רוי:רבי מאיר הלוי אבולעפיא

רבי מאיר הלוי אבולעפיא, באקאנט אלס דער רמ"ה (ד'תתק"ל, 1170 – י"ח ניסן ה'ד') איז געווען א רב, פוסק, מקובל, פארשער פון מסורה, דיכטער, און איינער פון די גדולי הראשונים וואָס זיינע חידושים אויף תלמוד בבלי זענען אָנגענומען געוואָרן אין דער לומדישער וועלט.

ביאגראפיע

רבי מאיר אבולעפיא, באקאנט מיט זיין ראשי-תיבות-נאָמען רמ"ה פאר "רבינו מאיר הלוי", איז געבוירן געוואָרן אין שפאניע אין דער שטאָט בורגאָס לערך 1170 (ד' אלפים תתק"ל), און איז נפטר געווארן אין טאלעדא אין יאָר 1244 (ה' אלפים ד'). ער האָט אָנגעפירט אין טאָלעדאָ מיט א גרויסער ישיבה.

מען האָט אים אזוי געשעצט, אַז די שטאָט-מענטשן האָבן אים געגעבן דעם טיטל "נשיא". זיין רום איז געגאנגען זייער ווייט, אזוי אז מען האָט אים געהאלטן גרויס נישט נאָר אין שפאניע, נאָר אויך צווישן די דעמאלטדיגע קהילות אין דייטשלאנד. דער גרויסער מפרש און פּוסק רבי משה בן נחמן, דער רמב"ן, האָט אים גערופן "נשיא מנשיאי הלוויים".

מחשבה

רבי מאיר אבולעפיא איז געווען נישט נאָר א גרויסער גאון אין לומדות, נאָר אויך זייער א גרויסער מקובל, און ער איז געווען איינער פון די ערשטע אידישע רבנים וואָס האָבן געוואגט אָנצוהייבן א קאמף קעגן דער רמב"ם און זיינע פילאָזאָפישע ספרים - בעיקר קעגן די מיינונגען פון רמב"ם וועגן "עולם הבא" און "תחיית המתים".

ווערק

די בארימסטע ספרים וואָס רבי מאיר האָט מחבר געווען זענען: "פּרטי פּרטין" חידושים אויף דער גאנצער גמרא, פון וועלכע עס זענען געדרוקט געווארן אויף די מסכתות בבא בתרא און סנהדרין מיטן נאמען "יד רמה", ווי אויך זענען צו אונז דערגאנגען אויסצוגן וואָס ווערן געברענגט אין "שיטה מקובצת".

עס זענען אויך געדרוקט פון אים "תשובות". טייל ווילן זאגן, אז אויך געוויסע קבלה-ספרים ("גינת ביתן", "לפני ולפנים", "שושן סודות") זענען געשריבן געוואָרן דורך דעם רמ"ה.

דער ארטיקל נעמט אריין טעקסט פון דער ייִדישער פאָלקס־ענציקלאָפּעדיע (פּיעטרושקא), וואָס איז היינט אינעם רשות־הרבים. רעכטן פאר טוישונגען בלייבן רעזערווירט.

דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!