רוי:אלדד הדני
אלדד הדני (אַרויסגערעדט: אֶלְדָד הַדָנִי) נאָמען פון אַ לעגענדאַרישן ייִדישן רייזנדער אין 9טן יאָרהונדערט.
ווי עס ווערט דערציילט אין די סיפורים וועגן אלדד הדני האָט ער זיך באַוויזן אין בבל און דערנאָך אין מצרים אין יאָר 880. ער האָט דערציילט פאַר די אידן, אַז ער איז אַ ייִד פון שבט דן, דעריבער הייסט ער "הדני", און אַז זיין לאַנד געפינט זיך אין מזרח–אַפריקע נישט ווייט פון רויטן ים, לעבן אַביסיניע. דערביי האָט ער אויך דערציילט לעגענדעס ווי אַזוי ער האָט זיך אַריבערגעקראָגן קיין בבל, פאַרשיידענע פאַסירונגען מיט שיפן און רויבערס, וואָס דערמאָנען ענלעכע לעגענדעס ביי אַנדערע פעלקער אין מיטלאַלטער. אלדד הדני האָט אויך אָנגעשריבן הלכות פון שחיטה און טריפות. די הלכות הייבן זיך אָן מיט די ווערטער "אמר רבּנוּ יהושע מפּי משׁה מפּי הגבוּרה".
נאָך אַ געוויסער צייט איז אלדד הדני פאַרשוואוּנדן גאוואָרן.
די סיפורים וועגן אלדד הדני זענען געווען זייער פאַרשפרייט. דער ערשטער סיפור איז געווען געדרוקט אין מאנטוא פאַר דעם יאָר 1480. אלדד הדני ווערט דערמאָנט פון רבי חסדאי אבן שפרוט (אין 10טן יאָרהונדערט), און באַזונדערס אין דער באַקאַנטער תשובה פון די אנשי קירואן צו רב צמח גאון. דער סיפור וועגן אלדד הדני איז געווען פאַרשפרייט אין מיטלאַלטער אויך ביי די קריסטן. וועגן אלדד זענען פארהאן פאַרשיידענע מיינונגען.
דער היסטאָריקער אברהם עפשטיין, אין זיין "מבוא" צום ספור פון אלדד הדני, האַלט אַז עפעס איז פארהאן אמת אין אלדדס מעשׂיות, אַז דאָס האָט אַ שייכות מיט די פאַלאַשן, די אידן וואָס האָבן אַ מאָל געהאַט אַ באַזונדערע מלוכה ביי אַביסיניע. גרעץ און אַנדערע האַלטן, אַז אלדד איז געווען אַ קאַראַיִמער מיסיאָנער און אַ שווינדלער. דאַקעגן יעקב רייפמאַן האַלט, אַז אַזאַ אלדד הדני האָט גאָרנישט עקזיסטירט, נאָר מען האָט שפעטער געפעלשט אַזאַ סיפור, און אַז אויך די תשובה צו רב צמח גאון איז געפעלשט.
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!