רוי:רבי יצחק זעליג מארגנשטערן

רבי יצחק זעליג מארגנשטערן

טעטיגקייט אָרט	סאקאלאוו
דינאסטיע	קאצק
קאצק'ער רבי → רבי חיים ישראל מארגנשטערן

הרב יצחק זעליג מארגנשטערן (ה'תרכ"ו - ג' חשוון ה'ת"ש) איז געווען דער סאקאלאווער רבי. ער איז געווען א מיטגליד אין דער מועצת גדולי התורה פון אגודת ישראל און איינער פון די פירער פון פוילישן אידנטום פאר דער חורבן אייראפע

לעבנסגעשיכטע

יצחק זעליג איז געבוירן אין קאצק צו זיין פאטער הר"ר חיים ישראל מארגנשטערן (שפעטער געווארן פילעווער רבי) און זיין מאמען יוכבד פרענקל, פינף יאר נאך דער פטירה פונעם אלטן קאצקער רבי'ן.

אלס בחור האט ער געלערנט ביי זיין זיידן דעם צווייטן קאצקער רבי'ן. צו זעכצן יאר האט ער חתונה געהאט מיט חיה הינדא שיינפעלד, די טאכטער פון דעם רייכן גערער חסיד און למדן, מרדכי שיינפעלד פון פינטשעוו. אין ה'תרנ"ט האט די קהילה אין סאקאלאוו, לעבן שעדליץ, אים אויפגענומען אלס זייער רב. ער האט אנגהויבן זיין רבנות אין סאקאלאוו י"א טבת תר"ס, און ער איז געבליבן דארט אלס שטאטס-רב פערציג יאר. ער האט אויפגעשטעלט און געפירט די ישיבה בית ישראל דארט אויף זיין פאטער'ס נאמען. ער איז אויך געווען איינער פון די מייסדים פון דער 'מתיבתא' אין ווארשע.

ווען זיין פאטער איז נפטר געווארן אין תרס"ו זענען רוב פו זיינע חסידים אריבער צו אים, און ער איז געווארן דער סאקאלאווער רבי. א טייל פון זיינע תורות זענען געדרוקט געווארן אין דעם ספר שארית יצחק (תל אביב, תשמ"ט).

אין תר"ע איז ער געווען איינער פון די פינף רבנים וואס מ'האט זיי אויסדערוויילט צו דער רבנישער אסיפה וואס דער צאר ניקאליי דער צווייטער האט צוזאמענגערופן אין פעטערבורג.

ער איז אויך געווען איינער פון די מייסדים פון אגודת ישראל, און ער איז געווען דער וויצע-נשיא פון דער 'אגודת הרבנים' אין פוילן.

הר"ר יצחק זעליג האט געהאט ברייטע ידיעות אין מעדיצין און ער פלעג שרייבן רעצעפטן פאר קראנקע וואס האבן געבעט ביי אים א ישועה.

זיין משפחה

הר"ר יצחק זעליג האט געהאט עלף קינדער: דריי זין און אכט טעכטער:

• רבי משה דוד (ב' אדר תרנ"ב - כ"ד חשוון תרצ"ח, איידעם ביים זיכלינער רב — אב"ד סאקאלאוו
• רבי בנימין פלטיאל (תרנ"ה - תש"ה), איידעם ביי רבי יוסף פון אמשינאוו — אב"ד סטרעדין
• רבי יעקב מנחם מענדל — אב"ד מיעכאוו און ווענגראוו
• מרת רחל, ווייב פון הרב יהודה לייב אייגער פון ווארשע (זון פון רבי עזריאל מאיר אייגער פון לובלין)

רבי יעקב פערלאוו, נאוואמינסקער רבי אין אמעריקע, איז געווען אן אייניקל.

זיין פטירה

אין זיינע עלטערע יארן האט ער געליטן פון פארשיידענע מחלות, ג' מרחשון ה'ת"ש, אין אנהייב פונעם צווייטן וועלט קריג איז ער נפטר געווארן אין אטוואצק. פון דארטן האט מען אים געפירט אין דעם ווארשעווער בית עולם. ער ליגט נאנט צו זיין זון משה דוד.

זיין ווייב חיה הינדא הי"ד איז אומגעקומען אין טרעבלינקע ג' אלול תש"ב.

רעפערענצן

ברוך גוטער, לכל דרכיו משכיל אין אהבת דוד (ברוקלין, ניו יארק, תשס"ז)

דער בלאט קומט פון יידיש-וויקיפעדיע.
אריגינעלער בלאט • ערלויבעניש cc-by-sa 3.0.

דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!