יואל לאנדא
 | |
| געבורט |
אויגוסט 22, 1980 (יארגאנג: 44) י' אלול ה'תש"מ ברוקלין |
|---|---|
| וואוינארט | וויליאמסבורג |
| פעילות בולטת | קרן תוספות יום טוב |
| באקאנט צוליב | צדקה לייסטונגען |
| באשעפטיגונג | The Allure Group |
| https://joellandau.com/ | |
יואל לאנדא איז א וויליאמסבורגער אונטערנעמער און פילאנטראפ, נוירסינג-האום מאגנאט און סאטמארער חסיד. ער איז דער גרינדער פון עטליכע העלט-קעיר פירמעס, און פון 'קרן תוספות יום טוב' ארגאניזאציע, און פיאנער פון 'וויליאמסבורג חלוקות'.
ביאגראפיע
יואל איז געבוירן י' אלול תש"מ[1], צו הרב יוסף דוב לאנדא, רב פון ביהמ"ד משכנות אברהם זלאטשוב אין קרית יואל, א בן־אחר־בן פון רבי יוסף פון יאמפאלא. יואל הייסט נאכ'ן סאטמארער רבי'ן. יואל לאנדא'ס ברידער זענען רבי שלום, דער ראב"ד 'בד"ץ לדון ולהורות' און ראש הכולל 'עמודי דגירסא', און רבי משה, דער רב פון ביהמ"ד יאמפעלע אין ווילאמסבורג, און גרינדער פון 'קרית זית רענן' אין מאונט אליוו, ניו דזשערסי[2]. ער איז אויפגעוואקסן אין קרית יואל; אלס בחור האט ער געלערנט אין עטליכע ישיבות, צווישן זיי אין ישיבת בנין דוד מאנטעווידעא ביים קאפישער רב רבי אהרן גד כ"ץ[3].
יואל האט געהייראט רחל, א טאכטער פון ר' ישראל משה שטיין פון וויליאמסבורג, וואו ער האט זיך באזעצט נאך דער חתונה. יואל איז א חסיד פון רבי זלמן לייב טייטלבוים פון סאטמאר. ער האט אפגעראכטן עטליכע מאל גרויסע הכנסת ספר תורה'ס ארייגערעכנט כ"ד שבט תשע"ט אין ארץ ישראל[4], און נאך איינס צום סאטמארער תלמוד תורה אויף טרופ עוועניו זאת חנוכה תשפ"ג[5] אריינגעגעבן דורך זיין זון, יהודה[6]. ביי דער חתונה פון זיין טאכטער אין עטרת אברהם און א שבע ברכות פאר פילאנטראפן האט ער צוגעשטעלט אויף א רייכע פארנעם מיט פולע ארקעסטרעס און באקאנטע זינגער[7][8], און האט לכבוד די שמחה פארטיילט באנוסעס פאר די איינגעשטעלטע אין די סאטמארער מוסדות, און נדבות פאר אלמנות[9].
ביזנעס אונטערנעמונגען
אין 2011 האבן לאנדא און זיינע מיט-גרינדער געגרינדעט די אלור גרופע (The Allure Group), וואו ער דינט אלס CEO. די פירמע, וועלכע נעמט איבער פארוואלטונג פון נורסינג-היימען וועלכע זענען אין דרינגענדן נויט פון פארבעסערונג, און וואלטן זיך אנדערפאלס געדארפט פארשליסן, האט ער געגרינדעט נאכ'ן מיטהאלטן די פראבלעמען אין דער אינדוסטריע ביים זארגן פאר זיין זיידן[10]. לאנדא און זיינע שותפים האבן דאן אפגעקויפט דער באנקראטירטער 'וויקטארי מעמאריעל שפיטאל' אין ברוקלין, און פארוואנדלט אין די 'העמילטאן פארק נורסינג און רעהאביליטאציע צענטער'[11]. ער האט דאן געקויפט אנדערע אריינגערעכנט צוויי ברוקלין-באזירטע האומס אין 2011 און 2012, וועלכע ער האט פארוואנדלט אין די לינדען צענטער און אין די קראון הייטס צענטער. שטייענדיג אין 2025, אפּערירט די גרופע זעקס צענטערן אין ניו יארק סיטי, אריינגערעכנט די בעדפארד צענטער (געוועזענע "אשל אברהם") אין וויליאמסבורג און די קינג דעיוויד צענטער אין בארא פארק[12].
טייל פון די אומפונקציאנירנדע נוירסינג היימען טוען לאנדא און די אלור גרופע איבערמאכן פאר רעזידענטשל דירות. אנפאנג 2015 האבן זיי געקויפט די 'קעבס נורסינג-היים' אין בעדפארד סטייוועסענט פאר $15.6 מיליאן. די פיר-שטאקיגע נאכגעלאזטע איינריכטונג[13] איז אראפגעווארפן געווארן צו בויען אויף איר 72,800 קוואדראט פיסיגער שטח, וועלכע איז אינצווישן דורך א ריזאונינג, א נייער הויכשטאקיגער דעוועלאפּמענט[14].
אין 2015 האבן לאנדא און די אלור גרופע אויך געקויפט די 'ריווינגטאן הויז', אן אומפונקציאנירנדע און כמעט ליידיגע נורסינג-היים אין לאוער-איסט-סייט מאנהעטן פאר $28 מיליאן[15]. די פראפערטי איז געקומען מיט א באגרעניצונג אז דאס האט נישט געטארט ווערן דעוועלאפט נאר האט געמוזט ווערן גענוצט פאר נאן-פּראפיט רעזידענטשל העלט-קעיר[16]. טראץ דעם איז די באגרעניצונג אוועקגענומען דורך די סיטי פון ניו יארק, וואס האט ערמעגליכט לאנדא צו פארקויפן די פראפערטי פאר $116 מיליאן צו לוקסעריעזע-קאנדאמיניומס דעוועלאפּערס אין 2016[15][17]. דער פארקויף איז אפּראווד געווארן טראץ לאנדא איז געווען שולדיג 6 מיליאן דאלאר אין שטייערן פאר דער שטאט[18]. דער ניו יארק סיטי קאמפטראלער ברעד לענדער האט ארויסגעשטעלט א רייע באשולדינגען אויף די סיטי און אויף לאנדא דערוועגן[19], און אין 2018 האט לאנדא באוויליגט צו באצאלן צוויי מיליאן דאלער אין שטראפן און נדבות פאר וואוילטעטיגע צוועקן, אין א שליכטונג מיט ניו יארק סטעיט אטורני גענעראל עריק שניידערמאן[20]. טיש דזשעימס האט, צוליב די קאנטראווערסיע, צוריקגעוויזן א $10,000 דאנאציע פון לאנדא[21].
דורכאויס די קאוויד-19 פאנדעמיק איז זיין רייכטום פארברייטערט געווארן, און ער איז געווארן א מולטי-ביליאנער, פון די רייכסטע חסיד'ישע אידן. אין 2020 איז ער גע'קנס'עט געווארן דורך די ניו יארק סטעיט דעפּארטמענט פון געזונט פארן נישט באריכטן 25 קאראנאווירוס טויטן אין זיין הארלעם פאציליטעט[22].
אין 2012 איז לאנדא געווען א שותף אין שאפן די פינטא קאפיטאל פארטנערס (Pinta Capital Partners), א פּריוואטע-עקוויטי פירמע[23]' וואס פארמאגט אונטער איר אייגנטום דעם 'רידזשען (ReGen) העלטקעיר'. אין מערץ 2021 האט רידזשען, פאר $50 מיליאן, אויסגעקויפט 25% עקוויטי פון 'דזשענעסיס העלטקעיר', פון די גרעסטע נוירסינג האום אפעראטארן מיט איבער 325 האומס אין 24 שטאטן, וואס איז ביז דאן געווען פובליקלי טרעידעד[24].
לאנדא האט, בשותפות מיט ליפא פריעדמאן, געגרינדעט 'אוראָראַ העלט נעטווארק', וואס האט, אינאיינעם מיט אן אנדערע אינוועסטמענט פירמע, באצאלט $3.2 ביליאן אין 2022 פאר די 'וועלנעס אינפראסטרוקטור' ביזנעס פון DigitalBridge[25].
פילאנטראפּיע
לאנדא האט זיך בארימט געמאכט מיט זיינע פילע לייסטונגען פאר צדקה, און זיין אייגנארטיגער צוגאנג דערצו. ער האט געגרינדעט און ער האלט אויס דעם ארגאניזאציע "קרן תוספות יום טוב" וואס געבט זיך אפ מעורר זיין איבער נישט רעדן ביים דאווענען, אויפן נאמען פון רבי יום-טוב ליפמאן העלער. עס ערשיינט יעדן וואך א גליון "נקדישך" מיט ארטיקלען איבער די נושא. באזונדער שרייבט די קרן א ספר תורה לזכות פון די אידן וואס זענען נזהר אין קדושת התפילה, און די ראשי הקרן הרב ראבינאוויטש און אנדערע גייען ארום כסדר צו רבנים און אדמורי"ם איבער די וועלט אריינצושרייבן אותיות אין די ספר תורה. די שמועסן מיט די רבנים און בילדער פון די באזוכן ווערן געדעקט וועכנטליך אינעם נקדישך גליון[26].
אין תשע"ח האט ער אפגעהאלטן א נסיעה קיין קראקא צום ציון פונעם תוספות יום טוב אינעם טאג פונעם יארצייט ו' אלול, וואס ער האט אויסגעצאלט פאר גבאים פון יעדן בית המדרש איבער ניו יארק וועלכע האבן אנגעפירט א קבלה דרייוו איבער מורא מקדש, און אויך א געווינער פון יעדן בית המדרש פאר די וואס האבן גענומען די קבלות. ער האט צוגעשטעלט א טשארטער פליגער, מאלצייטן, האטעלן, פראגראמען און דרשות, און א שבת אין שטאט צאנז[27]. ביים ציון האט מען אראפגעלייט 8,000 קוויטלעך און קבלות ״שלא לדבר בשעת התפלה״[28].
אויף ראש השנה תשפ"ד האט אנגעהויבן ערשיינען דורך דער קרן אן אויסגאבע פאר קינדער מיטן נאמען "שטענדערל" צו מעורר זיין אויף עניני תפילה[29], צוערשט פארשפרייט אין די בתי מדרשים בחינם, און שפעטער איז דאס פארגרעסערט געווארן און בלויז פאר די קינדער וואס זענען איינגעשריבן אלס "עובדים" אין זיין "עבודה שבלב" פראגראם[30]. פון ואתחנן תשפ"ד איז דאס מער ארויפגעארבעט געווארן מיט'ן צוזאמשטעלן מיט דעם 'קינדער שטוב' אויסגאבע פון 'א בליק', וואס איז דאן אויפגעלעזט געווארן[31]. יואל שרייבט דארט א קאלום, א "פערזענליכע ווארט פונעם פטרון צו די טייערע עובדים"[32] מיט חיזוק, משלים און מעשיות, דערביי לייגט ער מיט א נומער וואו מען קען אים איבערגעבן קאמענטארן איבער זיינע ארטיקלען. אין איין ארטיקל האט ער געשריבן זיינע איבערלעבענישן אלס בחור און זיין מאטיוואציע אויפצושטיין פארטאגס[33]. אין תשפ"ה האט שטענדערל פּראקלאמירט אַן איניציאטיוו "בני מלכים", צו מחזק זיין כיבוד אב ואם ביי די קינדער, אפּהאלטנדיג פארזאמלונגען און פּראגראמען פאר דעם צוועק.
פאר יום טוב סוכות תשפ"ד האט לאנדא דורכגעפירט א חלוקה פון קרוב צו צען מיליאן דאלאר פאר ארום פינף טויזנט וויליאמסבורגער משפחות[34], און דעם נאכפאלגנדן פסח נאך א גרעסערע חלוקה. פון דעם איז געגרינדעט געווארן דעם "וויליאמסבורג חלוקה", וואס טיילט אויס דיסקאונטס פון גרויסע פראצענטן פאר קינדער-געבענטשטע משפחות אין וויליאמסבורג, און ווערט געפירט דורך א ועד בעלי בתים פון שטאט. א בעפארצונג געט ער פאר משפחות אין די טרופ-געגנט, וואו ער וואוינט.
ער האט געספאנסערט א שמחה זאל פאר קלענערע שמחות, "עדן לאנדא", אינעם בנין בית רחל ד'סאטמאר אויף העריסאן עוועניו[35]. ער האט מנדב געווען "בנין לאנדא" פאר די הכנסת אורחים אין שטאט סיגוט אנגעפירט דורכ'ן סאטמארער רבי'ן, רבי אהרן טייטלבוים[36]. ער פארמאגט א ביהמ"ד 'אור חיים ריבניץ', מיט א ישיבה און א כולל, אנגעפירט דורך זיין ברודער ר' שלום. ער האט אויך אויפגעשטעלט א מכון להוצאת ספרים 'זכרון אברהם', וואס האט שוין ארויסגעגעבן די ספרים בעל שם טוב, בני יששכר און ויואל משה מיט ביאורים, און א הגדה של פסח מיט א ביאור אויף אידיש 'מסילה ישרה', און נאך. אויף פסח תשפ"ה האט ער געעפנט א א לוקסוריעזע ביהמ"ד אין וויליאמסבורג "מרכז התורה אור חיים" אויפ'ן נאמען פונעם ריבניצער רבי'ן[37], באדעקט מיט האנט-באצירטע שטיינער אויסגעהאקט פון ירושלימ'ער אומגעגנט[38]. כדי צו קענען האבן א כשר'ע מקוה אין צייט, האט ער געלאזט אריינברענגען שניי פון ווערמאנט[39].
אין כ"א כסלו תשפ"ה האט יואל, אין א רעדע פאר טויזענטער סאטמארע חסידים אין בארקלעיס סענטער סטאדיום, אנאנסירט א 30% העכערונג פאר אלע מלמדים פון סאטמארע מוסדות, וואס ער נעמט אויף זיך צו שאפן צוזאמען מיט זיינע שותפים אין די ועד ההורים פון די מוסדות[40][41]. ער שטיצט אויך אנדערע ישיבות, ווי ישיבת אורייתא אין ירושלים[42]. עטליכע וואכן שפעטער האט ער אפגעראכטן ביי זיך אין שטוב א שבע ברכות פאר אן אייניקל פון סאטמארער רבי, א טאכטער פון רבי יעקב בער טייטלבוים רב פון סיגוט אין בארא פארק, דארט האט ער פארשפראכן פאר סאטמאר צוויי פרישע חתונה-זאלן אין וויליאמסבורג, א בנין פארן תלמוד תורה אין קרית יואל, און א שטאק אינעם תלמוד תורה אין ירושלים[43].
דרויסנדיגע לינקס
- אפיציעלע וועבזייטל פון Allure Care
- אפיציעלע וועבזייטל פון וויליאמסבורג חלוקה
- אפיציעלע וועבזייטל פון קרן תוספות יום טוב
מסע התרוממות ע”י קרן תוספות יום טוב אויף יוטיוב- פארשטעלונג פון וועלוועל קרישענבוים ביי די חתונה פון בת ר' יואל לאנדא הי"ו אויף יוטיוב
- סדר טיש ביי הנגיד יואל לאנדא אויף יוטיוב
- ווידעא גאלערי - ר יואל לאנדא הי"ו, אויף א בליק לייוו, קאטעגאריע
- "וויליאמסבורג חלוקה שעל ידי אור חיים ריבניץ", אשכול אויף אייוועלט
- "וויליאמסבורג פסח חלוקה פ"ד עצות וקאמענטארן", אשכול אויף אייוועלט
- ריבניצער חלוקות - לשובע ולא לרזון, אויף אידטיש, טעמע
- יואל לאנדא, אויף קראנטשבעיס
רעפערענצן
- ↑ Joel Landau, אויף Geni.com
- ↑ קרית זית רענן, נייע שטעטל אין Mount Olive NJ, אויף אידטיש
- ↑ יואל לאנדא, "יוצאים מן הלב", שטענדערל ויצא תשפ"ה, זייט 10
- ↑ קליפ הכנסת ספר תורה לנדא, הפקה טיפ הפקות אירועים אויף יוטיוב
- ↑ מעמד סיום כתיבת ספר תורה, אויף א בליק לייוו; מעמד הכנסת ספר תורה, אויף א בליק לייוו; ווידעאו, אויף גוגל דרייוו
- ↑ דאס הזמנה בריוול, אויף אייוועלט
- ↑ חתונת בת הנגיד יואלי לנדאו בויאלמסבורג מקהלת 'מלכות', עם גדולי זמר החסידי ותזמורתו של הערשי לנגזאם אויף יוטיוב, נומער 2 אויף יוטיוב, אודיאו פון די חתונה צו דאונלאודן
- ↑ שבע ברכות הנגיד יולי לנדאו - וויליאמסבורג בניצחו של מאסטרו בנ לאופר עם גדול זמר החסידי אויף יוטיוב
- ↑ קרישקעס, אויף בחצרות הקודש, י"ז כסלו תשפ"ד
- ↑ Mario Schulzke, Joel Landau - Co-founder of The Allure Group, אויף IdeaMensch, אוגוסט 15, 2017
- ↑ McGoldrick, Meaghan (December 30, 2016). "Possible partnership between Northwell and Maimonides in the works for Bay Ridge". Brooklyn Reporter.
- ↑ היסטאריע, AllureCare.com
- ↑ Kyna Doles, Here's what the $10M-$20M NYC investment sales market looked like last week, The Real Deal (
אומזיסט)
- ↑ Craig Hubert, Former Nursing Home in Bed Stuy Is Being Razed for Controversial New Development, אויף Brownstoner, יוני 12, 2019
- ↑ 15.0 15.1 "Appendices for Examination of the City's Removal of the Deed Restriction at 45 Rivington Street in Manhattan", New York City Department of Investigation (July 2016).
- ↑ David Goodman, How New York Allowed Gentrification for $16 Million, New York Times, March 30, 2016 ( ארכיוו)
- ↑ J. David Goodman, New York Officials Were Warned About Lifting Nursing Home’s Deed Limits, Report Says, New York Times, יולי 14, 2016 ( ארכיוו);
Laura Nahmias, De Blasio faults policy, not staff, for Rivington deal, אויף Politico, יולי 14, 2016 - ↑ Klein, Melissa; Short, Aaron; Vincent, Isabel (April 10, 2016). "Paterson was paid consultant to firm that flipped nursing home". The New York Post.
- ↑ Report of the New York City Comptroller on the Sale of Two Deed Restrictions Governing Property Located At 45 Rivington Street, August 1, 2016
- ↑ Zoe Rosenberg, Rivington House investigation culminates with Attorney General, Allure Group settlement, אויף Curbed NY, יאנואר 8, 2018;
Jonathan LaMantia, Nursing home chain looks to future after scandal, אויף Crain's New York Business, January 16, 2018 - ↑ Will Parker, Tish James refunds $10K contribution from Rivington House’s Joel Landau, The Real Deal, Sep 6, 2018 ( אומזיסט)
- ↑ Kerry Burke, Stephen Rex Brown, Harlem nursing home faces state fines for hiding coronavirus casualties, אויף New York Daily News, מאי 31, 2020
- ↑ PintaCapitalPartners.com team
- ↑ Alex Spanko, Nursing Home Giant Genesis to Restructure, Voluntarily Delist from NYSE as ReGen Steps in with $50M Stake, אויף Skilled Nursing News, מערץ 3, 2021
- ↑ Alex Zorn, $3.2B DigitalBridge Portfolio Sale Closes, Santerre Health Formed to Manage Platform, אויף Skilled Nursing News, פעברואר 28, 2022
- ↑ גליון נקדישך אויפ'ן וועבזייטל פון קרן תוספות יום טוב
- ↑ זעט "קרן תוספות יו"ט נסיעה קיין קראקא - ו' אלול תשפ"ג", אשכול אויף אייוועלט
- ↑ בילדער נסיעה שנת תשע”ח אויפ'ן וועבזייטל פון קרן תוספות יום טוב
- ↑ אלע גליונות אויף גוגל-דרייוו
- ↑ shtenderl.org
- ↑ תגובה פון 'קינדער שטוב' אויף אייוועלט
- ↑ "יוצאים מן הלב - מפניני הרבני הנגיד ר׳ יואל לאנדא", אשכול אויף אייוועלט
- ↑ שטענדערל ויצא-וישלח תשפ"ה
- ↑ ווידעאו פון דער חלוקה אויף אייוועלט; אין הונטערגרונד הערט מען דעם פאראדיע "יואלי לאנדא'ס קרעדיט קארד", פארפאסט איין יאר פורים ביי יואלי'ן אינדערהיים דורך ליפא שמעלצער.
- ↑ חנוכת הבית פאר נייעם 'עידן לאנדא' שמחה זאל בשילוב מיט רייכע שבע ברכות לכבוד הנדיב ר' יואל לאנדא, אויף בחצרות הקודש
- ↑ במוצאי מנוחה · האד׳ מסאטמאר באזוכט בבית הנגיד ר׳ יואל לאנדא אין וויליאמסבורג, אויף בחצרות הקודש
- ↑ Construction Nears Completion on 89 Throop Avenue in South Williamsburg, Brooklyn אויף New York YIMBY וועבזייטל
- ↑ Imperial marble & Granite craftsmanship אויף יוטיוב (אידיש ווידעאס), הונטער די קוליסן פון אהערשטעלן די הערליכע ביהמ"ד אור חיים ד'ריבניץ אין וויליאמסבורג.
- ↑ INCREDIBLE! Philanthropist R’ Yoeli Landau Trucks Snow In From Vermont To Ensure New Mikvah Is Ready For Pesach – The Yeshiva World
- ↑ דרשה כ"א כסליו תשפ"ה, דורך יואל לאנדא אויף יוטיוב
- ↑ יואל לאנדא, "20,000 אידן ווארטן. זאל איך אנהייבן אדער אנטלויפן?!", שטענדערל 56, מקץ-חנוכה תשפ"ה, עמ' 6
- ↑ נתי קאליש, צפו: הינוקא ביקר בסוכת הנגיד מארה"ב וניגן בפסנתר, י"ט בתשרי תשפ"ד
- ↑ עלף מיליאן דאללער פאר דריי פרישע סאטמארע פראיעקטן, אויף JDN, י"ח טבת תשפ"ה
