רוי:רבי אברהם יעקב פרידמאן (צווייטער)
רבי אברהם יעקב פרידמאן (ח' מנחם אב ה'תרמ"ד - ה' טבת ה'תשכ"א) איז געווען דער סאדיגורער רבי און תל אביב, דער "אביר יעקב".
ביאגראפיע
רבי אברהם יעקב איז געבוירן אין סאדיגורא ח' מנחם־אב תרמ"ד, צו זיין פאטער רבי ישראל פון סאדיגורא, א זון פון רבי אברהם יעקב פון סאדיגורא, א זון פון רבי ישראל פון רוזשין, א זון פון רבי שלום שכנא פון פראהבישט, א זון פון רבי אברהם המלאך, א זון פונעם "גרויסער מגיד" פון מעזריטש, און צו זיין מוטער מרת בת שבע א טאכטער פון רבי שלום יוסף פרידמאן פון סאדיגורא.
י"ז אב תרס"ב האט רבי אברהם יעקב געהייראט מרת בלומה רייזיל (– ו' אייר תשי"ח), א טאכטער פון יצחק מאיר העשל פון קאפיטשיניץ. זיי האבן נישט זוכה געווען צו קינדער.
נאך דער פטירה פון זיין פאטער, אין יאר תרס"ז האט רבי אברהם יעקב איבערגענומען דעם פאטער'ס ארט אין סאדיגורא. אינאיינעם מיט זיין יונגערן ברודער רבי שלמה'ניו, האט ער אויפגעשטעלט א ישיבה אין סאדיגורא און זיך אליין אפגעגעבן מיט די בחורים.
ביים ערשטן וועלט קריג איז רבי אברהם יעקב אנטלאפן קיין וויען צוזאמען מיט זיין פעטער דעם 'פחד יצחק', נאך דעם קריג איז ער געבליבן וואוינען אין וויען. אין יאר תרח"ץ זענען די נאציס אריין קיין וויען, און די ערשטע זאך מיט וואס זיי האבן זיך פארנומען איז געווען אפשפעטן פון די אידן, און זיי האבן געצווינגען די רביים צו קערן די גאסן. רבי אברהם יעקב האט געמאכט א נדר, אויב וועט ער זוכה זיין ארויפצופארן קיין ארץ ישראל וועט ער קערן די גאסן אין ארץ ישראל.
זיינע אנהענגער האבן זיך שטארק געמיעט ארויסצוברענגען רבי אברהם יעקב פון וויען. נאך א שווערער אינטענסיווער ארבעט איז זיי געלונגען צו באקומען פאר אים א וויזע קיין ארץ ישראל. כ"ג אלול ה'תרח"ץ איז רבי אברהם יעקב אנגעקומען קיין ארץ ישראל און זיך באזעצט אין תל אביב.
יארן לאנג איז ער געווען א מיטגליד אין דער מועצת גדולי התורה פון אגודת ישראל, און א שטיק צייט איז ער געווען איר נשיא.
רבי אברהם יעקב איז נפטר געווארן פרייטאג צונאכטס ה' טבת תשכ"א, און ליגט אין חלקת נחלת יצחק אין תל אביב.
רעפערענצן
- אנציקלופדיה לחכמי גליציה, מאיר וונדר
- נר ישראל ח"ו בערכו (6)