רבי אליעזר זאב ראזנבוים (ראחוב)

רבי אליעזר זאב ראזנבוים (י' סיון תרפ"ט - י"ח כסלו תשנ"ט) איז געווען דער ראחוב'ער רבי.

ביאגראפיע

רבי אליעזר וואלף איז געבוירן צו זיין פאטער רבי יצחק ראזנבוים, זון פון רבי מאיר'ל קרעטשניפ'ער, און צו זיין מוטער חיה א טאכטער פון רבי שלמה איזאקסאן רומאן'ער רב, זיין פאטער איז געווען רבי אין שטאט ראחוב און דערנאך אין אויבער-ווישווא, ג' סיון תש"ד זענען זיינע עלטערן, ברידער, שוועסטער מיט זייערע פאמיליעס, געהארגעט געווארן אין אוישוויץ, נאר רבי אליעזר וואלף און איין שוועסטער זענען געבליבן ביים לעבן, נאכן קריג איז ער געפארן קיין רומאן צו זיין זיידע רבי שלמה איזאקסאן, און ער האט געלערנט מיט אים שולחן ערוך יורה דעה במשך פון א האלבע יאר.

ער איז געפארן קיין ארץ ישראל מיט די מעפילים שיף 'כנסת ישראל', אין ג' כסלו תש"ז זענען זיי פארטריבן געווארן קיין קפריסין דארט זענען זיי געווען במשך פון כמעט א יאר, ווען ער איז ענדליך אנגעקומען קיין ארץ ישראל אין חודש חשוון תש"ח איז ער אריין לערנען אין ישיבה פון רבי יוסף צבי דושינסקיא דער ירושלימ'ער רב, דארט האט ער געלערנט מיט זיינע קאזנס (און שפעטער זיינע שוואגערס) רבי צבי הירש ראזנבוים און רבי יעקב ישכר בער ראזנבוים. זומער תש"ח ווען עס האט אויסגעבראכן דער "מלחמת השחרור" איז ער אריבער לערנען אין ישיבת חכמי לובלין אין בני ברק. שפעטער האט ער געלערנט אין ישיבת גאוני וואלאז'ין אין תל אביב, דארט האט ער באקומען היתר הוראה.

חודש אב תשי"א האט ער חתונה געהאט מיט רעכל די טאכטער פון זיין קאזן רבי חיים מרדכי ראזנבוים נאדווערנער רבי, אנהייב האט ער געוואוינט נעבן זיין שווער אין יפו, מיט די ראט פון בעלזער רב זענען זיי אריבער קיין רמלה, דארט האט ער אויפגעשטעלט א בית מדרש און אנגעהויבן פירן א רבי'סטווע, תשכ"ה איז ער אריבער קיין רמת גן, אנהייב אין רחוב מודיעין, און י"ב תמוז תשכ"ז איז ער אריבער קיין רחוב ברקאי וואס איז נאנט צו בני ברק.

רבי אליעזר זאב איז געווען א חסיד פון בעלזער רב און א אנהענגער פון היינטיגן בעלזער רבי ישכר דוב רוקח, טראץ דעם איז ער נישט געגאנגען צו די בחירות אלץ א תלמיד פון הרב דושינסקיא, ער איז געווען מפורסם אלץ א בעל מופת און בפרט אין עניינים פון רפואה און צוזאגן קינדער.

אין זיינע לעצטע יארן האט ער געליטן אויפן הארץ, און ער איז נפטר געווארן י"ח כסלו תשנ"ט און באערדיגט געווארן אין דעם נייעם וויזשניצער בית החיים אין בני ברק, עס געבויט געווארן א אוהל אויף זיין ציון.

על פי צוואתו האט אים איבערגענומען דער צווייטער זון רבי יחיאל מאיר ראזנבוים.

קינדער

• רבי יוסף יצחק (נפטר געווארן י' חשון תשע"ב).
• זיין איידעם רבי שלמה שמואל כהנא, זון פון רבי מרדכי דוד כהנא, דער ספינקער רבי פון ירושלים.
• זיין איידעם רבי יהודה ראזנבוים, דער לינסקער רבי, זון פון רבי ישראל ראזנבוים סטאניסלאווער רבי פון מאנסי.
• זיין איידעם הרב גדליה משה ראטה, דער רבי פון שומרי אמונים אין אשדוד.
• זיין זון רבי יחיאל מאיר, דער יעצטיגער ראחוב'ער רבי, איידעם פון רבי ישעיה שנייבאלג, דער רב פון בני ראם, און דיין אין בית דין מחזיקי הדת בעלזא.
• זיין איידעם רבי יצחק אייזיק כהנא זון פון רבי משה נחמן כהנא זון פון רבי יוסף מאיר כהנא ספינקא'ער רבי פון ירושלים.