רבי אברהם אופנהיים
רבי אברהם אופנהיים (נפטר אין האנאווער י"א חשון ה'תקמ"ז[1][2] אדער תקמ"ט[3] אדער תקמ"ג[4]) איז געווען א רב אין דייטשלאנד און א מחבר ספרים.
ביאגראפיע
ער איז געבוירן אין מאנהיים צו יהודה לייב אופנהיים. ער האט געדינט ווי א ריש מתיבתא אינעם מאנהיימער קלויז. שפעטער איז ער אריבער וואוינען און דינען אין אמסטערדאם.
ער האט מחבר געווען א ספר "מרגניתא שפירא" אויף הלכות שופר, געדרוקט צום ערשט אין אמסטערדאם, תקכ"ז. ער דערמאנט אין זיין ספר נאך צוויי חיבורים זיינע, 'אמרי יאה' און 'מגן אבות' וואס זענען למעשה נישט געדרוקט געווארן[5].
אין אמסטערדאם איז ער געווארן א מגיה און רעדאקטאר ביי די פרופס ברידער דריקעריי. אינעם באר היטב פון רבי זכריה מענדל פון בעלז חלק חושן משפט געדריקט אין יאר תקכ"ד זענען אריינגעשטעלט געווארן פילע הגהות פונעם מגיה – ווארשיינליך רבי אברהם אפנהיים[6].
אין יאר תקכ"ט האבן די פרופס ברידער איבערגעדרוקט דער באר היטב פון רבי יהודה טיקטין אויף אורח חיים, אינאיינעם מיט רבי אברהם'ס אייגענעם חיבור 'אשל אברהם'. דער אשל אברהם האבן זיי צעטיילט אין צוויי; איין טייל איז אריינגעשטעלט געווארן אין באר היטב, און דער אנדערער איז געדרוקט געווארן אויפן בלאט אין א באזונדערע מדור[7].
אין יאר תקל"ז האבן די פרופס ברידער זיך שוין געהאט צעטיילט. רבי אברהם האט דאן איבערגעדרוקט דעם באר היטב פון רבי יהודה טיקטין ביי איינער פון די ברידער, יוסף. דער ספר האט געהאט פילע הוספות און חידושים, סיי אויפן בלאט אין סיי אין דער באר היטב זעלבסט. אין דער באר היטב האט רבי אברהם אריינגעדרוקט שטיקלעך "מהדורא בתרא" פון רבי יהודה טיקטין, געקליבענע שטיקלעך פון רבי זכריה מענדל'ס באר היטב, און שטיקלעך פון זיין אייגענע חיבור "אשל אברהם"[8][9][10].
א יאר דערויף, תקל"ח, האט רבי אברהם געדרוקט א ספר ביי אן אנדערן ברודער פון די פרופס פאמיליע, אברהם. דאס מאל איז עס געווען דער באר היטב אויף יורה דעה פון רבי זכריה מענדל וואס האט געדינט אלס באזע, אויף וואס רבי אברהם האט צוגעלייגט געקליבענע שטיקלעך פון רבי יהודה טיקטין. ער האט אויך צוגעלייגט שטיקלעך פון זיין אשל אברהם, אבער ווייניגער ווי אין די אויפלאגע פון תקל"ז. טראצדעם וואס רבי זכריה מענדל'ס באר היטב האט געדארפט צו זיין דער עיקר, זענען געווען דערין אסאך שטיקלעך פון רבי יהודה, אזוי אז עס איז ענדערש א געמיינזאמע חיבור פון רבי יהודה און רבי זכריה מענדל רעדאגירט דורך רבי אברהם אופנהיים[8][9][10].
סוף האט ער געוואוינט אין האנאווער וואו ער איז נפטר געווארן אין א טיפן עלטער[2]. אויף זיין מציבה שטייט "בבית המדרש פה למד כשם ועבר"[1].
פאמיליע
זיין ווייב רבקה, טאכטער פון אברהם ריינגנום (וואס איז געווען א ברודער פון לעמל משה[11]) איז געשטארבן 1742 (תק"ב). זיין טאכטער רעכל ווייב פון דער געלערנטער רב ר' אייזיק ריינגאנום איז געשטארבן יוני 2, 1786 אין מאנהיים; דארט איז אויך געשטארבן זיין טאכטער מירל, ווייב פון חיים לייב בענשיים אום דעצעמבער 15, 1803[5].
דרויסנדע לינקס
- מרגניתא שפירא, אמשטרדם, תקכ"ז
רעפערענצן
- ↑ 1.0 1.1 נוסח המצבה, געברענגט אין בלאך, ספר החיים, זייט 326; געברענגט ביי שמואל יוסף פין, "הר"ר אברהם אופנהיים", כנסת ישראל, ווארשע, תשמ"ז, עמ' 9
- ↑ 2.0 2.1 "אפנהיים, אברהם", JewishEncyclopedia.com (ענגליש)
- ↑ מבוא לשו"ע של מכון ירושלים כתוב שנפטר בתקמ"ט.
- ↑ Wiener (Magazin I, 82 u. 88)
- ↑ 5.0 5.1 L. Löwenstein, Gesch. der Juden in der Kurpfalz, p. 227 (דייטש)
- ↑ אברהם גולדראט, "מיעוט דמות של ספרים – על מפרשי השולחן ערוך", תגים ה-ו, ירושלים, תשל"ה, עמ' 20
- ↑ מכון ירושלים, שולחן ערוך מהדורת פריעדמאן, ירושלים, תשנ"ו, אורח חיים, מבוא זייט 77 (פארלאנגט אומזיסטע רעגיסטראַציע)
- ↑ 8.0 8.1 יחיאל דוב ולר, "מהדורות באר היטב לשו"ע (ב)", ישורון יט, ירושלים, תשס"ז, עמ' תתמא–תתמב, אויף היברובוקס
- ↑ 9.0 9.1 מכון ירושלים, שולחן ערוך מהדורת פריעדמאן, ירושלים, תשנ"ו, יורה דעה, מבוא זייט 65 (פארלאנגט אומזיסטע רעגיסטראַציע)
- ↑ 10.0 10.1 אברהם גולדראט, "מיעוט דמות של ספרים – על מפרשי השולחן ערוך", תגים ב, בני ברק תשל"א, עמודים 6–7
- ↑ Lemle Moses Reinganum, אויף דייטשע וויקיפעדיע