רוי:רבי אברהם שלמה יאווא
ר' אברהם שלמה יאווא ז"ל איז געווען א רב אין וויליאמסבורג, ברוקלין, און א באקאנטער מגיד שיעור וועלכער האט פארגעלערנט טויזנטער שיעורים.
ביאגראפיע
ער איז געבוירן אין וויליאמסבורג צו ספרד'ישע עלטערן אריגינעל פון ארגענטינע, וואס האבן זיך אריבערגעצויגן צו אמעריקע, כדי צו זיין נאנט צו רבי יואל טייטלבוים. זיין טאטנס נאמען איז ר' יוסף.
אלס קינד האט ער געלערנט אין סאטמאר, און איז געווארן א חסיד מיט דער פולער חסידישער טראגע און מנהגים. אלס בחור האט ער געלערנט אין עטליכע ישיבות. צוערשט אין צעהלים, דאן אין טאהשער ישיבה אין קרית טאהש, וואו ער האט אנגעקניפט א קשר מיט הרה"ק מטאהש, שפעטער האט ער געלערנט אין מתיבתא אין קרית יואל.
ער איז נפטר געווארן שבת פר' חקת, ט' תמוז, אין עלטער פון 55 יאר נאכ'ן נישט זיין געזונט פאר א לענגערער תקופה. זיין לוי' איז פארגעקומען אין בארא פארק, ביי דער אונגווארער שול. דערנאך איז זיין מיטה געפירט געווארן קיין ארץ ישראל וואו ער איז געקומען לקבורה אויפ'ן הר הזיתים.
הרבצת התורה
נאך דער חתונה האט ער עוסק געווען אין הרבצת התורה אין עטליכע חסידישע תלמוד תורה'ס פון ווילימאסבורג.
אויך האט ער שוין געדינט אלס ראש ישיבה מגיד שיעור און מנהל אין פילע חסידישע ישיבות דורכאויס ברוקלין.
ער פלעגט אפט שרייבן תורה און השקפה ארטיקלען פאר דער בלאט. זיינע קאלומס זענען געלאפן בעיקר אויפן דרך פון זיין רבי רבי אביגדור מילער.
שיעורים
ער איז געווען א געוואלדיגער מגיד שיעור געבענטשט מיט א זעלטענעם לשון לימודים. ער האט פארגעלערנט ש"ס אויף גאר א קלארן וועג וואס האט געצויגן טויזנטער צוהערער.
בלויז אויף קול הלשון אליין איז פארהאן פון אים 26,281 רעקארדירטע שיעורים.
רבנות
נאך דער פטירה פון רבי אביגדור מילער האט ער געעפנט א שול לשמו ולזכרו פון דעם בעל מוסר וואס ר' אברהם שלמה פלעגט אויסהערן זיינע מוסר שמועסן.
ער האט דאס א נאמען געגעבן קהילת לעמבערג.
פון די געניאלע מנהגים וואס די שול האט פארמאגט איז געווען נישט רעדן קיין דברים בטלים בשעתן דאווענען. מען דאווענט טאקע דארטן שנעלער און פריער ווי איבעראל כדי נאכצוקומען די תקנה.
ער האט צענדליגער מאל דורכגעלערנט חובת הלבבות, ביחידות און ברבים. במסגרת השיעורים אין זיין שול.
אים תשע"ח האט ער זיך געצויגן קיין קווינס, און ער האט פארדינגען זיין שול פאר א חבורה פון אינגעלייט.
ארטיסט
ר' אברהם שלמה האט זייער געלונגענע הענט און זיינע פרעכטיגע באצירונגען זענען פאפולער ביי אלע סאטמארער הויפן. אלס בחור האט ער ערצייגט אן אויג-פארכאפענדער קרוין וואס איז געווארן באנוצט ביים ברך משה.
שימוש תלמידי חכמים
ער האט זוכה געווען לקירבה יתירה סיי ביי רבי אהרן טייטלבוים וואס ער איז געווען א שטוב מענטש אלס בחור נאך ווען ער איז געווען אין קרית יואל ביי אים אין ישיבה. ער איז געווען אזא סארט שטוב מענטש וואס ר' אהרן האט געקענט רעדן מיט אים אין לערנען. ר' אהרן פלעגט אים באזונדער מכבד זיין.
אויך איז ער געווען א פייערדיגער חסיד און תלמיד חביב פון דעם סאטמארער רבי דער ברך משה. ער האט נישט פארפעלט קיין טישן יארן לאנג נאך דער חתונה אין וויליאמסבורג און שטענדיג געגאנגען זיך קוויטלען צו יעדער געלגענהייט.
אויך ביים אשווארער רבי וואס ער ווייסט נאכצוזאגן א שלל פון מעשיות אין סיפורי צדיקים פון אמאליגן דור.
אלס תלמיד פון רבי אביגדור מיללער
אבער בעיקר האט ער זיך אויסגעפארעמט זיין לעבן ביי רבי אביגדור מילער וואס ער האט נאכגעלאפן מיט מסירת נפש כאטשיג ר' אביגדור האט אים שטענדיג פארטריבן פון זיך נישט וועלענדיג האבן קיין חסידים.
משך פון די לעצטע פינף יאר פונעם לעבן און שאפן פון ר' אביגדור הערט מען אויף הונדערטער טעיפס די שטימע פון ר' אברהם שלמה פרעגן כל מיני שאלות פון ר' אביגדורס שיעורים אז דער דבר ה' זאל ארויסגיין אויף דער וועלט.
פון זיי זענען מלובן די דבר ה' איבער כל מיני פראגעס אינטערנעט עירוב סאטמאר ווידעא חינוך און נאך. אלעס אין שכר פון ר' אברהם שלמה וואס האט געפרעגט נאכאנאנד אן קיין בושה. פילע מאל הערט מען ר' אביגדור זאגן אז ער וויל נישט ענפטערן די שאלה צוליב דעם וואס דאס האט אן אנדער תירוץ פאר יעדן באזונדער און ער בעט אים צו רופן פריוואט אויפן טעלעפאון, די קומענדיגע טעיפ הערט מען ווי ר' אברהם שלמה האט גענומען בערך די זעלבע שאלה און דאס אויסגעדרייט אז ר' אביגדור זאל יא קענען ענטפערן און זיך נישט ארויסדרייען.
ר' אברהם שלמה פלעגט שטענדיג בעטן ר' אביגדור צו מאכן נאך שיעורים און אסאך מאל האט ער נאכגעגעבן. ווי למשל די אידיש שיעור חול המועד און נאך וואס ר' אביגדור איז ספעציעל ארויס מגדרו אויף די נודניקע שטיק פון ר' אברהם שלמה.
ער פלעגט שטענדיג טראגן אינגעלייט און בחורים צו ר' אביגדור אפט מאל פילע מאל א וואך פון וויליאמסבורג קיין פלעטבוש ווען אימער נאר שייך צו הערן און צו זעהן דעם צדיק'ס עבודה. ר' אברהם שלמה האט זיך זעלבסט נישט אוועקעגערורט פון ר' אביגדור, ספעציעל אין די הייליגע טעג ווי די עבודה פונעם צדיק האט זיך מער ארויסגעוויזן, און האט טאקע זוכה געווען ביים לעצטען מינוט צו אביסל קורת רוח ווען ביי די גסיסה פון ר' אביגדור האט ער אים ענדליך צוגעריפן דאס ערשטע מאל וואס ער האט אים אנגעקוקט און זיך באדאנקט און אים איבערגעבעטן אז ער האט אים נישט גענוג מקרב געווען און ארויסגעוויזן אנערקענונג אויף זיין געטריישפאט דורך אים פערזענליך געבן זיין סידור במתנה אוועק פון די אייניקלעך וואס האבן פראטעסטירט, און ר' אביגדור'ס ענטפער געווען אז ביי חסידים איז דאס א ווערד און ביי ליטוואקעס וועט דאס נישט זיין קיין ווערד.דאס איז געווען די לעצטער אקט פון יציאת נשמתו הטהורה אז ער האט זיך אזוי בחביבות באצויגן צו ר' אברהם שלמה שליט"א.
דרויסנדע לינקס
- זיינע שיעורים אויף קול הלשון
- אן אשכול אויף אייוועלט
- אן אינטערוויו אין ענגלישער משפחה איבער זיין קשר מיט רבי אביגדור מילער
- א באריכט איבער זיין פטירה אויף W365
דעת תורה על המצב בארץ ישראל, דורך רבי אברהם שלמה יאווא, ווידעא אויף יוטיוב (לענג: 12:49)
דאס איז נישט קיין המכלול ארטיקל, בלויז עפעס וואס ליגט דא ביז עס וועט ערזעצט ווערן מיט בעסערס. שרייבט עס איבער!