רוי:רבי משה יוסף טייטלבוים

רבי משה יוסף טייטלבוים זצ"ל (ה'תר"ה - כ"ד טבת ה'תרנ"ז) איז געווען רב אין איהעל.

אפשטאם

רבי משה יוסף איז געבוירן אין יאר ה'תר"ה צו זיין פאטער הרב יקותיאל יהודה טייטלבוים, דער ייטב לב, אן אייניקל פון הרב משה טייטלבוים דער ישמח משה. און צו זיין מוטער מרת רחל א טאכטער פון הרב משה דוד אשכנזי רב אין טאלטשאווא.

רבנות

רבי משה יוסף האט געגעסען קעסט ביי זיין עלטער-שווער דער צאנזער רב, ער איז געווען פון די שארפע קעפ פון דער חבורה און ער האט געדינט ווי א ראש ישיבה צוזאמען מיט דעם ערשטען באבאווער רב פאר די יונגעלייט וואס האבן געלערנט ביים זיידן אין בית המדרש.

רבי משה יוסף איז געווען רב אין זבאראוו, סטראפקאוו און איהעל.

הסתלקות

רבי משה יוסף איז געפארן צו א סיום הש"ס קיין מאקאווא, אויף דעם וועג צוריק האט ער גענעכטיגט אין בעקעש-טשאבא, האט ער זיך אויסגעדריקט ער ווייס נישט פארוואס ער איז דא אהער געקומען, פיר אזייגער פארטאג האט ער זיך אויפגעהויבן צו גיין צו די באן, און ער איז פלוצלינג נפטר געווארן כ"ד טבת תרנ"ז. מען האט אים געפירט קיין אוהעל, און נאכהער קיין סיגוט, אין ער ליגט דארט אין פאטער'ס אהל.

פאמיליע

רבי משה יוסף האט געהייראט מרת הינדא די טאכטער פון הרב דוד האלבערשטאם, דער קשאנאווער רב. זייערע קינדער:

• הרב ירחמיאל טייטלבוים, ער האט געהייראט מרת אסתר די טאכטער פון הרב יעקב צבי פון פאריסאוו, ער איז אוועק יונג נישט איבערלאזנדיג קיין קינדער.

• הרב ברכיה טייטלבוים (ה'תרכ"ה (אומגעפער) - י"ב ניסן ה'תרע"ז), ממלא מקום פון פאטער, רב אין איהעל.

• הרב אלעזר ניסן טייטלבוים, ער איז אוועק אלס יונגערמאן.

• הרב חיים יעקב טייטלבוים (ה'תרל"ד (אומגעפער) - כ"א חשוון ה'תרצ"ד), רב אין לימאנאוו

• די ווייב פון הרב נפתלי טייטלבוים רב אין נירבארטור

• מרת רויזא בלימא, די ווייב פון הרב דוד דוב מייזילש הי"ד (ה'תרל"ה - ט"ו סיון ה'תש"ד), רב אין איהעל

• מרת חיה רבקה, די ווייב פון רבי אליעזר הלוי שטערנפעלד הורוויץ

• די ווייב פון הרב יהודה לייביש ערליך פון דילאטין.

• די ווייב פון הרב שלום האלבערשטאם הי"ד (ה'תרט"ו - ה'תש"ב), רב אין ניסקא

רעפערענצן

• י"ג אורות - סיפורים דערציילט דורך רבי יענקלי לייזער דער פשעווארסקער רבי - ארויס געגעבן דורך זיין אייניקל הרב יוסף נפתלי וואגשאהל, ה'תשנ"ד
• אנציקלופדיה לחכמי גליציה, מאיר וונדר

דער בלאט קומט פון יידיש-וויקיפעדיע.
אריגינעלער בלאט • ערלויבעניש cc-by-sa 3.0.

דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!