רוי:רבי אהרן האגער
רבי אהרן האגער, איז דער היינטיגער וויזשניצער רבי פון מאנטריאל, קאנאדא, און איינער פון די אכט עמטליכע ממשיכים פון זיין פאטער הרה"ק רבי מרדכי האגער, דער גרינדער פונעם מאנסי-וויזשניצער הויף אין פאראייניגטע שטאטן.
לעבענסגעשיכטע, אקטיוויטעט און אייגנשאפטן
רבי אהרן האגער איז געבוירן געווארן אין אמעריקע, דאס צענטע קינד פון א משפחה פון 14 קינדער צו זיינע עלטערן רבי מרדכי האגער, דער געוועזענער וויזשניצער רבי פון מאנסי, און צו זיין מוטער מרת סימא מירל, טאכטער פונעם פריערדיגן סקווערער רבי'ן, רבי יעקב יוסף טווערסקי.
אנדערעש ווי זיינע עלטערע ברידער און שוועסטער, איז רבי אהרן אויפגעוואקסן אין הויף פון זיין טאטן, שוין נאכדעם וואס זיין טאטע האט איבערגענומען די רעביסטווע; אין אנדערע ווערטער מיינט דאס אז דער רבי האט פיל קונה געווען אין די דאזיגע יארן, און וויבאלד ער איז אויפגעצויגן געווארן שוין אין "א הויז פון א רבי'ן", האט ער געהאט די זכיה מיטצוהאלטן פון נאנעט די עבודת הקודש פון זיין פאטער, און אויסשעפן פון אים תורה און יראת שמים.
ווען ס'איז אנגעקומען די צייט, האט רבי אהרן געהייראט זיין רעביצין מרת שרה, טאכטער פון רבי נפתלי אריה לייבוש טויב, זון פון מנחם שלמה פון קאלעוו-בארא פארק, און איידעם פון רבי שלום קרויז, בעל מחבר ספר "דברי שלום" און אב"ד אודווארי-ברוקלין.
יארן צוריק, ווען דער פריערדיגער רבי האט געדינט גלייכצייטיג אלס רב אין עטליכע קהילות ווי א שטייגער, אזוי ווי בארא-פארק, קראון הייטס און וויליאמסבורג, האט זיך די וויזשניצער קהילה געוואנדען צום רבי'ן מיט א בריוו, בעטנדיג דערין אז ער זאל אויך אננעמען די אויפגאבע פון דער רבנות אין מאנטריאל. א קורצע צייט דערויף איז געשריבן געווארן א "כתב רבנות" איז אונטערגעשריבן דורך אלע מתפללים פון וויזשניצער בית מדרש אין דער שטאט, וואו די מיטגלידער פון די קהילה האבן זיך אונטערגעווארפן מיט הכנעה אונטער די הדרכה פונעם רבי'ן און מקבל געווען מרות פון אים. זייט יענע הכתרה האט די וויזשניצער קהילה אין מאנטריאל, האט באקומען היפש א נייע צורה. דער רבי איז געווען אריינגעלייגט אין אלע ענינים פון דער קהילה אפילו פונדערווייטנס, און צוויי מאל א יאר - א שבת, נאך פסח, און א שבת נאך סוכות, פלעגט ער אהינפארן און וויילן מיט זיינע חסידים, און אויך נאכצופאלגן פון נאענט די אנטוויקלונג פון דער בליענדער קהילה. אויף ימים נוראים, פלעגט דער רבי אהינשיקן בעלי תפילות. יארן שפעטער ווען דער רבי האט שוין איבערגענומען די רעביסטווע און האט זיך באזירט אין מאנסי, האט ער באשלאסן צו שיקן קיין מאנטריאל זיין זון רבי אהרן, ער זאל ערפילן זיין ארט און דינען אלס רב דארט. אלול ה'תשנ"ז, איז פארגעקומען א פראכטפולע מעמד הכתרה מיט דער באטייליגונג פון די גרעסטע רבנים אין מאנטריאל, וועלכע האבן אויפגעטראטן מיט דרשות לכבוד דעם מעמד, און צווישן זיי קען מען אויסרעכענען רבי יעקב יצחק ניימאן, דער געוועזענער לאנגיעריגער דיין פון קהל "מחזיקי הדת" ד'חסידי בעלזא אין מאנטריאל. א שבת נאך דער הכתרה איז אנגעקומען אהין א שיינער עולם פון ניו יארק און אנדערע פלעצער כדי מיטצוהאלטן דעם ערשטן שבת מיט רבי אהרן.
דער רבי איז באקאנט אלס א געוואלדיגער אוהב שלום, און האט שוין געשליכטעט פיל שטרייטן און מחלוקות צווישן גרויסע קהילות און צווישן יחידים. כסדר קומען פארשידענע מענטשן און רבנים און קלאפן אן אין טיר פונעם רבי'ן, בעטנדיג אז ער זאל זיי העלפן אויסגלייכן פארשידענע פארוויקלטע סכסוכים און ענינים. דער רבי איז באוואוסט ביי אלעמען אלס א איד וואס האט אימער אן אפענער אויער פאר יעדן איד, און וועלכער איז צוגעלאזן צו יעדן איינעם. א איז גאר א באשיידענער איד וואס טראץ דעם טאטזאך אז ער איז א געוואלדיגער מתמיד און פארמאגט אן אויסטערלישע בקיאות אין ספרי מוסר וחסידות, פירט ער זיך אויף מיט א פשטות, און שטענדיג שמייכלט צו יעדן, און לאזט זיך אראפ צו יעדן, נישט שפירנדיג אז ער איז בעסער אדער העכער פון יענעם. אלס רב האט זיך דער רבי פיל באשעפטיגט מיט שדכנות, און א דאנק אים פילצאליגע אידישע שטיבער האבן זיך אויפגעשטעלט, און אויכעט היינט צו טאגס איז דער רבי ממשיך זיך צו באשעפטיגן מיט שדכנות. די קהילה אונטער זיין הנהגה ציילט אפ ארום פינף הונדערט משפחות, ווי אויך מוסדות ווי א בית מדרש, כולל אברכים און א תלמוד תורה.
קינדער
- הרב נפתלי אריה משה, האט געהייראט זיין שוועסטער-קינד מרת שיינא רחל, טאכטער פון זיין פעטער רבי דוד האגער, דער וויזשניצער רבי פון לאנדאן.
- הרב חיים מאיר, האט געהייראט זיין שוועסטער-קינד מרת ריבא מלכה, טאכטער פון זיין פעטער רבי יצחק יוחנן האגער, דער וויזשניצער רבי פון וויליאמסבורג.
- הרב מנחם שלמה, האט געהייראט זיין שוועסטער-קינד מרת לאה, טאכטער פון זיין פעטער רבי אברהם דוב טווערסקי, רב פון רחמיסטריווקער חסידים אין מאנסי, און איידעם פון הרה"ק רבי מרדכי האגער, דער פריערדיגער וויזשניצער רבי פון מאנסי.
- מרת מרגליא, ווייב פון הרב נפתלי אריה, זון פון רבי ישראל אברהם אלטר טויב, זון פון רבי נפתלי אריה פון קאלעוו בארא פארק, און איידעם פון רבי יוסף חיים מאסקאוויטש, דער שאצער רבי פון וויליאמסבורג.
- הרב יעקב יוסף, האט געהייראט מרת אדל, טאכטער פון רבי מרדכי טווערסקי, זון פון ישעיה, טשערנאבילער רבי פון בארא פארק.
- הרב שמואל דוד ברוך, האט געהייראט מרת רייזל, טאכטער פון רבי פנחס אליהו שפיגל, דער קאלושינער רבי.
- מרת הענטשא מרים, ווייב פון הרב חיים מאיר, זון פון רבי יצחק אייזיק שנעעבאלג, מאכניווקער רב און דיין אין וויליאמסבורג, זון פון רבי מנחם מענדיל, גאב"ד "מחזיקי הדת" מאנטשעסטער, ענגלאנד.
- מרת טראנא, ווייב פון גבריאל יודא, זון פון רבי צבי נח פארטוגאל, זון פון סקולענער רבי, רבי ישראל אברהם פארטוגאל.
- הרב ישכר דוב, איידעם פון רבי איתמר ראטנבערג, אייניקל פון נאדווארנער רבי פון חדרה.
- הרב ישראל, האט געהייראט מרת חנה גיטל, טאכטער פון רבי שאול שמחה פרידמאן, אב"ד "שמן למנחה" לעיקוואד, זון פון אב"ד טענקא, און איידעם פון רבי משה טויב, קאלעווער רבי פון אמעריקע.
- מרת רחל, ווייב פון הרב פנחס שלום, זון פון הרב אברהם פאנעט, און אייניקל פון רבי ישכר דוב פאנעט, דעעשער רבי פון קרית יואל.
- מרת הינדא, ווייב פון הרב יעקב יוסף, זון פון איר שוועסטער-קינד הרב משה, זון פון רבי ישראל האגער, דער וויזשניצער רבי פון מאנסי.
- מרת בריינדל, חתונה געהאט מיט הרב ישראל, זון פון איר שוועסטער-קינד הרב דוד טווערסקי, זון פון רבי אברהם דוב -רחמסטריווקער רב אין מאנסי, און איידעם פון רבי יצחק יוחנן האגער, דער וויזשניצער רבי פון וויליאמסבורג.
- מרת רייזל, געווארן א כלה אייר, ה'תשפ"ב מיט הרב נפתלי אריה לייביש צבי, זון פון איר שוועסטער-קינד, הרב יעקב יוסף האגער, זון פון רבי דוד האגער, וויזשניצער רבי פון לאנדאן, און איידעם פון זיין פעטער רבי ישראל אברהם אלטער טויב, קאלעווער רב פון בארא פארק, און איידעם פון רבי יוסף חיים מאסקאוויטש, שאצער רבי פון וויליאמסבורג
- סימא מירל
- ציפורה
- אסתר
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!