בן בג בג
רבי יוחנן בֶּן בַּג בַּג איז געווען א תנא אין די תקופה פון די זוגות, אינעם דור פון דער ערשטער רבי יהודה בן בתירא, מיט וועלכער ער פלעגט אויסטוישן שריפטליכע דיסקוסיעס אין הלכה[1]. די ביידע האבן, לויט דער רמב"ם, געלעבט אין דער צייט פון הלל הזקן, נאך פאר'ן חורבן הבית[2].
| געבורט | המאה ה־1 |
|---|---|
| בני דורו | בן הא הא, הלל הזקן |
| ספרים | משנה, אבות ה, כב |
בן בג בג'ס פערזענליכער נאמען איז געווען יוחנן[1], אבער כמעט שטענדיג ווערט ער גערופן בלויז בן בג בג.
זיין מימרא אין פרקי אבות ווערט דערמאנט צוזאמען מיט בן הא הא'ס. עס זענען דא וואס האלטן אז בן בג בג און בן הא הא זענען דער זעלבער מאן[3].
לויט תוספות, זענען בן בג בג און בן הא הא געווען גרים, און זייערע נעמען זענען מרמז דערויף. דער ווארט "בג" איז גימטריא ה', – וואס דאס איז דער אות וואס איז צוגעלייגט געווארן צו די נעמען פון אברהם און שרה – די ערשטע גרים, וואס אלע גרים זענען ווי זייערע זין[4][5]. אנדערע זאגן אז די צונעמען האט מען זיי געגעבן זיי צו באהאלטן פון מלשינים צו די רוימישע אימפעריע וואס פלעגט נאכיאגן גרים[6]. ווידער דער תוספות יום טוב שרייבט אז מען האט זיי נישט גערופן ביים נאמען וויבאלד זיי האבן נישט מאריך ימים און זענען נישט געווארן מוסמך להוראה, אזוי ווי מען טרעפט ביי בן עזאי[5].
אין נאמען פון בן בג בג ווערט געברענגט אין פרקי אבות דער מימרא אין אראמיש:
הֲפֹךְ בָּהּ וַהֲפֹךְ בָּהּ (פּילעווע און באשעפטיג זיך אין תורה נאך און נאך), דְּכֹלָּא בָהּ (אלע וועלט חכמות זענען אין איר). וּבָהּ תֶּחֱזֵי (דורכ'ן לערנען תורה וועסטו קענען מבחין זיין דעם אמת), וְסִיב וּבְלֵה בָהּ (בלייב עוסק זיין אין תורה דיין גאנץ לעבן, ביז דער עלטער), וּמִנַּהּ לֹא תָזוּעַ (ריק דיך נישט אוועק פון לימוד התורה צו לערנען אנדערע חכמות), שֶׁאֵין לְךָ מִדָּה טוֹבָה הֵימֶנָּה (דו האסט נישט נאך א זאך אויף דער וועלט וואס פארמעסט זיך מיט די ווערט פון תורה)
אויסערדעם ווערן געברעגנט דורכאויס ש"ס פארשדענע הלכות אין זיין נאמען[7].
רעפערענצן
- ↑ 1.0 1.1 קידושין י, ב
- ↑ רמב"ם, הקדמה לפירוש המשנה
- ↑ רבי אברהם זכות, ספר יוחסין מאמר א אות ה
- ↑ תוספות, חגיגה ט, ב, ד"ה בר הי
- ↑ 5.0 5.1 תוספות יום טוב, אבות ה, כב
- ↑ רבי שמואל די אוזידא, מדרש שמואל אבות ה כב, בשם רשב"ם בשם זיין פעטער דער בעל בעל הטורים[אויסקלארונג פארלאנגט]
- ↑ בבא קמא כז, ב; קידושין י, ב; עירובין כז, ב; פסחים צו, א