באַניצער:כלפעדיע/קאונטי (פאראייניגטע שטאַטן)
א קאונטי אין 48 פון די פאראייניגטע שטאַטן, א פּעריש אין לואיזיאנא, און א בארא אין אלאסקא איז א געאגראפישע ראיאן מיט באשטימטע גרעניצן אינערהאלב א שטאַט, וואס דינט אלס אדמיניסטראטיווע סוב-דעוויזיע פון די שטאַט און פארמאגט געווענליך א געוויסע שטאפל פון רעגירונגס אויטאריטעט.
געווענליך איז די שטאפל פון רעגירונגס אויטאריטעט פון קאונטיס געוואנדן אין די שטאַט אין וועלכן זי געפונט זיך, אבער אמאל קענען זיין אויסנאמען אין שטאַטן זעלבסט — א שטייגער ווי אין ניו יארק וואו 57 פון אירע 62 קאונטיס פארמאגן אוועקגעשטעלטע רעגירונגען, אבער די פינף קאונטיס וואס מאכן אויס ניו יארק סיטי האבן נישט קיין אייגענע רעגירונגס קערפערשאפן נאר זענען באראס פון די שטאט, און אזוי אויך האבן אכט פון די פערצן קאונטיס אין מאסאטשוסעטס אויפגעלעזט זייערע רעגירונגען צווישן די יארן 1997 און 2000 ווען די איבריגע זעקס האבן נאך אוועקגעשטעלטע רעגירונגען ביז היינט.
אין 44 פון די 50 שטאַטן מאכן קאונטיס אויס די גאנצע שטח פונעם שטאַט ― און די זעלבע איז מיט פּערישעס אין לואיזיאנא, אבער אין ווירדזשיניע זענען דא 38 שטעט וואס זענען זעלבסטשטענדיג אין נישט טייל פון איינע פון די 95 קאונטיס אין די שטאַט, און אזוי אויך זענען די שטעט באלטימאר אין מערילענד, סט. לואיס אין מיזורי, און קארסאן אין נעוואדא זעלבסטשטענדיג און נישט טייל פון א קאונטי, און אין אלאסקא איז אויסער די 19 ארגאניזירטע באראס מיט רעגירונגען — וואס דינען אויפ'ן פלאץ פון קאונטיס — דא איין אומארגאניזירטע בארא וואס איז איינגעטיילט אין עלף צענזוס געגנטער וואס די פאראייניגטע שטאַטן צענזוס ביורא רעכנט אזויווי קאונטיס פאר סטאטיסטישע צוועקן.
אין די שטאַטן פון קאנעקטיקוט און ראוד איילענד זענען בכלל נישטא קיין קאונטי רעגירונגען, און די ארטיגע קאונטיס דינען נאר אלס געאגראפישע אונטערשיידן — און די צענזוס ביורא נוצט זיי פאר סטאטיסטישע צוועקן. אין קאנעקטיקוט זענען פארהאן ארגאניזאציעס וואס זיי רופן "קאונסילס אוו גאווערנמענט" פאר יעדע עטליכע שטעט איין אזא קאונסיל צו א סך הכל פון ניין אזעלכע קאונסילס וואס פארמירן די שטאַט, אין 2019 האבן זיי פארלאנגט פון די צענזוס ביורא צו נוצן די קאונסילס פאר סטאטיסטישע צוועקן אנשטאט די קאונטיס, און אין 2024 גייט עס אריינגיין אין קראפט.