רוי:באבוב (חסידות)

מוסדות חסידי באבוב פון ירושלים עיר הקודש אין ארץ ישראל, חגי סטריט

באבאוו, וועסט גאליציע, איז א באקאנטע שטאט אין די חסידישע קרייזן, דורך דעם וואס דארטן האבן געוואוינט די רבנים און רבי'ס פון דער באבאווער דינאסטיע וואס ציעט זיך פון רבי שלמה האלבערשטאם, באקאנט אלס "דער ערשטער באבאווער רב", וואס איז א אפצווייג פון דער צאנזער דינאסטיע.

דער ערשטער באבאווער רבי שלמה האלבערשטאם, איז געווען אן אייניקל פונעם צאנזער רב. נאך זיין פטירה (א' דר"ח תמוז) האט זיין זון רבי בן ציון האלבערשטאם הי"ד איבערגענומען זיין פלאץ, ביז זיין פטירה ווען ער איז גע'הרג'עט געווארן דורך די נאציס ימ"ש (ד' אב ה'תש"א), וואס שפעטער האט זיין זון רבי שלמה האלבערשטאם זי"ע איבערגענומען זיין פלאץ, באקרוינט געווארן אין לאנדאן דורך באבאווער חסידים. דערנאך האט ער איבערגעפלאנצט דאס באבאוו'ער חסידות אויף דעם אמעריקאנער באדן, הויפּטקוואַרטירט אין בארא פארק,ברוקלין, וואס שטייט ביז היינטיגן טאג. ער איז געווען רבי ביז זיין פטירה (ר"ח אב תש"ס) און זיין זון רבי נפתלי צבי האלבערשטאם האט איבערגענומען זיין פלאץ וואס ער האט געפירט פאר פיר און א האלב יאר ביז זיין פטירה (י"ב אדר ב' ה'תשס"ה). אומגעפער אין דעם זעלבן צייט איז אויפגענומען געווארן דער יונגערער ברודער רבי בן ציון אריה ליבוש האלבערשטאם אלס רב הצעיר.

רבי נפתלי צבי האלברשטאם האט נישט איבערגעלאזט קיין זין, בלויז צוויי טעכטער.

נאך רבי נפתלי'ס פטירה האט זיך די הנהגה געטיילט. דער גרעסטער טייל זענען געבליבן אין בית המדרש מיט זיין ברודער רבי בן ציון אריה ליבוש האלבערשטאם וועלכע האט ביז דאן געדינט אלס רב הצעיר. אין איבער א דריטל פון די חסידים זענען אריבער געגאנגען צו זיין איידעם רבי מרדכי דוד אונגער אלס רבי פון "באבאוו 45". אזוי אויך איז נתמנה געווארן דער עלטערער איידעם רבי יהושע רובין אלס רב פון באבאוו 45.

באבאווער חסידים זענען מייסטנס פון גאליציאנער אָפּשטאַם.

ס'זענען פאראן באבאווער שטיבלעך אין וויליאמסבורג, ברוקלין, מאנסי, [לינדען], [לעיקוואוד],מיאמי, מאנטרעאל טאראנטא, אנטווערפן און לאנדאן. אין ארץ ישראל זענען דא באבאווער שטיבלעך אין ירושלים, בני ברק, אשדוד און ביתר עילית און א באבאווער קווארטל קרית באבוב אין בת ים.

באבאווער רבנים און רבי'ס פון דער באבאווער דינאסטיע

רבי שלמה האלבערשטאם זצ"ל (ה'תר"ז - א' תמוז ה'תרס"ה), דער ערשטער באבאווער רב

• רבי בן-ציון האלבערשטאם הי"ד (י' אייר ה'תרל"ד - ד' מנחם אב ה'תש"א), דער צווייטער באבאווער רב.
  • רבי שלמה האלבערשטאם (ה'תרס"ז - ה'תש"ס), דריטער באבאווער רב, דער "דברי שלמה".
    • רבי נפתלי צבי האלבערשטאם (כ"ה סיון ה'תרצ"א - י"ב אדר ב' ה'תשס"ה), דער פערדער באבאווער רב.
      • רבי יהושע רובין, באבאוו 45ער רב, איידעם פון רבי נפתלי צבי.
      • רבי מרדכי דוד אונגער, באבאוו 45ער רבי, איידעם פון רבי נפתלי צבי.
    • רבי בן ציון אריה לייבוש האלבערשטאם, דער פינפטער באבאווער רב. זון פונעם "דברי שלמה".

דער באבאווער בוים

רבי מאיר נתן האלבערשטאם זצ"ל (ה'תקפ"ה – ט"ו מנחם אב ה'תרט"ו). דער פאטער פון דעם ערשטען באבאווער רב.

רבי שלמה האלבערשטאם, דער ערשטער באבאווער רב

ר' שלמה האלבערשטאם - ערשטער באבאווער רב

רבי שלמה האלבערשטאם זצ"ל (ה'תר"ז - א' תמוז ה'תרס"ה), דער ערשטער באבאווער רב.

דאס באבאווער חסידות האט אנגעהויבן מיט רבי שלמה האלבערשטאם אין דעם גאליציאנער דארף באבאוו, וואו זיינע חסידים זענען פריער געווען חסידים פון זיין זיידן, רבי חיים האלבערשטאם (מחבר פו דברי חיים).

די ערשטער ישיבה אין פוילן (אין מאדערנע צייטן) איז געגרינדעט דורך דעם ערשטן באבאווער רב אין תרמ"א אין ווישניצא (ער איז דעמאלטס געווען שטאטס רב דארטן); ער האט מיטגענומען די ישיבה ווען ער האט אויפגענומען דאס רבנות אין באבאוו.

ר' בן ציון האלבערשטאם "קדושת ציון" – צווייטער באבאווער רב

בן-ציון האלבערשטאם (א)

• רבי בן-ציון האלבערשטאם הי"ד (י' אייר ה'תרל"ד - ד' מנחם אב ה'תש"א), דער צווייטער באבאווער רב, זון פון רבי שלמה.
  • רבי שלמה האלבערשטאם - זעט ווייטער
  • רבי חיים יהושע האלבערשטאם.
    • רבי ברוך דוד האלבערשטאם, ער האט געהייראט מרת עכסא א טאכטער פון רבי דוד מייזליש.
    • רבי יעקב יוסף האלבערשטאם, ער האט געהייראט מרת חיי שרה א טאכטער פון רבי אהרן טייטלבוים.
  • רבי יחזקאל דוד האלבערשטאם (ה'תרע"ד - כ"ה אדר ב' ה'תשל"ח) פון פאקשיווניץ.

רבי בן ציון האלבערשטאם, מחבר פון קדושת ציון, האט ממשיך געווען זיין פאטער'ס ארבעט. די באבאווער ישיבה איז לכתחילה געווען נאר אין באבאוו. מיטן שפרייט פונעם חסידות האט געוואקסן די צאל בחורים אין דער ישיבה, און דער רבי האט אויפגעשטעלט זעכציג פיליאלן מיטן נאמען "עץ חיים" דורכאויס וועסט גאליציע.

אין דער צווייטער וועלט מלחמה איז דאס באבאווער חסידות אינגאנצן חרוב געווארן. דער רבי איז אומגעקומען אין חורבן אייראפע צוזאם מיט טויזנטער פון זיינע חסידים.

רבי שלמה האלבערשטאם - דריטער באבאווער רב

• רבי שלמה האלבערשטאם (ה'תרס"ז - ה'תש"ס), באבאווער רב אין אמעריקע.
  • רבי נפתלי צבי האלבערשטאם (כ"ה סיון ה'תרצ"א - י"ב אדר ב' ה'תשס"ה), דער באבאווער רב.
  • מרת מרים נחמה, די ווייב פון רבי חיים יעקב יוסף טויבער דיין אין קהל באבאוו אין בארא פארק.
  • מרת דבורה לאה, די ווייב פון רבי יונתן בנימין גאלדבערגער, ביקאווסקער רב, און באבאווער ראש הכולל.
  • מרת שרה הענא, די ווייב פון רבי יעקב ישראל ישורון מייזליש רב אין קרית באבוב בת-ים.
  • רבי בן ציון אריה לייבוש האלבערשטאם, באבאווער רב.
  • מרת מלכה, די ווייב פון רבי בן-ציון בלום דיין פון קהל באבאוו אין לאנדאן.
  • מרת אסתר שיינדיל, די ווייב פון רבי ברוך אברהם צבי הורוויץ פון בארא פארק, באבאווער ראש ישיבה.

קנאפע 300 חסידים האבן איבערגעלעבט. דעם צווייטן רבי'נס זון רבי שלמה האלבערשטאם האט אונטערגענומען דעם עול ווידערצובויען באבאוו. ער האט זיך ערשט באזעצט אין דער וועסט זייט פון מאנהעטן; שפעטער געצויגן קיין בעדפארד-סטייוועסאנט אין ברוקלין דערנאך קיין בארא פארק, מ'פלעג זאגן אויף אים אז ער איז א גאון אין מדות. ער האט זיך שטארק דערווייטערט פון מחלוקת. ער האט זוכה געווען צו זען אן אימפעריע פון טויזנטער חסידים וואס ער האט איינגעפלאנצט פון בלוט און שווייס נאכן ביטערן חורבן.

פערטער באבאווער רב

• רבי נפתלי צבי האלבערשטאם (כ"ה סיון ה'תרצ"א - י"ב אדר ב' ה'תשס"ה), דער באבאווער רב.
  • מרת רחל שרה, די ווייב פון רבי יהושע רובין דער רב פון באבאוו 45.
  • מרת רבקה שיינדיל, די ווייב פון רבי מרדכי דוד אונגער, דער רבי פון באבאוו 45.

נאך דער פטירה פונעם דריטן רבי'ן ר' שלמה האלבערשטאם - ר"ח אב תש"ס, האט איבערגענומען די הנהגה זיין עלטסער זון רבי נפתלי צבי האלבערשטאם, ליידער איז ער נישט געווארן געזונט נישט לאנג נאכן איבערנעמען די קרוין. כ"א אדר תשס"ד איז ער צוזאם געפאלן פון א שטארקער הארץ אטאקע, און א יאר דערויף י"ב אדר ב תשס"ה איז ער נסתלק געווארן. ער האט אלע יארן פאר ער איז געווען רבי אויפגעשטעלט צוזאמען מיט זיין טאטן די באבאווער מוסדות און אליין אנגעפירט מיט זיי. אזוי אויך האט זיין הארץ געבלוטיגט פאר א צווייטן איד'ס צרה און האט זיך אסאך באשעפטיגט מיטן העלפן אידן. אלס רבי איז ער ברייט באקאנט געווארן אלס א גט'ליכער מאן. גאר אסאך אידן פון אלע עקן וועלט, זענען געהאלפן געווארן ביי אים מיט ישועות ורפואות.

באבאוו היינט

טעקע:Bobov.JPG

הרב בן ציון אריה לייבוש האלבערשטאם

טעקע:Bobovungar.JPG

רבי מרדכי דוד אונגער

נאך דער צעטיילונג פונעם באבאווער הויף זענען דא צוויי נאכפאלגער פון רבי נפתלי צבי

• רבי בן ציון אריה לייבוש האלבערשטאם, באבאווער רב
• רבי מרדכי דוד אונגער, רבי פון באבאוו 45

ספרים

די תלמידי הישיבות אין באבאוו האבן ארויס גע'געבן א חודש'ליכן קובץ ביז תש"ס. עס האט געהייסן "כרם שלמה".

און די תלמידי הישיבות אין באבאוו 45 געבן ארויס א חודש'ליכן קובץ, "עץ חיים".

רעפערענצן

• אנציקלופדיה לחכמי גליציה, מאיר וונדר

דרויסנדע לינקס

דער בלאט קומט פון יידיש-וויקיפעדיע.
אריגינעלער בלאט • ערלויבעניש cc-by-sa 3.0.

דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!