך געענדיגט מיט זייער צושיידונג אין 1999. אין 2005 האט טראמפ חתונה געהאט מיט דער סלאווענישער מויד מעלאַניאַ קנאוס, און זייער זון באַראן איז געבוירן געווארן דאס פאלגענדע יאר. מעלאַניא טראמפּ איז געווארן בלויז די צווייטע פרעמד-געבוירן ערשטע דאַמע פון די פאַראייניגטע שטאַטן ביי טראמפּ'ס איינשווערונג אלס פּרעזידענט אין 2017.

זיין טאכטער איוואנקא טראמפּ האָט זיך מגייר געווען צו אידישקייט איידערן חתונה האבן מיט דזשעראד קושנער. זי האָט איבערגענומען איר טאטן אין די געשעפטן בשעת ​​די פרעזידענטליכע וואלן אין 2016. איוואנקא האָט אויך געהאָלפן פירן דעם קאמפיין און האט געגעבן רעדעס אין שטיצע דערפון אין עטליכע סטעיטס אין די פאראייניגטע שטאטן. זיין זון עריק, סערווירט ווי געהילף פאַרוואַלטער אין זיין פירמע.

ביזנעס קאַריערע

טראמפ האטעל אין לאס וועגאס באדעקט מיט 24 קאראט גאלד

נאך זיינע שטודיעס איז ער ווייטער אנגעגאנגען מיט זיין אקטיוויטעט אין זיין פאטער'ס ריעל עסטעיט פירמע וועלכע האט זיך באצויגן אויף פארדינגען פאר די מיטל קלאס פארדינער אין ברוקלין, קווינס און סטעטן איילענד. אין 1971 האט ער זיך אריבערגעצויגן קיין מאנהעטן. ער איז אינעם זעלבן יאר געווארן די פירמע'ס טשערמאן און האט געטוישט די נאמען צו "טראמפ ארגאניזאציע". אין 1973 זענען פרעד און דאנאלד טראמפ, צוזאמען מיט זייער פירמע, אנגעקלאגט געווארן דורך די פ.ש. יוסטיץ דעפארטמענט מיט'ן אנגעבליך פארלעצן דעם פעיר האוזינג געזעץ (1968) ביים אפערירן 39 אפארטמענט געביידעס אין ניו יארק סיטי. די טראמפס האבן צוערשט קעגנגעקלאגט דעם יוסטיץ דעפארטמענט פאר 100 מיליאן דאלאר, באשולדיגנדיג שאדן צו זייערע רעפוטאציעס, און טענה'נדיג אז עס שטאמט פון דאס אומפארגינען דער וואוקס פון דער פירמע. אין 1975, זענען די זייטן צוגעקומען צו אן אפמאך.

צווישן די פראיעקטן אין וועלכע ער איז געווען פארמישט זענען טראמפ טאוער און טראמפּ ווארלד טאַוער אין ניו יארק, 'די טראמפּ געביידע' אין ניו יארק וואס ער האָט געקויפט און רענאווירט, טראמפּ פּארק עוועניו וואָס ער איבערגעמאכט צו א רעזידענטשעל געביידע, די טראמפּ פּלאזא האטעל און קאסינא, די טאַזש מאהאל האטעל און קאסינא, און די טראמפּ קאסטל האטעל און קאסינא אין אטלאנטיק סיטי, די פּלאזאַ האטעל אין ניו יארק וואס ער האט געקויפט אין 1988 און פארקויפט אין 1995, די טראמפּ האטעל אין לאס וועגאס, די מאראלאגא רעזארט אין פאלם ביטש ווי אויך רעזארט ערטער און גאלף פעלדער אין דער וועלט. ווען די אמעריקאנער עקאנאמיע איז אריינגעפאלן אין ריסעשאַן אין 1990, האבן אסאך פון טראמפ'ס געשעפטן געליטן, און פיר פון זיינע פירמעס זענען געגאנגען באנקראט.

טראמפּ האט געמארקעט זיין נאָמען ווי אַ ברענד אין פילע ביזנעס אונטערנעמונגען אַרייַנגערעכנט טראמפּ פינאַנציעל, אַ היפּאָטעק פירמע, און די טראמפּ אונטערנעמונג איניציאטיוו (אַמאָל טראמפּ אוניווערסיטעט), אַן אָנליין בילדונג פירמע מיט געוויכט אויף אויף גרונטאייגנס אינוועסמענט און אונטערנעמערשאפט. די לעצטע פירמע, וועלכע האט אויפגעהערט אפערירן אין 2011, איז געווען דער ציל פון קלעס-עקשן קלאגעס פון געוועזענע סטודענטן און א באזונדערע קלאגע פונעם אטוירני גענעראל פון ניו יארק סטעיט, באשולדיגנדיג שווינדל. נאכ'ן ערשט לייקענען די באשולדיגונגען, האט טראמפ געשלאסן די קלאגעס פאר 25 מיליאן דאלאר אין נאוועמבער 2016. אין 2019, מער ווי צוויי יאר אין זיין פרעזידענטשאפט, האט טראמפ איינגעשטימט צו באצאלן 2 מיליאן דאלאר אין שאדנס און דעקלערן שולד צו שליסן נאך א פראצעס דורכ'ן אטוירני גענעראל פון ניו יאָרק, וועלכער האָט אים אָנגעקלאָגט אין אומלעגאל נוצן די פארמעגן פון זיין טשאריטי, די טראמפּ פונדאציע, צו פינאַנצירן זיין פּרעזידענטליכע קאמפיין אין 2016. אלס טייל פונעם סעטלמענט, האט זיך דער טראמפ פונדאַציע אויפגעלעזט.

טראמפ איז געווען א פראדוצירער און באלעבאס פון אן אמעריקאנער רעאליטעט שאָו.

טראמפ איז דער אייגנטימער פון דער קארפאראציע "די טראמפ ארגאניזאציע", און דער גרינדער פון דער פירמע "טראמפ פארוויילונג רעזאָרטס", וועלכע פארנעמט זיך מיט בוי ארבעט, אפעראציעס פון ​​געביידעס, קאַסינאָס, קולטור-אינסטיטוציעס און האָטעלן איבער דער וועלט. זיין פארשווענדענישע לעבנס שטייגער, האט אים געמאכט בארומט אין די לעצטע יאר־צענערס פון די 20 יאָרהונדערט. אנהייב 21סטן יארהונדערט איז ער אויך געווען א בארימטע טעלעוויזיע פערזענליכקייט א דאנק א פאפולערע פראגראם וואס ער האט פארגעשטעלט מיטן נאמען "The Apprentice", וואס איז געלאפן אין די יארן 2004–2015.

פארמעגן

טראמפ איז ווארשיינליך דער ערשטער ביליאנער פרעזידענט פון די פאראייניגטע שטאטן, און בפרט דער רייכסטער. די פּינקטליכע ווערד זיינע איז אומבאַקאַנט און איז שנוי מחלוקת. אין 2005, איז ארויגעקומען טימאטי ברייען'ס בוך "טראמפ נעישאן: דע ארט אף ביאינג א דאנאלד". אינעם בוך שטייט אז די ווערד פון טראמפ'ס פארמעגן באשטייט צווישן 150 און 250 מיליאן דאלאר, און אז ער איז א "מיליאנער" און נישט קיין "ביליאנער", ווי טראמפ שרייט. אין רעאקציע האט טראמפ אריינגעגעבן א באשמוצונג אנקלאגע קעגן דעם שרייבער. יולי 17, 2009 האט דער סופּרים קאורט פון ניו דזשערזי ארויסגעווארפן די קלאגע, און געאורטיילט אז ברייען האט נישט באשמוצט טראמפ ווען ער האט גע'טענה'ט אז זיין ווערד איז פיל נידריגער ווי טראמפ האט געשריגן. דער געריכט האט נישט דיסקוטירט די פראגע פון ​​די ריכטיגע ווערד פון טראמפ'ס פארמעגן.

פארבס שאצט טראמפ'ס פארמעגן אין 2020 ביי 2.1 ביליאן דאלאר, אין פארגלייך צו די 4.5 ביליאן דאלאר פון 2016. טראמפ האט קיינמאל נישט אפיציעל ארויסגעגעבן זיינע שטייער רעקארדס, דערפאר איז אוממעגליך צו וויסן מיט זיכערקייט וויפיל ער איז ווערד. בשעת די 2016 פּרעזידענטליכע וואלן קאמפיין, האט די ניו יארק טיימס אויפגעדעקט טייל פון טראמפּ'ס שטייער ריטערנס פון 1995 פון וואָס עס ארויסגעקומען אַז ער האט פאלוירן 916 מיליאָן דאלער יענער יאָר. דאָס האָט אים ערמעגליכט צו רעכענען די פארלוסטן אין די פאלגענדע יארן און אויסמיידן צאלן שטייערן. ביי איינע פון ​​די פרעזידענטליכע דעבאטעס האט טראמפ געזאגט אז ער האט נישט באצאלט שטייערן ווייל ער איז קלוג.

ווערק

טראַמפּ איז דער ארויסגעבער פון עטליכע שטארק פאפולערע ביכער. צווישן זיי דער גאר אויפגעכאפטע בוך 'דער קונץ פונעם געשעפט' (The Art of The Deal), וואס רעדט איבער וויאזוי צו פירן און שליסן געשעפטליכע פארהאנדלונגען.

אויך האט ער א יאר פאר דער סעפטעמבער 11 אטאקע אויף די צווילונג וואלקן קראצערס אין מאנהעטן ארויסגעגעבן די בוך 'די אמעריקע וואס מיר פארדינען זיך' (The America We Deserve), אין וועלכע ער זאגט פאר אז טעראריסטן זענען נישט ווייט פון צו נוצן עראפלאנען אויסצופירן א שרעקליכע טעראריסטישע אטאקע אויפן אמעריקאנעם באדן. אין זיין בוך קריטיקירט ער די צוגאנג פון דער דעמאלטס'דיגער רעגירונג, וואס ברענגט נישט קיין גוטע קאנסעקווענצן.

2016 פּרעזידענטליכע וואַלן

רעפובליקאנער פארטיי נאמינאציע

טראמפ'ס קאמפיין לאגא

טראמפ איז געווען א מיטגליד אין דער דעמאקראטישער פארטיי ביז 1987, דערנאך איז ער געווארן א מיטגליד אין דער רעפובליקאנער פארטיי ביז 1999. פון דעמאלט ביז 2001 האט ער געשטיצט די רעפארם פארטיי. אין 2001 האט ער זיך אומגעקערט צו דער דעמאקראטישער פארטיי ביז 2009. אין 2008 האט ער אפילו אויסגעדריקט שטיצע פאר די אימפיטשמענט פון פרעזידענט דזשארזש וואקער בוש. דערנאָך איז ער צוריק געווארן אן אָנהענגער פון דער רעפובליקאנער פארטיי, אויסער אַ קורצע צייט אין 2011–2012 ווען ער איז געווען אומאפהענגיג. ער האָט אויסגעדריקט אינטערעסע אין קאנדידאטירן פאר דער רעפובליקאנער פרעזידענטליכע נאמינאציע פון 2012, און מען האט געזאגט אויף אים אז ער איז איינער פון די מערסט פאפולערע קאנדידאטן צו לויפן אין די 2012 פריימעריס פון דער רעפובלוקאנער פּאַרטיי. מיט אלעם איז ער דערמאלט נישט געלאפן פאר אמט.

דאָנאַלד טראַמפּ טראָגט א מאגא (מאַך ווידער גרויס אַמעריקע) רויטן היטל ביי אַ קאַמפּיין ראלי אין פאונטען הילס, אַריזאָנא, מערץ 2016.

דעם 16טן יוני, 2015, האָט ער געמאָלדן זיין קאַנדידאַטור פאַר די 2016 פּרעזידענטליכע וואלן מטעם דער רעפובליקאנער פארטיי אונטערן שלאג־ווארט "מאַך אַמעריקע ווידער גרויס" (Make America Great Again). ביים אוונט אינעם טראמפ טאַוער וואו ער האט געלאזט אין גאנג זיין קאמפיין, האט ער דערקלערט אז ער וועט בויען א וואנט צווישן מעקסיקא און די פאַראייניגטע שטאטן, און אז עס זענען דא ​​אומלעגאלע אימיגראנטן וואס כאפן זיך אריין צו די פאראייניגטע שטאַטן פון מעקסיקא וואס ברענגען אריין דראגס און פארברעכנס, דאס האט אנגעדרייט א שטורעם ביי די מידיע און די אמעריקאנער פּאליטישע סיסטעם, און איז געווארן קריטיקירט אויך פון מיטגלידער פון זיין פּאַרטיי, אַריינגערעכנט דזשעב בוש, ריק פּערי, מיט ראמני און מארקא רוביא. ער איז שפעטער קריטיקירט געווארן פאר'ן אטאקירן סענאטאר דזשאן מעקעין, וועלכער האט געזאגט לויט אים אז די 15,000 מענטשן וועלכע זענען געקומען צו טראמפ'ס ראלי זענען משוגעים, זאגנדיג אז אין זיינע אויגן איז מעקעין, וועלכער איז געפאנגען אין די וויעטנאם קריג, נישט קיין מלחמה העלד. אויך איז ער קריטקירט געוארן פאר זיין רוף אין דעצעמבער 2015 צו פארבאטן מוסולמענער אריינצוקומען אין די פאראייניגטע שטאטן ביז די רעגירונג וועט אנאליזירן פובליק מיינונג אנקעטעס אין דער מוסולמענער וועלט לויט וועלכע מערסטנס מוסולמענער דערקלערן האַס צו אמעריקאנער און וועט באשליסן ווי אזוי צו האנדלען מיט דעם. די פויפסט פראַנציס האט געזאגט אז ווער עס האלט אז מען דארף בויען ווענט און נישט בריקן איז נישט קיין קריסט. טראמפ האט געענטפערט אז די סטעיטמענט פונעם פויפסט איז שענדליך און אז קיין פירער, ספעציעל א רעליגיעזער פירער, האט נישט די רעכט צו צווייפלען אין א צווייטנ'ס גלויבונג.

טראמפ האט גענאסן פון א שטענדיגע אויבערהאנט אין אנקעטעס צווישן די רעפובליקאנער פארטיי קאנדידאטן און אינעם פארנעם פון מידיע דעקונג דורכאויס די קאמפיין. ער האט זיך פארמאסן אנטקעגן זעכצן אנדערע מאכטפולע קאנדידאטן, אריינגערעכנט בען קארסאן און גאווערנארס ווי זשעב בוש דער גאווערנאר פון פלארידע, קריס קריסטי דער גאווערנאר פון ניו דזשערסי און דזשאן קעסיג דער גאווערנאר פון אהייא, און סענאטארן ווי טעד קרוז פון טעקסאס און מארקא רוביא פון פלארידע. אבער רוב פון זיי האבן זיך ארויסגעצויגן שוין אין די ערשטע פאזעס פונעם פארמעסט איינזעענדיג אז זיי האבן נישט קיין אויסזיכטן, מיטן אויסנאם פון געציילטע קאנדיטאטן ווי טעד קרוז, וועלכער האט געוואונען די וואלן אין א רייע שטאטן און איז געבליבן אינעם פארמעסט ביז כמעט צום סוף ווען עס איז קלאר געווארן אז טראַמפּ האט געוואונען די מערהייט פון די דעלעגאטן. אין די פריימעריס וועלכע האבן זיך אנגעהויבן אין פעברואר 2016 איז ער אריינגעקומען דער צווייטער אין די אייאווע קאוקוסעס (נאך טעד קרוז) און דער ערשטער אין די ניו העמפשיר פריימעריס, די דרום קאראליינע פריימעריס און די נעוואדע קאוקוסעס. אויך אין די וואלן אין 13 שטאטן אין מערץ 1, "דעם גרויסן דינסטאג", האט טראמפ געוואונען די גרעסטע צאל שטימען צווישן די קאנדידאטן. בשעת דער קאמפיין האט ער באקומען די שטיצע פון ​​עלטערע רעפובליקאנער ווי סערע פעילין, קריס קריסטי, רודי דזשוליאני און דזשעף סעשאנס, הגם רוב פון די רעפובליקאנער עסטעבלישמענט איז נישט געווען צופרידן פון זיין קאנדידאטור, סיי צוליב זיינע פאליסיס און סטיל, און אויך אויס זארג אז זיין כאראקטער וועט מאכן שווער פאַר די פּאַרטיי צו געווינען די וואַלן.

ביי זיין קאמפיין האט טראַמפּ אויסגעגעבן דאס ווייניגסטע געלט פון אלע קאנדיטאטן, און דאך האט ער געבראכן די רעקארד באקומענדיג די מערסטע צאל שטימען פון סיי וועלכע רעפובליקאנער פריימערי פארמעסט אין היסטאריע.

די אַלגעמיינע וואַלן

טראמפ ביי א קאמפיין ראלי אין אריזאנע, אוגוסט 2016

אין מאי 2016 האט ער געוואונען די פריימעריס אין אינדיענע מיט אן איבערוויגנדע מערהייט. דעריבער האבן טעד קרוז און דזשאן קעיסיק זיך ארויסגעצויגן פונעם געיעג און טראמפ איז געבליבן דער איינציגסטער קאנדידאט פון דער רעפובליקאנער פארטיי. מאי 26, 2016 האט טראמפ מצליח געווען אנצוקומען צו די געפאדערטע סומע פון דעלעגאטן וואס פאדערט זיך צו פארזיכערן מיט די נאמינאציע, און ביי דעם קאנווענטשאן פונעם פארטיי אין יולי 2016 איז ער געווארן דער אפיציעלער קאנדידאט פארן פרעזידענטשאפט. עטלעכע טעג פריער, האט ער גענומען דער גאווערנאר פון אינדיאנא, מייק פּענס, אלס זיין מיטלויפער פאר ​​וויצע פּרעזידענט.

טראמפ'ס געלויף איז געווען אומגעווענליך צוליב די פילע אטאקעס וואס ער האט געכאפט פון די מידיע און זיינע קעגנער און צוליב זיינע שארפע רעאקציעס אויף די אטאקעס. בשעת אַן אינטערוויו מיט די סי.בי.עס מידיע נעטווארק, האָט ער געזאגט וועגן מוסלומענער, אַז הגם ער האָט נישט ליב פּראופיילינג, איז צייט אָנצוהויבן קלערן דערוועגן, ווי עס ווערט סוקסעספול דורכגעפירט אין מדינת ישראל און אין אנדערע לענדער. ביים דעמאקראטישע קאנווענשאן האבן גערעדט די עלטערן פון אן אמעריקאנער מוסלומענער זעלנער וואס איז גע'הרג'עט געווארן בשעת'ן דינען אין איראַק, און האבן אטאקירט טראמפּ פאַר זיינע ווערטער. טראמפ האט זיך שארף אויסגעדרוקט קעגן דער דעמאקראטישער קאנדידאט, הילארי קלינטאן, און האט איר אנגערופן דורכאויס דעם קאמפיין "קרומע הילארי" (Crooked Hillary). ער האָט אויך גענוצט פארשעמענדע טערמינען קעגן זיינע קעגנער אינעם רעפובליקאנער פארמעסט, ווי "קליינע מארקא" (סענאטאר מאַרקאָ רוביאָ) און "טעד דער ליגנער" (סענאטאר טעד קרוז).

רעזולטאַטן פון די פּרעזידענטליכע וואַלן, 2016.

אָקטאָבער 8, 2016 האט ארויסגעליעקט אַ ווידעא פון ​​2005, אין וועלכן מען האָט געהערט טראמפ רעדן מיט א פארוויילונגס זשורנאליסט אין א פראסטע שפראך, און אז "ווען דו ביזט א שטערן…קענסטו טון סיי וואס" מיט פרויען. כאטש טראמפ האט אוועקגעמאכט דעם שמועס אלס "לאַקער צימער רעדן", האבן ענדליך מער ווי צוויי טוץ פרויען גע'טענה'ט אז זיי זענען געטשעפעט און אַטאַקירט געווארן דורך טראמפ אין דער פאַרגאַנגענהייט (עטליכע פון די באשולדיגונגען זענען געמאכט געווארן נאכדעם וואס טראמפ איז געווארן פרעזידענט). דורכאויס די קאמפיין האבן טראמפ און זיינע לעגאלע פארטרעטערס בכלל געלייקנט די באשולדיגונגען און געזאגט אז אלע פרויען האבן ליגנט געזאגט און אז זיי זענען פינציאנירט געווארן דורך די קלינטאן קאמפיין מיטן ציל אים צו באשמיצן; זיי האבן אויך אנגעמערקט אַז ביל קלינטאן איז פריער באשולדיגט געווארן מיט ענליכע טאהטן. טיילווייז צוליב דעם ווידיאו, איז טראמפ'ס שטיצע צווישן פרויען וויילער — שוין זייענדיג נידעריג — ווייטער פארגאנגען, און טייל רעפובליקאנער האבן אנגעהויבן צוריקציען זייערע אינדארסירונגען.

דורכאויס די טעג איידער די 2016 אלעגמיינע וואלן זענען פארגעקומען, האבן אלע מידיע נעצן, אנקעטע נעמער און סטאטיסטיקער פארגעשאצט א קלארע געווינס פאר זיין דעמאקראטישע קעגנער הילערי קלינטאן. ווען עס אבער געקומען די נאכט פון די וואלן (דינסטאג לך תשע"ז) האט זיך ארויסגעשטעלט אז טראמפּ האט געווינען אלע סווינג שטאטן, אריינגערעכנט אזעלכע שטאטן ווי פענסילוועניע, מישיגן און וויסקאנסין וואס א רעפובליקאנער האט זיי נישט געוואונען זינט די 1980 יארן, און דערמיט געווינען דאס פרעזידענט בענקל אלס טאטאלע סורפרייז. קלינטאן האט טאקע באקומען א צוויי מיליאן מער שטימען דורכאויס גאנץ אמעריקע צוליב די פילע שטימען וואס זי באקומען אין די געציילטע שטארק באוואוינטע שטאטן, אבער טראמפּ האט למעשה געוואונען די וואלן וויבאלד ער איז אריינגעקומען דער געווינער אין רוב שטאטן, באקומענדיג 306 עלאקטארעלע שטימען, אנטקעגן קלינטאנס 232 עלאקטארעלס.

ביי די אלגעמיינע וואלן וואס איז פארגעקומען נאוועמבער 8, 2016, האט טראמפ באקומען 46.1% פון די שטימען, 2.9 מיליאן שטימען ווייניגער ווי זיין קעגנער, אבער ער האט געוואונען אין 30 שטאַטן וועלכע האבן אים געגעבן 306 פון 538 עלעקטארעל קאלעדזש שטומען (57%), און איז ערוויילט געווארן אלס דער 45סטער פרעזידענט פון די פאראייניגטע שטאטן. דורכאויס דעם וואל קאמפיין איז קלינטאן געווען פאראויס אין א מערהייט פון אנקעטעס, און דערפאר איז טראמפ'ס זיג אויפגענומען געווארן דורך די מידיא און די מאסן מיט איבערראשונג. טראמפּ איז דער פינפטער פרעזידענט ערוועלט אָן באקומען אַ מערהייט פון די פּאפּולערע שטימען (פאר אים זענען געווען דזשאן קווינסי עדעמס, ראטערפארד העיס, בענדזשעמין העריסאן, און דזשארדזש וואקער בוש), און דער ערשטער פּרעזידענט אן פּאליטישע אָדער מיליטערישע ערפאַרונג פון פריער. ביי זיין איינשווערונג איז טראמפ געווען דער עלטסטער פרעזידענט אין דער צייט פון אריינוועלונג, זייענדיג 70 און זיבן מאנאטן (די פריערדיגע רעקארד איז געהאלטן געווארן דורך ראנאלד רעיגען, וועלכער איז געווען 69 אנהייב פון זיין טערמין. טראמפ'ס נאכפאלגער און הויפט קעגנער אין די 2020 וואלן, דזשאו ביידען האט געבראכן זיין רעקארד און איז געווארן איינגעשוואוירן אין עלטער פון 78). ער איז אויך געווען דער רייכסטער מענטש צו זיין פרעזידענט (די פריערדיגע רעקארד איז געהאלטן געווארן דורך דזשארזש וואשינגטאן).

==פרעזידענט