רוי:יורי לעוויטאן
יורי (יודקאַ בערקאָוויטש) לעוויטאַן (רוסיש: Юрий Борисович Левитан; 2טן אָקטאָבער 1914, וולאַדימיר - 4טן אױגוסט 1983, בעסאָנאָווקאַ, בעלגאָראָדער געגנט, רוסלאַנד) איז געווען א סאוועטישער ראדיא דיקטאר.
לעוויטאן איז געבוירן דעם 2טן אקטאבער 1914 אין וולאדימיר, רוסלאנד, אין אַ ייִדישער משפּחה.
יורי לעוויטאַן איז געווען אַ באַרימטער דיקטאָר פון דער צענטראַלער סאָוועטישער ראַדיאָ אין די 1930-1980ער יאָרן. אַ דאַנק דער אױסדריקלעכקייט און זעלטענעם טעמבער פון זיין קול, האָט מען אים באַאױפטראָגט פאָרלייענען די וויכטיקסטע דערקלערונגען און מעלדונגען. ער איז געווען דער ערשטער, וואָס האָט עפנטלעך מודיע געווען וועגן אַזעלכע היסטאָרישע געשעענישן ווי דאָס אָנפאַלן פון היטלער-דייטשלאַנד אױף ראַטן-פאַרבאַנד דעם 22סטן יוני 1941, דאָס אייננעמען פון בערלין דורך דער סאָוועטישער אַרמיי און די אומבאַדינגטע קאַפּיטולאַציע פון דייטשלאַנד דעם 8טן מיי 1945, די פּטירה פונעם סאָוועטישן אָנפירער יאָסיף סטאַלין דעם 5טן מערץ 1953, דער פלוג אין קאָסמאָס פון יורי גאַגאַרין דעם 12טן אַפּריל 1961, און אַזױ ווייטער. זיינע ראַדיאָ-אױפטריטן פלעגן זיך כסדר אָנהייבן מיט די ווערטער "...Внимание! Говорит Москва" (וונימאַ'ניִיע! גאַוואַרי'ט מאַסקוואַ'- אַכטונג! עס רעדט מאָסקווע...).
דער נאָמען פון יורי לעוויטאַן איז געוואָרן באַזונדערס פּאָפּולער אין די יאָרן פון דער גרױסער פאָטערלענדישער מלחמה (ווי רופט מען אָן אין רוסלאַנד און אייניקע אַנדערע לענדער פונעם געוועזענעם ראַטן-פאַרבאַנד דעם סאָוועטיש-דייטשן קריג פון 1941-1945 אַלס דער עיקרדיקער טייל פון דער צווייטער וועלט מלחמה). מיט פאַרבאַהאַלטענעם אָטעם, מיט אומרו און האָפענונג צוגלייך, האָבן דאַן מיליאָנען מענטשן אין אַלע עקן פון דעם גרױסן לאַנד געהערט די ידיעות וועגן דעם מצב אױף די מלחמה-פראָנטן, פאָרגעלייענט פון אָט דעם מענטשן.
אין דער נאָכמלחמהדיקער צייט, האָט יורי לעוויטאַן פאָרגעלייענט פאַרן ברייטן עולם ראַדיאָ-צוהערער וויכטיקע פּאָליטישע דאָקומענטן, געפירט רעפּאָרטאַזשן פון מלוכישע און געזעלשאַפטלעכע אונטערנעמונגען, אָנטיילגענומען אין טאָניפיצירן קינסטלערישע פילמען, דערקלערט "די מינוט פון שווייגן" אין די יערלעכע ראַדיאָ - און טעלעוויזיע פּראָגראַמען לכבוד דעם אָנדענק פון די געפאַלענע סאָוועטישע קריגסלייט און די קרבנות פון דער ציווילער באַפעלקערונג בשעת דער מלחמה קעגן די נאַצישע שונאים ימ"ש.
יורי לעוויטאַן איז נפטר געוואָרן בעת אַ באַגעגעניש מיט מלחמה-וועטעראַנען אין 1983. צו קבורה האָט מען אים געבראַכט אױפן "נאָוואָדעוויטשיע"-צווינטער אין מאָסקווע.
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!