רוי:כפר אלדד
כּפר־אלדד איז א קהילה-יישוב, וועלכער געהערט צום רעגיִאָנאלן ראט גוש עציון. ער געפינט זיך צום דרום-מזרח פון הרודיון. פון אים עפנט זיך א פּאנאָראם פון מדבר יהודה. די הייך פון כּפר־אלדד איבערן ים-ניוואָ איז אן ערך 530 מעטער. דער יישוב איז געגרינדעט געוואָרן אין 1994 אויפן אָרט פון צייטווייליגן איבערגאנג-לאגער פון גרינדער פונעם דערבייאיגן יישוב נוקדים, און אָנגערופן געוואָרן נאָכן פּראָפעסאָר ישראל אלדד (שייב), א מנהיג פון לח"י.
אין די לעצטע יאָרן, נאָך דעם, ווי ס'איז געעפנט געוואָרן א נייער שאָסיי, וואָס פאראייניגט יישובים פון מזרח גוש-עציון, וועלכע רופט מען צומאָל "גוש הרודיון" ("העראדיאן-בלאָק"), און צווישן זיי אויך כפר-אלדד מיטן ירושלימער קווארטאל הר חומה (חומת-שמואל) האָט די צייט וואָס פארנעמט די נסיעה אין דער הויפּשטאָט פון ישראל זיך פארקירצט ביז 10מינוט (בערך 12 קילאָמעטער). דאָס האָט געבראכט צו א ממשותדיקן וואוּקס אין דער צאָל איינוואוינער פון כפר אלדד. די באפעלקערונג פונעם ישוב באשטייט היינט-צו-טאָג פון אַרום 160 משפחות (אַרום 600 נפשות). איבער א העלפט פון די איינוואוינער פון כפר אלדד זענען עולים, דער עיקר פונעם געוועזענען ראטנפארבאנד (רוסלאנד, אוקראינע, ווייסרוסלאנד, גרוזיע, מאלדאווע און לעטלאנד) ווי אויך פון די פאראייניגטע שטאטן, פראנקרייך, בריטאניע, סיריע, קאלומביע, טשילע און פערו, די איבעריקע תושבים זענען געבוירן געוואָרן אין ישראל. כפר-אלדד איז, גלייך ווי אלע יישובים פון "גוש הרודיון", א געמישטער יישוב (לכלל ישראל), וואוּ עס וואוינען אינאיינעם פרומע, טראדיציִאָנעלע און וועלטלעכע אידן. אינעם יישוב איז טעטיק א שול, א קינדער-יאסלעס ("פעוטון"), א קינדערגאָרטן און א מקווה.
דאָס רוב תושבים פון כפר-אלדד ארבעטן אויסער דעם ישוב, דער עיקר אין ירושלים. א הויכער פּראָצענט פון די איינוואוינער האָבן אַ הויכבילדונג, איינגעשלאָסן עטלעכע דאָקטאָרן פון וויסנשאפטן. אייניקע תושבים ציִען חיונה פון פערד- און שאָף-ציכטונג.
אינעם ישוב וואוינט דער אבסארבציע-מיניסטער זאב עלקין.
וועבלינקען
- אַ טעלעוויזיע-פּראָגראַם וועגן כפר אלדד (אויף רוסיש)
- אינטערוויוען מיט תושבים פון כפר אלדד (אויף העברעיש) - http://www.youtube.com/watch?v=WBG-dqD_DXU
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!