רוי:רבי יצחק אייזיק ווייס
רבי יצחק אייזיק ווייס (ה'תרל"ה – י"ג סיון ה'תש"ד) איז געווען דער צווייטער רבי פונעם ספינקער חסידות. זיינע תורות זענען געשריבן אין דעם ספר "חקל יצחק".
ביאגראפיע
רבי יצחק אייזיק איז געבוירן געווארן אין ספינקא, מאראמאראש, עסטרייך אונגארישע אימפעריע (היינט אוקראינע), צו זיין פאטער רבי יוסף מאיר, דער "אמרי יוסף", און זיין מוטער מרת פערל, טאכטער פון ר' עזרא יעקב באש פון ספינקא.
ער האט חתונה געהאט מיט דער טאכטער פון רבי ישכר בעריש אייכנשטיין פון ווערעצקי בעל "מלבוש לשבת ויום טוב". אלס יונגערמאן האט ער שוין געטוישט שאלות און תשובות מיט די גדולי הדור, ווי רבי יעקב וויידנפעלד מחבר פון "כוכב מיעקב" (רימליווער רב); רבי יצחק אלחנן ספעקטאר (קאוונער רב); רבי חיים חזקיהו מדיני, מחבר פון "שדי חמד"; דער מהרש"ם פון בערזאן; און רבי יצחק שמעלקיס מחבר פון "בית יצחק" (לעמבערגער רב).
נאך דער פטירה פון זיין פאטער אין תרס"ט האט ער איבערגענומען די ספינקער רביסטעווע, וואס האט זיך דאן שטארק צעברייטערט און איז געווארן איינע פון די דריי גרויסע חסידישע הויפן אין אונגארן. ערב סוכות תרע"ז, ביי דער ערשטער וועלט מלחמה, ווען די רוסישע ארמיי איז אריין אין ספינקא, איז ער אנטלאפן קיין בודאפעשט. דערנאך האט ער געצויגן זיין הויף קיין מונקאטש, וואו ער האט אויפגעשטעלט די "אמרי יוסף" ישיבה. ער האט אבער געהאט רדיפות פונעם מונקאטשער רב און אין יאר תר"צ האט ער אריבערגעפירט זיין הויף קיין סעליש.
ער האט געלערנט מיט גרויסער התמדה. ביינאכט האט ער אויפגענומען דעם עולם ביז עלעווע, און שוין פאר האלב דריי האט מען אים שוין געהערט לענרנען לעבעדיק.
אסרו חג פון פסח תש"ד האבן די נאציס אריינגעלייגט די אידן פון סעליש אין א געטא. דער ספינקער רבי האט געהאט וויזעס צו פארן קיין ענגלאנד אדער ארץ ישראל, אבער ער האט נישט מסכים געווען צו פארלאזן זיין קהילה. א' סיון האט מען זיי פארטריבן קיין אוישוויץ, וואו ער איז אומגעקומען על קידוש השם י"ג סיון.
משפחה
רבי יוסף מאיר האט געהייראט די טאכטער פון רבי ישכר בעריש אייכנשטיין פון ווערעצקי. זיי האבן געהאט דריי קינדער:
- רבי ישראל חיים
- רבי נפתלי צבי, רב פון בילקע, מאראמאראש
- הינדא שיינדל, די ווייב פון רבי אברהם אביש הורוויץ, רב פון קראלי
זיינע קינדער זענען אלע אומגעקומען ביים חורבן אייראפע. זיין אייניקל רבי יעקב יוסף ווייס, זון פון רבי ישראל חיים, איז געווארן ספינקער רבי נאך דער מלחמה.
זעט אויך
רעפערענצן
- "שבת בשבתו" (אנטווערפן), נומער 1086, י"א סיון תשע"ה
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!